Le Manatu o le Tusi Paia

Pe e Finagalo le Atua ia E Mauʻoa?

“O se aso fou ua aumaia e le Atua iā te aʻu! O le a faasolo ina ou mauʻoa!”

“Ou te manaʻo ia matuā mauʻoa, auā e finagalo le Atua ma agelu ia ou mauʻoa.”

“E aumai e le Atua iā i tatou le mana e mauʻoa ai.”

“Ua ou mauʻoa ona o le Tusi [le Tusi Paia].”

UA ATAGIA mai i nei faaupuga le manatu o le tele o lotu e faapea, e mafai ona mauʻoa faaletino se tasi ona o le faamanuia a le Atua. E latou te faapea mai, pe afai e te faia le mea e finagalo le Atua e te faia, o le a ia aumaia iā te oe le tamaoaiga faaletino i lenei olaga, ma toe tauia oe mulimuli ane. Ua naunau i ai tagata i lenei talitonuga, ma ua sili ona alumia tusi o loo lagolagoina ai lenei talitonuga. Ae pe e ōgatusa lenei “talitonuga i le mauaina o le ʻoa” ma le manatu o le Tusi Paia?

E mautinoa, e finagalo Lē na faia i tatou, o lē ua taʻua i le Tusi Paia o “le Atua fiafia,” ia tatou iʻu i ni olaga fiafia ma taulau manuia. (1 Timoteo 1:11; Salamo 1:1-3) E lē gata i lea, e na te faamanuia i latou o ē e faafiafia lona finagalo. (Faataoto 10:22) Ae mo i tatou i aso nei, pe e uiga atu lenā faamanuia i le ʻoa faaletino? E manino le tali pe a tatou malamalama i le vaitaimi o loo tatou iai i le faagasologa o mea, e tusa ai ma fuafuaga a le Atua.

Po o le Taimi Lenei e Mauʻoa Ai?

I taimi ua mavae, sa faamanuia e le Atua nisi o ana auauna i ʻoa faaletino, e pei o se faaaʻoaʻoga, o le augātamā o Iopu ma le tupu o Solomona. (1 Tupu 10:23; Iopu 42:12) Peitaʻi, o le toʻatele o isi tagata na matataʻu i le Atua sa itiiti ni a latou ʻoa, e aofia ai Ioane le Papatiso ma Iesu Keriso. (Mareko 1:6; Luka 9:58) O le ā le mea ua taʻu mai e lenei manatu? E tusa ai ma le Tusi Paia, e feutagaʻi le Atua ma ana auauna e tusa ai o ana fuafuaga mo i latou, i le taimi talafeagai. (Failauga 3:1) E faapefea ona faatatauina lenā mataupu silisili iā i tatou i aso nei?

Ua faaalia i le valoaga o le Tusi Paia e faapea, ua tatou ola i “le iʻuga o [le] faiga o mea a le lalolagi,” po o “aso e gata ai” o lenei lalolagi. E faailogaina lenei vaitaimi i taua, faamaʻi, oge, mafuiʻe, ma le solofa ifo o le sosaiete faaletagata—o tulaga e lē mafaatusalia le matuā pagatia ai o le fanau a tagata, talu mai le tausaga 1914. (Mataio 24:3; 2 Timoteo 3:1-5; Luka 21:10, 11; Faaaliga 6:3-8) Pe a faapuupuu, ua pei lenei lalolagi o se vaa ua faasolo ina goto! Pe a manatu i na mea moni ua tutupu, pe e atamai mo le Atua ona faamanuia i ana auauna taʻitasi i ʻoa faaletino, po o le a tuu mai e le Atua nisi mea e sili atu ona tāua mo i tatou?

Na faatusa e Iesu Keriso o tatou taimi i aso o Noa. Na fetalai Iesu e faapea: “E pei o aso a o leʻi oo le lolo, na latou aai ma inu, na faaipoipo  alii ma tamaʻitaʻi, seʻia oo lava i le aso na ulu atu ai Noa i le vaa, ma latou te leʻi ano i ai seʻia oo mai le lolo ma tafiesea ai i latou uma, e faapea foʻi le faatasi mai o le Atalii o le tagata.” (Mataio 24:37-39) Na faatusa foʻi e Iesu o tatou aso i aso o Lota. I tuaoi o Lota i Sotoma ma Komoro, sa latou ‘aai, feinu, faatau mai ma faatau atu, totō, ma fau fale.’ “A ua oo i le aso na alu ese ai Lota mai Sotoma, ona totō ifo ai lea o le afi ma le teiō mai le lagi, ma faaumatia ai i latou uma,” ma na fetalai atili e faapea: “E faapena foʻi le aso o le a faaalia mai ai le Atalii o le tagata.”—Luka 17:28-30.

