Ua Fesili Mai le ʻAufaitau . . .

Pe e Tatau Ona Ou Auai i se Lotu?

▪ Po o le māfuaaga o lou lē fia auai i se lotu ona e te lē fiafia i le pepelo ma le feʻainaʻi o tagata lotu, atoa ma faifeʻau? Ua tutusa la ou lagona ma le alagāupu faa-Falani, “O lē e iloa mea e fai e le lotu, e tele ina taumamao ma le Atua.”

Atonu e tāua iā te oe le Tusi Paia, ma o lou manatu e tatau ona faataga e le malo tagata e filifili i a latou lava lotu. Ae atonu o loo e fia iloa, ‘Pe e moni o loo faapea mai le Atua, o ē e fia tapuaʻi i le auala e talia e ia, e tatau ona auai i se faalapotopotoga faalelotu?’

O le tali puupuu, o le Ioe. E faapefea ona tatou mautinoa lenā mea? Ae pe e talia e le Atua lotu uma?

Seʻi iloilo le faaaʻoaʻoga a Iesu. Pe na iai se lotu a Iesu? A o laʻitiiti Iesu, o le masani a lona aiga ma isi e i le lotu Iutaia, e faapotopoto i le malumalu i Ierusalema e tapuaʻi ai i inā. (Luka 2:41-43) Ina ua matua Iesu, sa aufaatasi ma isi tagata Iutaia o ē sa tapuaʻi i le Atua, i le sunako i lo latou nuu. (Luka 4:14-16) Na fetalai atu o ia i se fafine e ese lana lotu: “Ua matou tapuaʻi i mea ua matou iloa.” (Ioane 4:22) Na faamanino atu ai e Iesu, o ia e auai i le lotu a tagata Iutaia.

Mulimuli ane, na taʻua e Iesu o le a teena e le Atua le lotu a tagata Iutaia, ona ua latou teena o ia. (Mataio 23:33–24:2) Ae na ia faaalia, o ē e fia tapuaʻi i le Atua i le auala e talia e Ia, e tatau ona autasi i le tapuaʻiga e tasi. Na ia fetalai atu i ona soo: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:35) E lē mafai e se soo o Keriso ona faaalia le alofa i ona uso talitonu, seʻi vaganā ua faatasitasi ma i latou i le tapuaʻiga e tasi. O lea mea moni, e na o le lua lava auala na taʻua e Iesu e tapuaʻi ai. O le isi auala e “vatele ma lautele” ma e “tau atu i le faaumatiaga.” Ae na fetalai o ia: “E vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē e maua.”—Mataio 7:13, 14.

O lona uiga la, e lē lava le auai i so o se lotu. Ua lapataʻi mai le Tusi Paia faasaga i le lolotu faatasi ma ē e “peiseaʻī ua toʻaga i lotu, a o le mana ua i lea mea ua latou teena,” ona faapea mai lea, ‘ia ʻalo ese i tagata faapena.’ (2 Timoteo 3:5, O le Tusi Paia Samoa—Lomiga 1969) Peitaʻi, e tele aogā e tatou te maua pe a iloa i latou o loo i le auala e tau atu i le ola, ma aufaatasi i ai. E faalaeiauina ma lagolagoina i tatou i le taimi nei, ma maua ai le faamoemoe pupula i le lumanaʻi.—Eperu 10:24, 25.

E faapefea ona iloa po o lē fea lotu o loo i le auala vaitiiti e tau i le ola? E lelei pe a iloilo tali mai i le Tusi Paia, o loo i le mataupu e 15 o le tusi O ā Aʻoaʻoga Moni a le Tusi Paia? * O le a aogā iā te oe e faia ai se filifiliga e faavae i le poto i le Tusi Paia, po o lē fea lotu e te auai.

[Faaopoopoga i lalo]