Tini Alame Baˈaraati?
Qullaawu Maxaafi alamete goofimarchi daafira kulannota afoottoha ikkara dandaanno. (1 Yohaannisi 2:17) Hatto yaa kayinni mannu sirchi uullate aaninni coˈo yee baˈˈanno yaateni? Baattonke mitturino nookkita mullicho ikkitakka? Woy woˈmunni woˈma baˈakka?
QULLAAWU MAXAAFI TENNE XAˈMUWARA DEEˈNI YEE QOLANNO!
Baˈˈannokkiri Maati?
MANNU SIRCHI
Qullaawu Maxaafi yaannore: Maganu baatto “kalaqinosehu fano heedhara ikkikkinni, mannu heeˈranno gedeeti.”—ISAYAASI 45:18.
BAATTO
Qullaawu Maxaafi yaannore: “Ilama saˈeenna ilama riqiwantanno; kalqe [“baatto,” NW] kayinni noowa heedhanno.”—ROSIISAANCHO 1:4.
HATTO YAA MAYYAATE? Qullaawu Maxaafi kulanno garinni, baatto horonta dibaˈanno; hattono mannu oosora qae ikkite heedhanno. Ikkina alamete goofimarcho yaa mayyaateyya?
HANNI TENNE HEDI: Qullaawu Maxaafi tenne alame goofimarcho Nohi waro ikkinori ledo heewisiisanno. Nohi waro baatto ‘barshu woˈminota’ ikkitino. (Kalaqama 6:13) Ikkirono, Nohi keeraancho manchooti. Hakko daafira Maganu Nohinna maatesi gatise, busha manna kayinni wayinni gudino. Qullaawu Maxaafi hakkawaro ikkinore kulanni, “Hatte yannara noo alame wayinni egemmante baˈino” yaanno. (2 Pheexiroosi 3:6, NW) Addanko, hakku hatte yannara noo alame goofimarchooti. Ikkina hakkawaro bainori maati? Baattote aana noohu bushu mannilla baino ikkinnina baatto dibaˈino. Hakko daafira, Qullaawu Maxaafi alamete goofimarcho yaannohu baatto baˈannota kulate diˈˈikkino. Hatteentenni uullate aana noohu bushu manninna bushu coyi baˈˈannota kulateeti.
Baˈˈannori Maati?
QARRUNNA BUNSHE
Qullaawu Maxaafi yaannore: “Bushuullu shiima yannalla keeshshitanno; dargaho laˈe hoogatto. Shaqqaddu kayinni baatto ragidhanno; atootenna keere afidhe hagiidhitanno.”—FAARSO 37:10, 11.
HATTO YAA MAYYAATE? Nohi waro dayihu Baote Wayi bunshe hegerera dihunino. Baote Wayi gedensaanni, bushu manni mannu heeshsho wirro qarraataame assino. Muli yannara kayinni, Maganu bunshe baala hunanno. Faarsaasinchu yiinonte gede, “Bushuullu shiima yannalla keeshshitanno.” Maganu Mangistesi widoonni bunshe baala hunanno; Maganu Mangiste owaata mannu ooso gashshannoho iimi gashshooteeti.
HANNI TENNE HEDI: Xaa yannara uulla gashshite noori Maganu Mangistera halanta ikka? Qullaawu Maxaafi halantannokkita kulanno. Insa beebba Maganu Mangistera finqiltanno. (Yohaannisi Ajuuja 19:19) Hakkiinni mayi ikkannoyya? Maganu Gashshooti mannu gashshoote baalanka hune, “isi kayinni hegerera kaajje heeˈranno.” (Daanieeli 2:44) Kayinni mannu gashshooti baˈˈa hasiissannosihu mayiraati?
Mannu Gashshooti BAˈˈA HASIISSANNOSI
Qullaawu Maxaafi yaannore: “Haˈrinshosino mannu umisi qineessiˈre [didandaanno].”—ERMIYAASI 10:23.
HATTO YAA MAYYAATE? Mannu kalaqaminohu uminsa umonsa gashshara diˈˈikkino. Hakko daafira, mannu manna gashshe diafanno hattono qarransa uminsa tidha didandaanno.
HANNI TENNE HEDI: Biritaanika Akaademik yinanni maxaafi, mangistubba “buxima, hude, dhibba, kalaqamu dano, hattono olanna wole finqille hoola” dandiitinokkita xawisino. Hakkiinni lede togo yaanno: “Mitootu . . . togoo qarra tira dandaannohu alame woˈma gashshannoho mitto gashshooteeti yitanno.” Ikkollana, mannu gashshooti gudisame sumuu yee mitto ikkiro nafa, xaano alame gashshannohu guuta ikkinokki mannaantilla; hakko daafira aleenni kulli qarra tira didandaanno. Alame woˈmate noo qarra hegerera huna dandiitannoti Maganu Mangiste callate.
Konni daafira, Qullaawu Maxaafi kulanno garinni, tenne busha alame goofimarcho danchu manni waajja dihasiissannonsa. Hatteentenni, hattee yanna quqquxamme agadhineemmo; mayira yiniro, hakkawoyite tini anganni fultinoti akkala alame baˈeenna, Maganu abbannoti kaajja haaro alame dagganno!
Kuni baalu ikkannohu kayi mamarooti? Aananno birxichira Qullaawu Maxaafi tenne xaˈmora qolanno dawaro laˈneemmo.
Kurino Lai
AGAROOSHSHU SHAE
“Goofimarcho”—Yaa Mayyaate?
Qullaawu Maxaafi “goofimarchu” daafira kulannori dancha duduwo ikkinota afootto?
QULLAAWU MAXAAFI XAˈMONNA DAWARO
Albillitte Baatto Baˈanno?
Qullaawu Maxaafi kulannori dhagge ikkahera dandaanno.
QULLAAWU MAXAAFI XAˈMONNA DAWARO
Armagedooni Oli Maati?
Armagedooni yaanno qaali Qullaawu Maxaafi giddo mitto bayicho calla no; konni oli daafira kayinni duucha basera kulloonni.
QULLAAWU MAXAAFI XAˈMONNA DAWARO
Nohinna Baote Wayire Kultanno Xagge Maattote?
Qullaawu Maxaafi, Maganu hunda bushuulle hunate Baote Waa dirrisinota kulanno. Qullaawu Maxaafi kulanno taje, Maganu ayyaaninni borreessinoonni Maxaafa ikkinota leellishshannohu hiittoonniiti?
