“Qullaawa Maxaafa nabbawate woˈnaaloomma; kayi jawa maxaafa ikkino daafira gude diafeemma yee hedoomma!”—Biriyaana

 Atino hatto yite hedde egennootto? Hatto ikkiro, kuni birxichi kaaˈlannohe!

•  Qullaawa Maxaafa nabbawa kaaˈlitannohehu hiittoonniiti?

•  Qullaawa Maxaafa ma garinni nabbawa dandaatto?

•  Darawokki yitinore

 Qullaawa Maxaafa nabbawa ceeˈmishshannota labbannohe? Hatto ikkiro, kuni dhagge ikkannore diˈˈikkino. Qullaawu Maxaafi ciiggaadda fidallanni borreessinoonniha, kumunni kiirranni qoola afiˈrinohanna mitte misileno nookkiha ikkino daafira, televizhiinenna viidiyo laˈˈate geeshsha baxisannokkiha lawahera dandaanno.

 Kayi hanni konni garinni hedate woˈnaali: Muxxe jiro worroonnita biˈree saaxine afiˈrittoro giddo mayi nooro laˈˈate diquqquxamatto?

 Qullaawu Maxaafi hattee muxxe jiro amaddino saaxine gedeeti. Qullaawu Maxaafi giddo konni woroonni noore assate kaaˈlitannohe hayyo no:

•   Danchare doodhate

•   Annikkinna amakki ledo sumuu yee heeˈrate

•   Dancha jaalla kalaqiˈrate

•   Yaachishannore dandee heeˈrate

 Kuni biˈree maxaafi yannankera togo kaaˈlankera dandaannohu hiittoonniiti? “Qullaawa Borro baala Maganunnihu Qullaawu Ayyaani kulanna [borreessinoonnita]” ikkitino daafiraati. (2 Ximootewoosi 3:16) Hatto yaa Qullaawu Maxaafi giddo noo amaale borreessinanni gede assinohu Woˈmunkura Aliidi Kalaqaanchooti yaate.

 Tenne assa dandaattoti mitte doogo, Qullaawa Maxaafa qaccetenni qaccete geeshsha nabbawate. Hatto assakki, Qullaawu Maxaafi xaphoomunni mayi daafira kulannoro afate kaaˈlitannohe. Qullaawa Maxaafa nabbawa dandaattoti addi addi doogga no. Hanni lame lawishsha laˈno:

•    Qullaawu Maxaafita 66nta maxaaffa aantensa garinni, yaano Kalaqamu maxaafinni kayisse Ajuujate maxaafi geeshsha nabbawa dandaatto.

•    Qullaawa Maxaafa diru aante garinni yaano xaggete giddo kulloonni ikkito woˈmitino aante garinni nabbawa dandaatto.

 Kaaˈlitanno amaale: Maganu Qaale Xiinxalli yitanno borrora “Yesuusi Uulla Noo Waro Ikkitinota Qara Qara Coyibba” yaannohu aante aantete fulino birxichi hunda, Yesuusi uullate aana heeˈrino waro assinoha qara qara coye aantensa garinni kulloonni.

 Layinki doogo, qarra ikkinohe coyi ledo xaadooshshe afidhinota Qullaawu Maxaafi xagge doorte nabbawi. Lawishshaho:

•   Addaxxatto jaalla kalaqiˈra hasiˈratto? Hatto ikkiro, Yoonaataaninna Daawiti xagge nabbawi. (1 Saamueeli fooliishsho 18-20) Tenne xagge giddo, Yoonaataani Daawiti baxanno gede assitinota Daawitita dancha akatta wodanchate woˈnaali.

•   Albinni roore busha coye giwattoha ikka hasiˈratto? Yooseefi fonqolo qeele saino gara kultanno xagge nabbawi. (Kalaqama fooliishsho 39) Tenne xagge nabbawatto woyite, Yooseefi bushare giwate jawaante afiˈrinohu ayewiinniitiro wodanchate woˈnaali.

•   Huuccatto assiˈra kaaˈlitannohe gara afa hasiˈratto? Nehimiya xagge nabbawi. (Nehimiya fooliishsho 1 nna 2) Tenne xagge giddo, Nehimiya assiˈrino huuccatto mageeshshi wolqa afidhinoro leellishshanno taje huwatate woˈnaali.

 Kaaˈlitanno amaale: Qullaawa Maxaafa nabbawatto woyite, nabbawattore illachisha dandaatto gede cancu nookkiwa nabbawi.

 Sayikkihunni, mitte Qullaawu Maxaafi xagge woy faarso doorte nabbawi; hakkiinni nabbawoottori heeshshokkira kaaˈlannohe gara hedi. Nabbawittohu gedensaanni ateneeto aante noo xaˈmuwa xaˈmi:

•    Yihowa tenne hedo Qullaawu Maxaafi giddo borreessinanni gede assinohu mayiraati?

•    Tenne hedonni Yihowanna doogosi daafira maa roseemmo?

•    Tenne hedo heeshshoˈya giddo loosu aana hosiisa dandeemmohu hiittoonniiti?

 Kaaˈlitanno amaale: Mixo fushshiˈri! Webisayitenke aana noota Qullaawu Maxaafi Niwaawe Pirogiraame horoonsidhe Qullaawa Maxaafa nabbawa hanafatto barra borreessiˈri.