Yesuusi dhiwantinore hursinoha calla ikkikkinni reyitinoreno kayisino; hattono bubbenna dambalu sammi yaanno gede assino. Yesuusi ilaalu aana huuccatto assiˈre kae Galiilu Baara laˈˈanno woyite hombobalatte kaˈe no. Soqqamaasinesi yowolote giddo heedhe, bubbe gargadhate sharrantanni no. Hakkiinni Yesuusi ilaalu aaninni dirre wayi aana haˈranni yowolonsawa mari. Soqqamaasinesi wayi aana haˈranni nooha laˈe lowo geeshsha waajjitu. Yesuusi kayinni ‘Aneetina waajjitinoonte’ yiinsa.

Pheexiroosi, ‘Mooticha, ateetiro atewa dayeemmo gede fajjie’ yii. Yesuusi Pheexiroosi ‘Amo’ yiisi. Konni daafira Pheexiroosi yowolotenni dirre, wayi aana haˈranni Yesuusiwa hige mari. Ikkollana, Pheexiroosi Yesuusiwa shiqqi yiiti dambala lae waajji. Isira wayi giddo itamannoha lawinosi. Hakko daafira, ‘Mootichaˈya gatisie!’ yee raari. Yesuusi angasi amade, “Ati ammana xeˈinohehu, mayira huluullamitto?” yiisi.

Yesuusinna Pheexiroosi yowolo gidditanni heedheennanni dambalu uurri. Hatte yannara Yesuusi soqqamaasine mageeshshi geeshsha hagiidhitinoha lawannohe? Insa “Halaalinta ati Maganu Beettooti” yitu.

Yesuusi dambalu sammi yaanno gede assinohu tenne yannara calla diˈˈikkino. Wole woyiteno, Yesuusinna soqqamaasinesi baaru aana yowolotenni hadhanni heedheenna, Yesuusi yowolote giddo badheenni haˈre goxi. Isi goxe heeˈreenna, wolqaataamu dambali kai. Dambaluno yowolote daye gaˈnanna yowolote giddo wayi woˈmi. Soqqamaasine Yesuusa goxinowiinni kayisse, ‘Rosiisaancho, reyinummona gatisinke!’ yite raartu. Yesuusi goxinowiinni kae baara ‘Sammi yii’ yee hajaji. Bayichonko bubbenna baaru sammi yii. Yesuusi soqqamaasinesi, ‘Ammana ajjinoˈne’ yiinsa. Insa mimmitoho, ‘Isira bubbenna baaru nafa hajajamannosi’ yitu. Soqqamaasine woˈmunni woˈma Yesuusa ammanturo, mitturino waajjishannonsakkita huwattino.