Rosu daafira noonke lao Qullaawu Maxaafi biddishshi aana xintantinote. Mittu mittunku Yihowa Farciˈraasinchi, Qullaawu Maxaafinni qajeelino tiiasi harunse Maganu Qaali aana xintamino seera ma garinni harunsannoro doodhanno; togoo seeri giddo mito aanchine laˈneemmo. a

•  Roso rosa lowo geeshsha hasiissanno

•  Rosoho quwa saˈˈa dihasiissanno

•  Lowiidi dirimi rosi amanyootunna ayyaanaamittete qarra abbanno

•  Yihowa Farciˈraasine ooso calla badde rosiissanno?

 Rosu mittu manchira “egennonna wodancha” heedhannosi gede kaaˈlanno; Qullaawu Maxaafino togoo akatta lowo waaga afidhinota kulanno. (Lawishsha 2:10, 11; 3:21, 22) Hakkiinni saeno, Yesuusi rosaanosi isi hajajinore wolootaho rosiissanno gede kulino. (Maatewoosi 28:19, 20) Konni daafira, ammananke harunsitannori halaˈlado egenno afidhanno gede lawishshaho, nabbawa, borreessanna hedonsa coyidhe xawisa rossanno gede jawaachinsheemmo, hattono kaaˈlineemmo; b qoleno wole ammaˈnonna budi daafira egenno heedhannonsa gede kaaˈlineemmo.—1 Qorontoosi 9:20-22; 1 Ximootewoosi 4:13.

 Mangisteno rosu kaaˈlanno gara huwattino daafira, aja dume uminna layinki dirimi roso rossanno gede assitanno. “Mannu baalu aleenni noo gashshaanora hajajama hasiissanno” yitanno hajajo garinni, togooha mangistete seera ayirrinseemmo. (Roomu Sokka 13:1) Qoleno, oosonke rosu minira marte higa calla ikkikkinni, seekkite rosate dandiiture baala assitanno gede jawaachinsheemmo. c Maganu Qaali, “Assitinannire baala . . . taalu wodaninni asse” yaanno.—Qolasiyaasi Sokka 3:23.

 Rosu, mininke mannira hasiisannore wonshineemmo gede kaaˈlannonke. Qullaawu Maxaafi yaanno garinni, “Umisi fiixa, roorenka minisi manna kaaˈlannokkihu, ammana agurinoho; ammaninokki manninni roore bushaho.” (1 Ximootewoosi 5:8) Roso rosa, Maganu maatenke towaaxxineemmo gede uyinonke qeecha wonshate kaaˈlitannonke. Ze Worlidi Buuki Insayikilopiidiya yaanno garinni, rosu aanno kaaˈlo giddo mitte, “mannu dagooma kaaˈlannoha . . . hattono miinja abbannoha ikkanno gede kaaˈlate.” Dancha gede rosinohunna ogimma noosi manchi, hakkeeshshi geeshsha rosinokki manchi geeshsha qarramikkinni looso afiˈranna maatesi towaaxxa dandaanno.—Lawishsha 22:29.

 Annuwunna amuuwu oosonsara hasiisannore wonshitanno doogga giddo mitte, ooso lophite jajjabba ikkitanno woyitira qixxaabbanno gede kaaˈlate; rosu tennerano lowore kaaˈlanno. (2 Qorontoosi 12:14) Hige mitu qooxeessira rosoho woxe baaxxinanniha, rosu minira eˈne rosa qarra ikkitannoha, woy roso rosa budeho nookkire ikkitara dandiitanno. Ikkirono, annuwunna amuuwu oosonsa rosiisidhanno gede jawaachinsheemmo. d Qoleno annuwunna amuuwu oosonsa dancha rosaano ikkitanno gede kaaˈla dandiitanno gara rosiinseemmo. e

 Ronseemmo roso qorophine doodhineemmo. Qullaawu Maxaafi togo yaanno: “Gowwu manchi yinire baala adda assiˈranno; egennaamu kayinni layiˈranni qaafanno.” (Lawishsha 14:15) Konne xintu seera harunsine, uminna layinki dirimi rosi gedensaanni rosa dandiinannihu hiikku rosu dani nooronna mittu mittunku mayi horonna gawajjo afiˈrinoro seekkine keenneemmo. Lawishshaho, ogimmate rosi mine eˈne rosa harancho yanna giddo dancha qajeelsha afiˈrate kaaˈlitara dandiitanno.

 Ayyaanaamittete rosi alamete rosinni roore kaaˈlanno. Qullaawu Maxaafi aana xintaminohu ayyaanaamittete rosi Magano anfanni gede kaaˈlanno; tini egenno heeshsho uyitanno daafira, alamete rosinni roortanno. (Yohaannisi 17:3) Qoleno ayyaanaamittete rosi “gara ikkino coyi, halaalunna taashsha maatiro” buunxeemmo gedenna ‘haˈneemmo doogono bande anfeemmo’ gede kaaˈlannonke. (Lawishsha 2:9) Soqqamaasinchu Phaawuloosi xaa ikkoommero yuniversitete yinanni gedeewa rosinoho; ikkirono isi “Kiristoosa egennatenni roorinori mitturino nookkita” coyiˈrino. (Filiphisiyusi Sokka 3:8; Soqqamaasinete Looso 22:3) Hatteente gede yannankera Yihowa Farciˈraasine giddo batinyu jawa roso rossinoreeti; ikkirono insa ayyaanaamittete rosi konninni roore waaga afiˈrinota huwattino. f

