Qullaawu Maxaafi, hanqu eemadha hoongiro meessano ledo noo mannano gawajjannota kulanno. (Lawishsha 29:22) Hanqa gara ikkitanno woyiti heeˈrara dandaannoha ikkirono, “hanqate” rosichi noonsari gato afidhannokkita Qullaawu Maxaafi kulanno. (Galatiyu Sokka 5:19-21) Qullaawu Maxaafi hanqo eemadhate kaaˈlanno biddishsha amadino.

•  Hanqa woˈmanka woyite soˈroteni?

•  Hanqa soˈro ikkitannohu mamooteeti?

•  Hanqo eemadha dandaattohu hiittoonniiti?

•  Hanqu daafira kultannota Qullaawu Maxaafi qummeeshshuwa

 Deeˈni. Mito woyite hanqineemmo gede assannonke coyi kalaqamara dandaanno. Lawishshaho, ammanamino manchi Nehimiya ammanate roduuwasi gadadinsoonnita macciishshiti ‘lowo geeshsha hanqino.’—Nehimiya 5:6.

 Maganuno hanqanno woyiti no. Lawishshaho, hunda mannisi iso calla magansiˈneemmo yee coyiˈrino qaale diige kaphu maganna magansiˈra hanafita Yihowa ‘lowo geeshsha hanqino.’ (Ejjeetto 2:13, 14) Ikkollana, Maganunnihu qaru akati hanqo diˈˈikkino. Isi hanqannohu mulla kae diˈˈikkino; qoleno hanqisi quwa afiˈrino.—Fulo 34:6; Isayaasi 48:9.

 Hanqa soˈro ikkitannohu, hanqonke eemadha hoongeemmo woyiteetinna gari korkaati nookkiha hanqineemmoha ikkirooti. Lawishsha:

•   Qaaeeli Maganu kakkalosi adha giwita “lowo geeshsha [giiramino].” Qaaeeli hanqisi lexxanni haˈrara wodhino daafira, rodoosi shaate deerra iillanno gede assinosi.—Kalaqama 4:3-8.

•   Masaalaanchu Yoonaasi, Maganu Nennewete manna maarinotera “lowo geeshsha [giiramino].” Maganu, Yoonaasi ‘hanqa hasiissannosikkitanna’ cubbinsara aagintaawinoha konne manna marara hasiissannosita kule seejjinosi.—Yoonaasi 3:10–4:1, 4, 11. a

 Kuni lamunku lawishshi, gari korkaati nookkiha hanqineemmoha ikkironna hanqonke eemadha hoongummoro, “mannu hanqi Maganu keeraanchimma afiˈnanni gede [assannokkita]” leellishanno.—Yaiqoobi 1:20.

•   Hanqu eemadha hoongiro, lowore daafannota huwati. Mitu mannira hanqe boolaqiˈra worbimma labbannonsa. Noore coyiˈniro kayinni, hanqo eemadha hooga jawaante ikkitukkinni laanfete. “Umosi qeelinokki manchi, huxxu diigameenna fano noo katami gedeeho.” (Lawishsha 25:28; 29:11) Hanqonke eemadha ronseemmoha ikkiro kayinni, tini addu worbimmanna wodancha noonketa leellishshanno. (Lawishsha 14:29) Qullaawu Maxaafi, “Katama qeele gashshino manchinni, umosi qeele galinohu rooranno” yaanno.—Lawishsha 16:32.

•   Hanqu batiˈre gedensaanni gaabbattore assatto deerra massahera albaanni eemadhi. Faarso 37:8 togo yitanno: “Bunshete giddora eessannohena, fooggaltooti; hanqonna giirama aguri.” Addanko, hanqineemmo woyite, maa assineemmoro doodha dandiineemmo; hanqu “bunshete giddora” eessinkekkinni agura dandiineemmo yaate. Efesooni Sokka 4:26, “Hanqitiniro, cubbo loossinoonte” yitanno.—Efesooni Sokka 4:26.

•   Hanqikki lexxanni noota huwatittoro, nootto bayichinni agurte haˈri. Qullaawu Maxaafi togo yaanno: “Coye kayisa, wayi gammala kurkure xullo fushshate ledo mittete; kunnira gibbo kaˈukkinni coyiˈransho aguri [“noottowiinni agurte haˈri,” Haaro Alame Tiro].” (Lawishsha 17:14) Kawa kaˈaa higino coye ranke hasaambe tira dancha ikkiturono, lamunku wodanaaˈmitine hasaawa dandiitinanni gede balaxxine gaˈlabbi yaa hasiissannoˈne.

•   Coye gudisse huwatate woˈnaali. Lawishsha 19:11, “Egenno mannaho cinca uyitanno” yitanno. Noo coye gudinse huwantummokkinni, kuni konneeti yaa hayyo diˈˈikkitino. Hixamanyine macciishshineemmohanna gura qiniite laˈneemmoha ikkiro, gari korkaati nookkiha dihanqineemmo.—Yaiqoobi 1:19.

•   Surrete salaame afiˈrate huuccatto assiˈri. Huuccatto, “mannu hedora aleenni ikkinohu Maganu keeri” heeˈrannohe gede kaaˈlitannohe. (Filiphisiyusi Sokka 4:7) Maganunniha qullaawa ayyaana afiˈneemmote qara doogga giddo mitte huuccattote; qullaawu ayyaani giddonke keeru, cincanna meessanaa qeeˈla heedhanno gede assanno.—Luqaasi 11:13; Galatiyu Sokka 5:22, 23.

•   Jaala ikkannohe manna qorophite doodhi. Roore woyite, ledo honseemmo manni faale haˈneemmo. (Lawishsha 13:20; 1 Qorontoosi 15:33) Qullaawu Maxaafi, “Hanqaaleessu manchi ledo jaaloontooti; aaramino manchi ledono hadhooti” yaannohu mulla diˈˈikkino. Mayira? “Hatto ikkittoro, isi ikkanno gari rosame, giddonni hoˈla giwannohe.”—Lawishsha 22:24, 25.