E finagalo le Atua ina ia potopoto tagata mo le tapuaʻiga. Ua taʻua i le Tusi Paia: “Ia tatou manatunatu foʻi le tasi i le isi ina ia faatupu ai le alofa ma galuega lelei, aua neʻi tuulafoaʻiina le faapotopotoina o i tatou.”​—Eperu 10:24, 25, faaopoopoga pito i lalo.

 Na faailoa mai e Iesu o le a faamaopoopoina ona soo i se vaega ina ua ia fetalai iā i latou: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:35) O le auala autū e faaalia ai lenei alofa, e tatau i soo o Iesu ona auaumea ma uso talitonu. E faamaopoopoina i latou i ni faapotopotoga ma feiloaʻi e lē aunoa mo le tapuaʻiga. (1 Korinito 16:19) O nei vala uma o le a avea ai i latou o se vaega o le ʻauuso i le lalolagi aoao.​—1 Peteru 2:​17

O mea e sili ona manaʻomia nai lo le tau ina auai i se lotu

 A o faailoa mai e le Tusi Paia e tatau i tagata ona potopoto faatasi i le tapuaʻiga i le Atua, e lē o aʻoaʻoina ai e faapea e mafai e le tagata ona faamalieina le Atua i le tau ina avea o se sui auai o se lotu. Ina ia maua le finagalo malie o le Atua, e tatau i le tapuaʻiga a se tasi ona aafia ai lona olaga i aso faisoo. O se faaaʻoaʻoga, o loo faapea mai le Tusi Paia: “O le tapuaʻiga lenei e mamā ma lē taʻuleagaina i le silafaga a le Atua lo tatou Tamā: ia tausi i tamaiti ua mātua oti ma fafine ua oti a latou tane i taimi o o latou puapuaga, ma ia puipuia le tagata lava ia neʻi pisia mai i le lalolagi.”—Iakopo 1:27, faaopoopoga pito i lalo.