Yihowa togo yee qaale eino: ‘Xaate wiˈla, xisso, dhbbunna reyo diheedhanno. Mannu albinni hindiiddo baala feyemmo. Alba ikkinoha busha coye baala hambanni.’

Yihowa Addaaminna Heewani keerunni hagiidhanni heeˈranno gede Edenete kaashshu basera worinonsa. Insa iimi Annansa magansiˈranna ooso ilte uulla woˈmitanno gede assa hasiissinonsa. Addaaminna Heewani Yihowara hajajama giwino; ikkirono, Yihowa hedinore diagurino. Konni maxaafira, Yihowa coyiˈrinori baalu woˈmannota ronsoommo. Isi Abirihaamira qaale eino garinni, Mangistesi uullate atoote abbitanno.

Mulenni, Sheexaanu, agaanintesinna bushu manni baalu baˈˈanno. Mannu baalu Yihowa magansiˈranno. Hatte yannara dixiwammeemmo woy direyineemmo. Barru baala gonxoommowiinni  hagiidhinanni kaˈneemmo. Uulla gannate ikkitanno. Manna baalaho dancha sagalenna danchu mini heeˈrannonsa. Mannu finqilanna busha ikka agure, shaqqado ikkanno. Moyichu ninke diwaajjanno, ninkeno insa diwaajjineemmo.

Yihowa reyino manna kayisanno woyite hagiirru woˈmanno. Abeeli, Nohi, Abirihaami, Saara, Muse, Ruuti, Asteeri, Daawitinna wolu alba reyino manninni xaandeemmo. Insa ninke ledo uulla gannate assitanno. Hatte yannara lowohu hagiirsiisanno loosi heeˈranno.

Yihowa ati hakko heeˈrattora hasiˈranno. Hatte yannara Isi daafira albinni roore afatto. Konni daafira, xaano ikko hegere geeshsha barru baala Yihowawa shiqqi yino!