Bitima
“Ammanatenninna cincatenni Maganu uyino hexxo ragiˈranno manni faale [hadhe].”—IBIRAAWOOTA 6:12, NW.
1, 2. Mittu woradu aliidi laˈˈaanchi Qullaawu Maxaafi giddo kulloonniha ammanamino manna ma garinni laˈˈanno? Insa dancha jaalla ikkitankera dandiitanno yineemmohu mayiraati?
MITTE rodoo, mittu jawu woradu aliidi laˈˈaanchi lallawo shiqishanna macciishshituhu gedensaanni togo yitino: “Qullaawu Maxaafi giddo kulloonni mannire coyiˈranno woyite, lowo diro egennino jaallasi gede asse coyiˈranno.” Hatto yaase garankolla; mayira yiniro, kuni rodii Maganu Qaale lowo diro xiinxallanninna rosiisanni keeshshino daafira, Qullaawu Maxaafi giddo kulloonniri ammanantino labballinna meenti isira lowo diro ledo heeˈrino jaallasi gedeeti.
2 Qullaawu Maxaafi giddo kulloonnihu batinyu manni dancha jaalla ikkannonkeha dilawannohe? Ati konne manna seekkite egennootto? Togoo manni ledo lawishshaho Nohi, Abirahaami, Ruuti, Eeliyaasinna Asteeri ledo roore egennamate insa ledo hasaabbanni hosoottoro hiitto hagiidhattoro hanni hedi. Kuri Maganu soqqamaasine amaaltannohe amaalenna jawaachishshannohe gari mageeshshi geeshsha kaaˈlannohero heda dandaatto!—Lawishsha 13:20 nabbawi.
3. (a) Qullaawu Maxaafi giddo kulloonnihu ammanamino manni xagge rosanke kaaˈlitannonkehu hiittoonniiti? (b) Aanchine hiikkuri xaˈmuwa laˈneemmo?
3 “Maganu . . . keeraano reyotenni kayisanno” woyite, insa ledo xaande jaalooˈmineemmo faro afiˈneemmo. (Soq. 24:15) Ikkollana, xa nafa Qullaawu Maxaafi giddo kulloonni labballinna meentire rosanke lowore kaaˈlitannonke. Hiittoonni? Soqqamaasinchu Phaawuloosi tennera assa hasiissannonkere kulanni togo yiino: “Ammanatenninna cincatenni Maganu uyino hexxo ragiˈranno manni faale [hadhe].” (Ibi. 6:12, NW) Ammanaminohu Maganu manni xagge xiinxallinammora albaanni, hanni Phaawuloosi coyiˈrinori ledo xaadooshshe afidhinota mite xaˈmuwa laˈno: Ammana maati? Ammana hasiissannonkehu mayiraati? Hundi waro heeˈrinohu ammanamino manni faale haˈra dandiineemmohu hiittoonniiti?
Ammana Maati? Hasiissannonkehu Mayiraati?
4. Batinyu mannira ammanate yaa maa labbannonsa? Insa sodhino yineemmohu mayiraati?
4 Ammana, konni maxaafira xaggensa xiinxallineemmo manni lowo geeshsha naadannoho kaajja akataati. Yannankera batinyu manni addu ammana maatiro diafino; insara ammanate yaa taje nookkiha mulla haafa yine ammana labbannonsa. Hatto yee hedansa kayi soˈrote. Addu ammana mitto coye taje nookkiha haafa yine ammana diˈˈikkitino; qoleno mulla iibbabbine ammanano diˈˈikkitino. Taje nookkiha haafa yine ammana gawajjitanno. Mulla iibbabbine ammanano geeddannota diˈˈikkitino; isinni Maganu noota ammana calla nafa diguddanno; mayira yiniro, “hattenne durriisuno ammananno; waajjeno huxiˈranno.”—Yai. 2:19.
5, 6. (a) Ammana laˈˈa dandiineemmokkiha hiikkonne lame coye amaddino? (b) Ammananke mageeshshi geeshsha kaajjado ikka hasiissannose? Lawishshunni kuli.
5 Addu ammana hakkii saˈinote. Hanni Qullaawu Maxaafi ammanate yaa mayyaate yaannoro wodanchi. (Ibiraawoota 11:1 nabbawi.) Phaawuloosi, ammana laˈˈa dandiineemmokkiha lame coye amaddinota coyiˈrino. Mittu, ‘illete leellannokkiho’ xa noo coyeeti. Ayyaanu alamera noore lawishshaho, Magano Yihowa, Beettosi woy xa gordoho gashshite noota Maganu Mangiste maalu illenkenni laˈˈa didandiineemmo. Layinkihu, xaara woˈminokkiho “hexxotenni agadhinoonni” coyeeti. Maganu Mangiste muli yannara abbitannota haaro alame xa laˈˈa didandiineemmo. Hatto yaa kayinni, xa nooha illete leellannokki coyenna hexxotenni agadhine heeˈnoommo coye ammananke taje dinoote yaate?
6 Deeˈni, hatto yaa diˈˈikkitino! Phaawuloosi addu ammana kaajjado safo afidhinota xawisino. Isi ammanate yaa “hawaqiˈrate” yee borreessino qaale, “jajju meessiha ikkinota leellishannoha tajete woraqata” yineno tira dandiinanni. Hanni mittu manchi mine aahera kaino yine hendo. Isi minunniha tajete woraqata atera aanni, “Hiiˈˈi minekki” yaahera dandaanno. Hatto yaasi hige hakkuyi woraqati aana galatto yaasi diˈˈikkitino; kayi higge affinohu hakku tajete woraqati minu xaate ateha ikkinota buuxisannoha ikkino daafira, woraqatu umisi mineho yaa dandiinanni. Hatteente gede, ammananke kaajjadonna ammansiissanno taje noota ikkitino daafira, addu ammana heedhunkero ammannoommo coye laˈnoommohu gede assine kiirreemmo.