O le mea mautinoa, e leai se leaga o le aai, feinu, faaipoipo, faatau mai ma faatau atu. O le lamatiaga, o le soona pupū i na mea, ae galo ai iā i tatou le faanatinati o le taimi ua i ai. O lea la, ia fesili ifo iā te oe lava, ‘Po o le a faia e le Atua se mea lelei mo i tatou, pe afai e na te faamanuiaina i tatou i le tele o mea e tosina i ai o tatou mafaufau?’ * Nai lo lenā, o le a iai ni lamatiaga iā i tatou. E lē o le finagalo lenā o le Atua alofa!—1 Timoteo 6:17; 1 Ioane 4:8.

O se Taimi mo le Laveaʻia o Ola!

I nei taimi e sili ona faigatā i le talafaasolopito o le tagata, ua iai i tagata o le Atua se galuega e ao ona faanatinati ona fai. Na fetalai Iesu e faapea: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.” (Mataio 24:14) Ua matuā manatu mamafa Molimau a Ieova i na upu. O lea, ua latou faalaeiau ai o latou tuaoi e aʻoaʻo e faatatau i lenā Malo, ma mea e faafinagaloina e le Atua ina ia maua ai le ola e faavavau.—Ioane 17:3.

Peitaʻi, e lē faatalitalia e le Atua ana auauna ia ola i ni olaga ua soona faafaigofie naʻuā, pe soona faasāsā. Nai lo lea, e finagalo o ia, ia latou lotomalilie i mea ua maua i le olaga, ina ia mafai ona latou taulaʻi atu i le auaunaga iā te ia. (Mataio 6:33) E na te faamautinoa ua latou maua mea faaletino o loo latou manaʻomia. Ua taʻua i le Eperu 13:5, 6 e faapea: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou. Auā na fetalai [le Atua]: ‘Ou te lē tuua lava oe, ma ou te lē tuulafoaʻia lava oe.’”

O le a faataunuu e le Atua lenā folafolaga i se auala mataʻina, pe a ia faasaoina mai “se motu o tagata e toʻatele” o tagata tapuaʻi moni, mai i le iʻuga o lenei faiga o mea, i se lalolagi fou filemu ma faamanuiaina. (Faaaliga 7:9, 14) Na fetalai Iesu e faapea: “Ua ou sau ina ia latou [ona soo faamaoni] maua le ola, ma saga maua atili ai.” (Ioane 10:10) E lē o faasino atu lenā ‘olaga e saga maua atili’ i se olaga e tele mea faitino i le taimi nei, ae o loo faasino atu i le olaga e lē muta i le Parataiso i lalo o le pulega a le Malo o le Atua.—Luka 23:43.

Ia aua neʻi taliaina se mea e leai se tāua e ala i le faasesēina i le talitonuga i le mauaina o ʻoa, lea a tuu i se tulaga moni lava, o se talitonuga e tosina ese ai i tatou mai i mea e tāua moni. Nai lo lea, ia utagia fetalaiga alofa ma faanatinati a Iesu e faapea: “Ia outou uaʻi atu iā te outou lava, ina neʻi faamamafaina o outou loto i le ʻai tele, ma le inu tele, ma le popole i mea o le olaga nei, neʻi oo faafuaseʻi mai lenā aso iā te outou e pei o se mailei.”—Luka 21:34, 35.

[Faaopoopoga i lalo]

PE SA E TAUMĀNATU?

▪ O le ā le taimi atofaina ua iai nei?—Mataio 24:14.

▪ Na faatusa e Iesu o tatou taimi, i taimi o ai tagata o loo taʻua i le Tusi Paia?—Mataio 24:37-39; Luka 17:28-30.

▪ O le ā e ao ona tatou ʻalofia pe afai tatou te fia maua le ola e faavavau?—Luka 21:34.

[Faamatalaga faaopoopo i le itulau 29]

O le mea moni lava, o le talitonuga i le mauaina o ʻoa, o se talitonuga e tosina ese ai i tatou mai i mea e tāua moni