Qullaawu Maxaafi Darga Assiˈrino Dhibbi Waadannonsare Kaaˈlanno?
Qullaawu Maxaafi mayyaanno?
Ee kaaˈlanno. Maganu, dhiwantino soqqamaasinesi daafira hedanno. Qullaawu Maxaafi mittu ammanamino manchire kulanni togo yaanno: “Kaaliiqi dhiwame goxinowa heeˈreenna kaaˈlannosi; fayyimmano qolannosi.” (Faarso 41:3) Darga assiˈrino dhibbi waadannoheha ikkiro, aante nooti sase hedo cincite heeˈratto gede kaaˈlitahera dandiitanno:
Jawaante afiˈrate huuccatto assiˈri. Huuccatto assiˈrittoro, ‘mannu hedora aleenni ikkinoha Maganu keere’ afiˈratto; kuni keeri quwa saˈe yaadattokki gedenna dandiite heeˈratto gede kaaˈlannohe.—Filiphisiyusi Sokka 4:6, 7.
Dancha danchare hedi. Qullaawu Maxaafi togo yaanno: “Hagiirraamu wodani mannimmate fayyimma aanno; dadillaamu wodani kayinni mannimma maniissanno.” (Lawishsha 17:22) Haariintenna osoˈlite saˈˈate woˈnaali; hatto assakki yaaddotenni beya afiˈratto gede calla ikkikkinni fayyimmateno kaaˈlitannohe.
Albillittete hexxora noohe ammana kaajjishiˈri. Addu hexxo dhiwanu waadannoheha ikkirono, hagiirraamo ikkatto gede kaaˈlitannohe. (Roomu Sokka 12:12) Qullaawu Maxaafi ‘“Dhiwamoommo” yaannoha anfannikki’ yanna daggannota kulanno. (Isayaasi 33:24) Hatte yannara, Maganu yannanke sayinse mala afa dandiitinokkiha darga assiˈrino dhibba baalanka hursanno. Lawishshaho, Qullaawu Maxaafi geedhino manni wirro wedella ikkannota kulanni togo yaanno: “Manninaatisi bashshowa higanno; anje wolqasi galagalte daggannosi.”—Iyyoobi 33:25.
Qaagiishsha: Yihowa Farciˈraasine Maganu kaaˈlannonsata ammantannoha ikkirono, darga assiˈrino dhibbi amadannonsa woyite xagisiˈrate woˈnaaltanno. (Marq 2:17) Ikkollana, mitte xaginsanni ogimma bande kulle tini woyyitanno diyineemmo; togoo hajo lainohunni mittu mittunku manchi woyyannosire umisi doodha hasiissannosita ammanneemmo.