Ua lē taulau taumafaiga a tagata ina ia aumaia se filemu i le lalolagi, ma o le a faaauau ona lē taulau ona o nisi nei o māfuaaga:

•   “E lē o i le tagata foʻi e savali, ona faatonuina le mea e ui ai o ia.” (Ieremia 10:23) E lē mafai ona maua e tagata se filemu tumau ona e leʻi faia i latou ma se tomai po o le aiā e pule ai iā i latou lava.

•   Ua faaliliuina e le Tusi Paia o le Good News Translation le Salamo 146:3, 4 e faapea: “Aua tou te faatuatua i taʻitaʻi faaletagata; e leai se tagata e mafai ona faasaoina outou. E toe foʻi atu i latou i le efuefu pe a feoti; e faamutaina i lea lava aso a latou fuafuaga uma.” E lē mafai e taʻitaʻi o malo e oo lava i ē e matuā lelei o latou faanaunauga, ona saunia ni vaifofō tumau e foʻia ai faigātaua.

•   “O aso e gata ai e oo mai ai aso e sili ona faigatā. Auā e avea tagata ma ē e . . . sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga.” (2 Timoteo 3:1–4) Ua tatou ola i “aso e gata ai” o lenei lalolagi amioleaga, lea ua matuā taatele ai uiga e lē mafai ona faatupu ai le filemu.

•   “Oi talofa i le laueleele ma le sami, auā ua alu ifo iā te outou le Tiapolo ua lotoa tele, auā ua na iloa ua puupuu lona taimi.” (Faaaliga 12:12) Talu ai ua lafo mai i le lalolagi le Tiapolo, o le fili o le Atua, ua ia uunaʻia ai tagata e faaaʻoaʻo i ona uiga sauā. E lē mafai ona tatou ola i se olaga filemu a o avea pea le Tiapolo ma “pule o lenei lalolagi.”—Ioane 12:31.

•   “O le a ia [Malo o le Atua] tuʻimomomoina ma faaumatia malo uma [e tetee i le Atua], ae e tumau lea malo e faavavau.” (Tanielu 2:44) E leai se malo faaletagata ua na o le Malo o le Atua o le a faamalieina lo tatou manaʻoga mo se lalolagi e filemu e faavavau.—Salamo 145:16.