Jaalanke surrete dhibbi waadannosi woyite kande amandeemmori baˈˈankera dandaanno. Ikkollana amaddinosi xisso dandee heeˈranno gede kaaˈline isi daafira hendeemmota leellisha dandiineemmo. Hiittoonni?

‘Macciishshate rahoottoha ikki.’—YAIQOOBI 1:19.

Jaalakki kaaˈla dandaattote qara doogga giddo mitte, isi hasaaphanno woyite seekke macciishshate. Isi coyiˈranno coyira baalaho dawaro qola hasiissannohehu gede assite heddooti. Coyiˈrannore macciishshitanni noottota afanno gede assi; hattono mararattosita leellishi. Qarrasi huwatate woˈnaali; hattono isi togooho yaate muddantooti. Isi hedikkinni gedensoonni gaabbannore coyiˈrara dandaannota deˈooti.—Iyyoobi 6:2, 3.

“Waajjaleeyye [“yaaddinore,” Haaro Alame Tiro] jawaachishshe.”—1 TESELONQE 5:14.

Jaalikki yaadara woy ditidhoommoho yee hedara dandaanno. Mayite coyiˈrattoro afa hoogittoro nafa, isi daafira hedattota kulittosiro sheshifataranna jawaatara dandaanno.

“Jaalu woˈmanka woyite jaalaholla; roduuno qarru barra iillanno.”—LAWISHSHA 17:17.

Mitore assite kaaˈlisi. Kaaˈleemmosi gara afoommo yite hedantenni, maa assine kaaˈlinasira hasiˈrannoro iso umosi xaˈmi. Jaalikki mayi hasiisannosiro  kuˈla qarra ikkitusiro, mitteenni mitore assa lawishshaho fultine lekkatenni milli yaa dandiitinannita kulisi. Woy mitore hirte abba, mine feya, woy wole looso loosse kaaˈla dandaattota kulisi.—Galatiyu Sokka 6:2.

“Manna baala dandee.”—1 TESELONQE 5:14.

Jaalikki hasaawa hasiˈrannokki yanna heedhara dandiitanno. Hakko daafira isi coyiˈra hasiˈranno woyite hasaaphannore macciishshate qixxaawoottoha ikkoottota kulisi. Jaalikki dhiwannosi daafira xissiisannohere coyiˈrara woy assara dandaanno. Isi dinyeˈne barra sayisara woy hifatamara dandaanno. Iso kaaˈlannore assatto woyite cinci, hattono qarrasi huwatate woˈnaali.—Lawishsha 18:24.

“Jaalaˈya hasidhannoe yanna baalantera noommaseta affara hasiˈreemma. Qarrase tira dandeemmakkiha ikkirono, woˈmanka woyite ise hasaaphitanna macciishshate woˈnaaleemma. Mito woyite hasaaphitanna macciishshannoha afiˈrase calla beedho afidhanno gede assitannose.”—Sagale giwisannose gede assitannoti quwa saˈino yaaddo waaddannose jaala nooseti Feera. a

“Jaalaˈya giddo mitte roore shaqqadotenna manna jawaachishshannote. Ise minisera woshshite dancha sagale koyissinoe. Ise baxillenna shaqqille leellishshinoe daafira, giddoˈyata fushshe hasaapha shota ikkitinoe. Tini qolte baasa jawaachishshinoe!”—Quwa saˈino yaaddo waaddannoseti Hayuuni.

“Cinca lowo geeshsha hasiissannote. Minaamaˈya koffi assannoe coye assitanno woyite, ise hatto assitinohu dhiwannose daafiraati ikkiina busha ikkitino daafira diˈˈikkino yee hedeemmo. Tenne qaagaˈya hanqeemmosekki gedenna shaqqille leellisheemmose gede kaaˈlitinoe.”—Quwa saˈino yaaddo waaddannose minaama noosihu Jeekoobi.

“Minaamaˈya lowo geeshsha kaaˈlitannoe hattono jawaachishshannoe. Yaaddo lowo geeshsha waaddannoe woyite, ise assa hasiˈreemmokkire asseemmo gede horo dixixxiibbannoe. Hatto yaano ise mito woyite assa baxxanno coye nafa anera yite agurtanno woyiti no. Ise umise horo agurtannotanna shaqqado ikkitino daafira ise geya ikkannoehu dino.”—Yaaddo waaddannosihu Eniriiko.