O le ā e Faasino Atu i ai Papelonia le Aai Tele?

PLAY

Le tali a le Tusi Paia

O Papelonia le Aai Tele lea e faamatalaina i le tusi o Faaaliga, e faasino atu i le tuufaatasiga o lotu sesē uma a le lalolagi, lea e teena e le Atua. a (Faaaliga 14:8; 17:5; 18:21) E ui e eseese auala e fai ai a latou tapuaʻiga, ae o loo latou taʻitaʻieseina tagata mai i le tapuaʻi atu i le Atua moni o Ieova.—Teuteronome 4:35.

Auala e iloa ai Papelonia le Aai Tele

Papelonia le Aai Tele e faafaatusa. O loo faamatalaina i le Tusi Paia o ia o se “fafine” ma o se “fafine talitane sili,” o lona igoa, o le “mea lilo: ‘Papelonia le Aai Tele.’” (Faaaliga 17:1, 3, 5) O le tusi o Faaaliga o loo faailoa mai “i faailoga,” ma e talafeagai ona faapea atu o Papelonia le Aai Tele e lē o se fafine moni, ae e faafaatusa. (Faaaliga 1:1) E lē gata i lea, o loo ‘tiʻetiʻe o ia i luga o vai e tele,’ lea e faaata mai ai “tagata, ma motu o tagata, ma nuu, ma gagana.” (Faaaliga 17:1, 15) E lē mafai e se fafine moni ona faia lenā mea.
O Papelonia le Aai Tele o se faalapotopotoga faavaomalo. E taʻua o ia o le “aai tele lea e pule i tupu o le lalolagi.” (Faaaliga 17:18) O lona uiga, e iai lona aafiaga ma ana taaʻiga i le lalolagi atoa.
O Papelonia le Aai Tele o se faalapotopotoga faalotu, ae lē o se vaega faapolotiki pe faapisinisi. O Papelonia anamua o se aai mapolotu, ae lauiloa foʻi i ana faiga “faalauatau” ma “togafiti faataulāitu.” (Isaia 47:1, 12, 13; Ieremia 50:1, 2, 38) O le mea moni, o nei tapuaʻiga sesē ma a latou gaoioiga, na tetee atu ai i le Atua moni o Ieova. (Kenese 10:8, 9; 11:2-4, 8) O le faasausili o tupu o Papelonia na latou faasilisilia ai i latou lava nai lo o Ieova ma lana tapuaʻiga. (Isaia 14:4, 13, 14; Tanielu 5:2-4, 23) E faapena foʻi Papelonia le Aai Tele, ua lauiloa i ana “faiga faaagaga,” ma ua iloa ai o ia o se faalapotopotoga faalotu.—Faaaliga 18:23.

E lē mafai ona faapea atu o Papelonia o se faalapotopotoga faapolotiki, ona e taufaitagituʻi “tupu o le lalolagi” i lona faaumatiaga. (Faaaliga 17:1, 2; 18:9) E lē mafai foʻi ona faapea atu o ia o se faalapotopotoga faapisinisi, ona o loo faaeseese o ia e le Tusi Paia mai i “le ʻaufaatauʻoa o loo femalagaaʻi o le lalolagi.”—Faaaliga 18:11, 15.
O le maa faamanatu o le tupu Papelonia o Naponita, o loo iai faailoga o atua tolutasi o Sin, Ishtar, ma Shamash

Ua talafeagai ona taʻua Papelonia le Aai Tele, o lotu sesē. Nai lo le aʻoaʻoina o tagata e vavalalata atu i le Atua moni o Ieova, ae ua latou taʻitaʻisesēina tagata e tapuaʻi atu i isi atua. O loo faamatalaina lenei gaoioiga i le Tusi Paia, o le “faitaaga” faaleagaga. (Levitiko 20:6; Esoto 34:15, 16) O talitonuga e pei o le Tolutasi, o le ola pea o le agaga pe a oti, ma le faaaogāina o faatusa i tapuaʻiga, na amata mai i Papelonia anamua ma o loo faaauau pea ona faaaogā e lotu sesē. Ua nini faatasi a latou tapuaʻiga ma le manaʻo i le lalolagi. O loo faamatalaina nei gaoioiga lē faamaoni i le Tusi Paia, o le mulilua faaleagaga.—Iakopo 4:4.

Ua talafeagai lelei le tulaga tamaoaiga ma le faalialiavale o lotu sesē, ma le auala o loo faamatala ai i le Tusi Paia Papelonia le Aai Tele, o lo o ‘ofu i ofu violē ma le ofu mūmū sesega’ ma ua “teuteuina i auro, ma maa tāua, ma penina.” (Faaaliga 17:4) O Papelonia le Aai Tele, o le faapogai o “mea e inosia i le lalolagi,” po o aʻoaʻoga ma gaoioiga e lē faamamaluina ai le Atua. (Faaaliga 17:5) O i latou e auai i lotu sesē, o “tagata, ma motu o tagata, ma nuu, ma gagana” ia o loo lagolagoina Papelonia le Aai Tele.—Faaaliga 17:5.

E tuuaʻia Papelonia le Aai Tele i le feoti o “tagata uma ua fasiotia i le lalolagi.” (Faaaliga 18:24) A o faagasolo taimi, na tausolomua lotu i le lagolagoina o taua ma faiga faatupu faalavelave, nai lo o le aʻoaʻoina o tagata i le upu moni e faatatau iā Ieova le Atua alofa. (1 Ioane 4:8) Ua iʻu atu ai i le faateleina o le faamasaatoto. E tatau iā i latou e mananaʻo e faafiafia le Atua ona “ō ese mai iā te ia” ma vavaeese mai i lotu sesē.—Faaaliga 18:4; 2 Korinito 6:14-17.

a Tagaʻi i le mataupu “E Faapefea Ona Ou Iloa le Tapuaʻiga Moni?”