Sijaara agate a daafira Qullaawu Maxaafi giddo borreessinoonniri dino. Ikkollana, manninatenke gawajjannorenna batte ikkino rosicho Maganu giwannota kulanno biddishshi Qullaawu Maxaafi giddo no; hakko daafira sijaara aga cubboho.

•   Heeshsho ayirrisa. “Heeshshonna foole . . . manna baalaho aannohu [Maganoho].” (Soqqamaasinete Looso 17:24, 25) Heeshsho Maganu uyinonke elto ikkitino daafira, dironke haransannore assa lawishshaho sijaara aga dihasiissannonke. Alamete aana lowo manni barriweelo reyanno gede kora ikkinohu qaru coyi giddo mittu sijaaraho.

•   Olliichonke baxa. “Olliichokki umikki gede assite baxi!” (Maatewoosi 22:39) Mannu noowa sijaara aga baxille diˈˈikkitino. Sijaaru wiliile duucha woyite eˈannonsa manna, sijaara aganno manna amadanno dhibbi amadansara dandaanno.

•   Qullaawa ikke heeˈra. “Mannimmaˈne lubbotenni noo kakkalo gede, Magano hagiirsiissannotanna qullaawa assitine [shiqishshe].” (Roomu Sokka 12:1) “Magano waajjatenni coˈonta qullaawoota ikkine manninatenna ayyaana batteessannori baaluwiinni umonke keereensiˈno.” (2 Qorontoosi 7:1) Sijaara aga mannu qullaawa woy keeraancho ikkannokki gede assitanno; korkaatuno sijaara aganno manni mannimmansa gawajjannori bisinsa giddora eanno gede assiˈranno.

 Maariwaana (wiidi woy poti yineno woshshinanni) woy wole hattoo xagga suˈmi Qullaawu Maxaafi giddo dino. Ikkollana, araado amaddannonke gede assitannota togoo xagga boohaarate yine adha gara ikkitinokkita buuxisanno biddishshi no. Aleenni laˈnummo biddishshuwano agurranna, aante noorino tenne buuxissanno:

•   Hedate dandoonke eemadha. “Mooticha Maganokki . . . woˈma hedokkinni baxi!’” (Maatewoosi 22:37, 38) “Bikkunni woy adawunni heedhe.” (1 Pheexiroosi 1:13, Haaro Gondooro) Mittu manchi jallaagishannore adhannoha ikkiro, hedate dandoosi eemadhe diafanno; isinni batinye manna togoo xagga araado amaddinonsa. Surrensa roore anga danchare ikkikkinni hattoo xagga afidhanno doogo heddanno.—Filiphisiyusi Sokka 4:8.

•   Gashshootu fushshino seera ayirrisa. ‘Gashshaanotenna roorrootaho owaattine hajajamme.’ (Tiito 3:1) Batinye gobbara, mite jallaagishshanno xagga adha hoolanno seeri no. Magano hagiirsiisa hasiˈneemmoha ikkiro, gashshaanote hajajama hasiissannonke.—Roomu Sokka 13:1.