QULLAAWU MAXAAFI SAYINSETE MAXAAFA IKKA HOOGIRONO, SAYINSETE LEDO XAADOOSHSHE AFIˈRINORE KULANNO WOTE SAYINSE XIINXALLITE AFFARA ALBAANNI BALAXE GARA IKKINORE KULANNO. HANNI MITO LAWISHSHA LAˈNO.

Kalqete alamera kaimu no?

Alba sayinsete fullahaano ‘Kalqete alamera kaimu dino’ yite ammantanno. Xa kayinni roore sayinsete fullahaano kalqete alamera kaimu noota huwattino. Qullaawu Maxaafi kalqete alamera kaimu noota kulinohu hundaati.​—Kalaqama 1:1.

Wayi doyicho

Hunda mannu wayi doyicho afikki keeshshino. Ikkollana Qullaawu Maxaafi lowo diri albaanni wayi doyichore kulino. Togo yaanno: “Wayi baalu lolahe baara eanno; baaruno horonta diwoˈmanno. Wayi galagale fulino dargira higanno.”​—Rosiisaancho 1:7.

Yanna saˈanno wote xafarete bissa baˈanno?

Shoolki sani K.A. heeˈrinohu Giriikennihu sayinsete fullahaanchi Aristootili, yanna saˈanno wote sholannori woy baˈˈannori baattote aana noore calla ikkinotanna beeddahe woˈmitino gordi kayinni horo soorrammannokkita woy baˈˈannokkita rosiisino. Mannu konne roso lowo diro ammane keeshshino. Ikkollana 19^ki sanira sayinsete fullahaano entirophii yinanni roso kalaqqino. Kuni rosi, xafarete bissano ikko baattote anna noori soorramannota woy baˈˈannota xawisannoho. Tenne hedo ammantannori sayinsete fullahaano giddo mittu Loordi Keelvinni yinannihu, Qullaawu Maxaafi iiminna uulla “uddanote gede akkaltanno” yaannota coyiˈrino. (Faarso 102:​25, 26) Keelvinni Maganu kuri coyibba baˈˈansanni kalaqamisino baˈˈannokki gede assa dandaannota kulino; Qullaawu Maxaafino tenne rosiisanno.​—Rosiisaancho 1:4.

Baattonna wole pilaaneetta tuuqe amadinori maati?

Aristootili ‘Xafarete bissa hincilaallote gedee doyicho giddo no; mitte mittenti tiˈi teˈee doyissite heedhanno, baatto qolte giddoyidi kifilera no’ yee rosiisino. Ikkollana sayinsete fullahaano 18^ki sani, K.A. beeddahenna pilaaneetta mitturino tuuqinori nookkiha rarraˈe heedhannota buuxxino. Kalaqaanchu ‘baatto mulla darga rarraasinota’ 15^ki sani K.A. Iyyoobi maxaafira borreessinoonni.​—Iyyoobi 26:7.

QULLAAWU MAXAAFI HIKKIMINNU MAXAAFA IKKA HOOGIRONO, FAYYIMMANKE AGADHINEEMMO GARA KULANNO.

Xiwamino manni addinni heeˈranno gede assa.

Muse Seeri dhiigu amadino manchi mannuwiinni baxxe heeˈranno gede kulanno. Akimootu tenne huwattinohu 700 diri albaanni taraawanno dhibbi manna gawajji yannaraati; kuni biddishshi xaa yannarano kaaˈlannoho.​—Leewaawoota fooliishsho 13 nna 14.

Reeshsha kinsiro anga hayishshiˈra.

Akimootu 19^ki sani geeshsha reeshsha amaddino anga hayishshidhukkinni wole manna xagissanni keeshshitino. Tini lowo manni reyanno gede assitino. Muse seeri kayinni reeshsha kisino manchi battaawannota kulanno. Isinni hakko manchi keeraawate uduunnesinna bisosi hayishshiˈra hasiissannosi. Kuni ammaˈnote seeri fayyimma agadhate lowo geeshsha kaaˈlino.​—Kiiro 19:​11, 19.

Ishine huna.

Diru kiiro onte xibbe kume saˈˈanno qaaqquulli deeu dhibbinni reyanno; kuri qaaqquulli giddo rooru reyannohu mullawa ofollinoonnite lowo shuma ledo xaadooshshe afiˈrinorinniiti. Muse Seeri shumate mannu heeˈrannowiinni xeertiˈne ofollinanni gedenna shumate ofollini gedensaanni umme bushsha aanaho gannanni gede kulanno.​—Marro 23:13.

Qaaqquulle barcinshiinshanni yanna.

Maganu Seeri labbaa qaaqqo ilamihunni settita barcinshiisha hasissannota kulanno. (Leewaawoota 12:3) Mittu muru qaaqqira bisosi murranni wote mundee rakke uurritannohu ilamihunni mitte lamala gedensaanni ikkinota buunxoonni. Xa noo gedee hikkiminni nookki yannara, labbaa qaaqqo mitte lamala ikkisi gedensaanni barcinshiinshanni gede kulannohu Qullaawu Maxaafi biddishshi qaaqquulleho lowo agarooshshe ikkino.

Surretenna ordu fayyimma mereero noo xaadooshshe.

Akimootunna sayinsete fullahaano hagiiru, hexxo, galatanna wolootaho gatona yaa ordu fayyimmara kaaˈlitannota coyidhanno. Qullaawu Maxaafino togo yaanno: “Hagiirraamu wodani mannimmate fayyimma aanno; dadillaamu wodani kayinni mannimma maniissanno.”​—Lawishsha 17:22.