O le Tusi Lona Lua iā Timoteo 3:1-17
3 Ae ia iloa lenei mea, o aso e gata ai+ e oo mai ai aso e sili ona faigatā.
2 Auā e avea tagata ma ē e alolofa iā i latou lava, o ē e mananaʻo tele i tupe, o ē e gugutu, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni,
3 o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā,* o ē e lē fiafia i mea lelei,
4 o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua,
5 o ē e foliga mai e faamaoni i le Atua, ae e latou te lē o ola e tusa ai ma lea mana;+ ia ʻaloese mai iā i latou na.
6 O i latou na ua tutupu mai ai tane o ē e ō atu ma le faaʻoleʻole e faasesē tagata o aiga, ma puʻeina fafine ua vaivai o ē ua tumu i agasala ma pulea e tuʻinanauga eseese,
7 ua aʻoaʻoina soo ae e leʻi mafai lava ona latou maua le poto saʻo i le upu moni.
8 E pei ona tetee o Iani ma Iameri iā Mose, e faapena foʻi ona tetee i latou na i le upu moni. O na tane ua matuā lē mamā o latou mafaufau, ua lē taliaina o ni ē e mulimuli i le faatuatua.
9 Peitaʻi, e lē toe agaʻigaʻi i luma i latou, auā e iloa lelei e tagata uma lo latou vālea, e pei foʻi ona sa iloa le vālea o na tane e toʻalua.+
10 Ae ua e mulimulituʻi i aʻu aʻoaʻoga, o loʻu olaga,+ o loʻu sini, o loʻu faatuatua, o loʻu onosaʻi, o loʻu alofa, o loʻu tumau,
11 o sauāga ma puapuaga e pei ona oo iā te aʻu i Anetioka,+ i Ikonio+ ma Lusa.+ Sa ou lavātia na sauāga, ma na laveaʻiina aʻu e le Alii mai i na mea uma.+
12 O le mea moni, e sauāina foʻi i latou uma e naunau e ola ma le faamaoni i le Atua ma aufaatasi ma Keriso Iesu.+
13 A o tagata amioleaga ma ē taufaasesē, e faateteleina pea lo latou leaga, o loo faasesē atu i nisi ma ua faasesēina foʻi i latou.+
14 A o oe, ia e tausisi pea i mea ua e aʻoaʻoina ma na faatalitonu ai oe,+ auā ua e iloa ē na aʻoaʻoina oe
15 ma na e iloa foʻi tusitusiga paia+ talu ona e laʻitiiti,+ lea e mafai ona faapotoina ai oe mo le faaolataga e ala i le faatuatua iā Keriso Iesu.+
16 O Tusitusiga Paia uma e mai i le agaga o le Atua,+ ma e aogā e aʻoaʻo ai,+ e aʻoaʻi ai, e faasaʻo ai mea, e faatonu ai i le amiotonu,+
17 ina ia matuā agavaa ai le tagata o le Atua, e lava saunia mo galuega lelei uma.
Faamatalaga Pito i Lalo
^ Ele., “taufeʻai.”