 Qullaawu Maxaafi, “Egennaamu manchi bushare afiro maaxamanno” yaanno. (Lawishsha 22:3) Yihowa Farciˈraasine, mite yuniversitera woy lowiidi dirimi roso ronsannite wole hattoo uurrinsha giddo noo heeshsho rosaanote amanyootunna ayyaanaamittete gawajjo abbitannota huwattino. Hakko daafira, batinye Yihowa Farciˈraasine insano oosonsano togoo heeshsho giddora eˈara dihasidhanno. Insa lowiidi dirimi rosi minna giddo, aante noote gedeeti soˈrote hedo woˈmitinota huwattino:

•   Soˈrote hedo: Woxu hagiirre afiˈnanni gedenna teense heeˈnanni gede assanno

   Duucha woyite, lowiidi dirimi roso rosa lowo damoozi noo looso afiˈrate qara coyeeti yine kullanni daafira, batinye rosaano yuniversite eˈannohu lowo woxe afiˈra hasidhanno daafiraati. Mitootu, ‘Woxu heeˈrinkero hagiirraamma ikkineemmo, hattono teense heeˈneemmo’ yite heddanno; Qullaawu Maxaafi kayinni togoo hedo haafa ikkitinota xawise kulanno. (Rosiisaancho 5:10) Hakkiinni saeno, Qullaawu Maxaafi “woxe baxa bunshe baalate buicho [ikkitinotanna]” roore woyite ammana huntannota xawisanno. (1 Ximootewoosi 6:10) Yihowa Farciˈraasine “jirote baxilli” woshshaade amadannonsakki gede gargadhate dandiiture baala assitanno.—Maatewoosi 13:22.

•   Soˈrote hedo: Mittu manchi lowiidi dirimi roso ronse afiˈnanni ayirrinyenna silxaane afiˈra hasiissannosi

   Lawishshaho, Nika Gilaari yinannihu albihu Joorjiyu gobbahu qaru gashshaanchi gobbasira rosantinota mitte hedo kulanni togo yiino: “Joorjiyaho mittu manchi ayirrado ikkate yuniversitete digire noosiha ikka hasiissannosi yine hendanni. . . . [Albi yannara,] digire noonsakki wedellooti ayiddensa shollishshinohu gede assine hendanni.” g Qullaawu Maxaafi kayinni, tenne alame aana maccaha ikkate sharrama hasiissannonkekkita kulanno. Yesuusi isi waro ayirrinyeho wojji yitannore ammaˈnote murroota togo yiino: “Kiˈne mimmitiˈnewiinni ayirrinye hasidhinanniri, . . . ane hiitto ikkitine ammantinannie?” (Yohaannisi 5:44) Yuniversitete heeshsho Maganu giwannohu booˈnate akati heeˈrannonke gede assitankera dandiitanno.—Lawishsha 6:16, 17; 1 Pheexiroosi 5:5.

•   Soˈrote hedo: Danchunna bushu coyi maatiro mittu mittunku manchi umisi biddishshi garinni doodha hasiissannosi

   Yihowa Farciˈraasine danchunna bushu maatiro doodhitannohu Maganu biddishshi garinniiti. (Isayaasi 5:20) Ikkollana, Joornaali ofi Alkohooli endi Diraagi Ejukeeshiini yaanno maxaafira fulino birxichi yaanno garinni, yuniversitete giddo batinyu wedellooti darawonsa xixxiibbeennansa “bushunna danchu maatiro affe heedhenni hakkiinni baxxinore assitanno.” h Tini hedo “Bushu jaaloomi dancha amanyoote hunanno” yaannohu Qullaawu Maxaafi biddishshi ledo sumuu yitannote. (1 Qorontoosi 15:33) Yuniversitubbate giddo Maganu giwanno amanyooti lawishshaho dimba, jingilli assitanno xagga adhanna adhammikkinni siimu xaadooshshe assa rosantinote; isinni duucha woyite, rosaano togoore assitanno gede jawaachinshanninsa.—1 Qorontoosi 6:9, 10; 2 Qorontoosi 7:1.

•   Soˈrote hedo: Alame woyyeessate lowiidi dirimi roso rosa qara coyeeti

   Batinye rosaano lowiidi dirimi rosi minira eˈannohu dureeyye woy maccare ikkate, woy amanyoote bainore assate ikkikkinni, uminsa heeshshonna alame woyyeessate yite ikkinota anfoommo. Togoo mixo bunshe diafidhino; ikkollana Yihowa Farciˈraasine tennera wole doogo doodhitino. Yesuusi gede ninkeno, woyyitino alame abbitannoti Maganu Mangiste calla ikkitinota ammanneemmo. (Maatewoosi 6:9, 10) Ikkirono, Maganu Mangiste dagge alamete qarra hunta geeshsha anga xaaxiˈne sammi yine ofollineemmo yaa diˈˈikkino. Hatteentenni, Yesuusi assinonte gede, ‘Maganu Gashshootiha Dancha Duduwo’ gobba baalate kulleemmo; konni garinni diru dirunku lowo kume ikkanno manni heeshsho woyyaabbanno gede kaaˈlineemmo. i—Maatewoosi 24:14.