Jaallakki gudisante dagoomittete miidiya horoonsidhannoha, hattono duucha woyite tenne calla hasaabbannoha ikkara dandaanno. Insa atera togoo akkawunte noohekki daafira arrassitannoheha nafa ikkara dandaanno. Tenne hajo daafira afa hasiissannoheri maati? Qoleno maa assa dandaatto?

 Horoonsiˈrattokkihu diate callaati. Batinyu annuwinna amuuwi oosonsa dagoomittete miidiya horoonsidhannota hooltanno. Insa hooltannohu miidiya horoonsiˈra konni woroonni noo qarra afidhinota affino daafira ikkara dandaanno:

•   quwa saˈino yaaddonna wole surrete qarra

•   teeda baˈino misilla, maaeela sokkanna misilla, hattono interneetete widoo siˈannore

•   jaallate mereero coyi kawa kaˈaa higa

 Batinyu wedellooti dagoomittete miidiya horoonsiˈra uminsa agurtino. Kuri wedellooti miidiyu kaaˈlantenni roore gawajjanni noonsata uminsa huwattino. Hanni mitu wedellooti lawishsha laˈno:

•   Pirisilla yinanni wedellitte, dagoomittete miidiyi roore hasiisanno coyira horoonsidhanno yanna gudanni nooseta wodanchitino.

•   Jeremiy yinanni beetti, dagoomittete miidiya faˈnanno woyite teeda baˈino misilla fatalakki yite dagganni waaddannosi; tenne hooˈlano gooddo ikkitinosi.

•   Betaaniy yinanni beetto dagoomittete miidiyi wolootu assitannore quwa saˈe heddanno gede assinose.

 “Dagoomittete miidiya faˈneemma appilikeeshiine hunoomma; hawalleno hunumma. Hunaˈyanni digaabbeemma. Xa roore hasiisannoe coyira albinni roore yanna afiˈroomma daafira tashshi yiinoe.”—Siyera.

 “Dagoomittete miidiyi araado ikkanno garanna wolootu miidiyu aana fushsheemmare lae coyiˈrannorira yaadeemma gara dibaxoomma. Akkawunteˈya huna shota diˈˈikkitinoe; kayi hunummati bayichonko harshammo afiˈroomma. Xa dagoomittete miidiya horoonsiˈreemmakki daafira, roore salaame afiˈroomma.”—Kaati.

 Annikkinna amakki wodho ayirrisi. Hanqo woy gunguma giwatenni, annikkinna amakki fushshino wodho ayirrisattohanna gikki yoottoha ikkakki affanno gede assi.

 Qullaawu Maxaafi biddishsha: “Gowwu manchi hanqosi gudise leellishanno; egennaamu kayinni aarasi cincatenni sayisanno.”—Lawishsha 29:11.

 Mitootu dagoomittete miidiya annakkinna amakki maaxante horoonsiˈratto gede woy ewelummakki bande anfannikkita baxxitino akkaawunte kalaqiˈratto gede amaaltahera dandiitanno. Hatto assa kayi soˈrote! Mooraanchu gede maaxantanni heeˈrattoha ikkiro, roore yaadatto woy tiiˈˈikki bushiishannohe. Qoleno tenne annikkinna amakki iille afino barra, qarru giddo uwatto; insara layinkimeeshsho ate ammana qarra ikkitannonsa.

 Qullaawu Maxaafi biddishsha: “Baalunku coyira ammanammoommore ikkine heeˈra hasiˈneemmo.”—Ibiraawoota 13:18, Haaro Alame Tiro.

 Umikki murcidhe qaafo adhi. Aleenni qummi assini wedelli gede, atino dagoomittete miidiya horoonsiˈra aguratto gede assannoheha batinye korkaata hedattoha ikkara dandaanno. Dagoomittete miidiya horoonsiˈrakki gawajjitanni nooheti xabbe leeltuhero, annikkinna amakki yitinohe daafira calla ikkikkinni ati umikki murcidhe horoonsiˈra facci assite aguri. Hatto ikkiro, darawokki mayira aguritto yitannohe woyite komo komo diyaatto; insano hakkeya diarrassitannohe.

 Qara hedo: Annikkinna amakki wodho ayirrisi; qoleno insa yiinohehura calla ikkikkinni ati umikkinni baxxe qaafo adha dandaatto gede, insa hedo ledo sumuu yaatto gede assannohere hedate woˈnaali. Dagoomittete miidiya albillitte horoonsiˈrattoha ikkara dandaanno; xaara kayinni isiweelo heeˈra dandaatto.