7. Addu ammana maati?
7 Hakko daafira, addu ammana kaajjado taje afiˈne hawaqiˈratenna Magano Yihowa seekkine anfe horo huluullama hoogate. Ammana Yihowa baxillaanchu Anninke gede assine laˈneemmo gedenna uyino hexxo baalanti woˈmase gattannokkita addaxxineemmo gede assitannonke. Kayi addu ammana hakkiino saˈanno. Heeshshote kalaqami gede, ammana baˈannokki gede towaaxxa hasiissannonke. Ammananke loosunni leellisha hasiissannonke; hakkuyi kaˈa reyitanno.—Yai. 2:26.
8. Ammana lowo geeshsha hasiissannota ikkitinohu mayiraati?
8 Ammana togo hasiissannota ikkitinohu mayiraati? Phaawuloosi ammana lowo geeshsha hasiissannohu mayiraatiro xawisino. (Ibiraawoota 11:6 nabbawi.) Ammana hooggunkero, Yihowawa shiqano iso hagiirsiisano didandiineemmo. Ninke mannu ooso kalaqammoommohu iimi Anninkewa Yihowawa shinqeemmo gedeetinna isi ayirranno gede assinammoraati; kuni ikkannohu kayinni ammana heedhunkero callaati.
9. Yihowa ammana lowo geeshsha hasiissannonketa afinota leellishinohu hiittoonniiti?
9 Yihowa ammana mageeshshi geeshsha hasiissannonkero afino; hakko daafira, ammana lossiˈneemmonna leellinsheemmo gara rosate kaaˈlannonke lawishsha uyinonke. Isi Kiristaanu songo giddo albisa ikkite soqqantannore ammanantino labballo oye maassiˈrinonke. Qaalisi, “Ammaˈnatenni insa labbe” yaanno. (Ibi. 13:7) Yihowa wolereno qixxeessinonke. Phaawuloosi ‘batiˈru gomichi gede ikkitino naqaashshe’ daafira, yaano ammanatenni kaajja lawishsha ikkannohu hundi waro heeˈrino labballinna meentire borreessino. (Ibi. 12:1) Phaawuloosi Ibiraawoota fooliishsho 11 aana, ammanamino manna baalanka kulino yaa diˈˈikkino. Qullaawu Maxaafi giddo, tenne ammana nookki yannara dancha lawishsha ikkannonkehu batinyu manniti addu xagge no; kuri labballinna meenti dirinsanna heeshshonsa gari babbaxxinoha ikkirono ammanatenni heedhinoreeti.
Ammanatenni Wolootu Faale Haˈra Dandiineemmohu Hiittoonniiti?
10. Hojju xiinxallo, Qullaawu Maxaafi giddo kulloonnihu ammanamino labballinna meenti faale haˈneemmo gede kaaˈlitannonkehu hiittoonniiti?
10 Mitto mancho seekkite egenna hoogittoro, faalesi haˈra didandaatto. Konne maxaafa nabbawatto woyite, kore ammanamino labballonna meento seekkite egennatto gede kaaˈlate yine lowore xiinxalline qixxeessinoonnita huwatatto. Atino mayira hakko garinni ledde dixiinxallatto? Hojju xiinxallokki yannara, xiinxallote kaaˈlanno uduunne horoonsidhe Qullaawa Maxaafa unte xiinxalli. Xiinxallattore hiincatto woyite, Qullaawu Maxaafi xaggera kulloonni bayichonna ikkito hedate woˈnaali. Hedokkinni hakko noottohu gede ikkite qooxeessaho noore laˈˈate, huuro macciishshatenna foole suˈniissate woˈnaali. Roorenkanni, xaggete giddo kulloonni mannira mayi macciishshaminonsaro huwatate woˈnaali. Insa ikkitino gara huwatate woˈnaalattoha ikkiro, albinni roore egennattonsa; qoleno insa lowo diro egennootto jaalla gede ikkitannohe.
11, 12. (a) Abiraaminna Saarayi jaallakki gede assite laˈˈattora dandaattohu hiittoonniiti? (b) Haanna, Eeliyaasi woy Saamueeli xagge kaaˈlitahera dandiitannohu hiittoonniiti?
11 Konne ammanamino labballonna meento seekkite egennittoro, faalensa haˈra hasiˈrakki digattanno. Coyi gedera, hanni mitte soqqanshote qoosso uyinahera kaˈnoonni yine hendo. Yihowa dirijjite soqqansho halashshiˈratto gede koyissinohe. Miteekkine sabbakkannori roore hasiissannowa hadhe soqqamatto gede, woy alba sabbakke egennoottokki garinni woy atera injaannohekki garinni sabbakatto gede koyinsoonniheha ikkara dandaanno. Tenne hajo daafira huuccatto assidhe heeshshi gotti assite hedatto woyite, Abiraami xagge hiinca kaaˈlitahe ikka? Abiraaminna Saarayi Uuri katami qawaaxxo agurte fultino daafira, Yihowa lowo geeshsha maassiˈrinonsa. Atino insa faale haˈrattoha ikkiro, insa albinni roore egennoottoti leeltannohe.
12 Woy mittu ammaˈnatto manchi ate woffi assannore coyiˈrino woy assino daafira, lowo geeshsha koffi yite, ‘Xaate songote gambooshshino gatoe’ yite noottohalla ikki? Haanna xagge hiincattohanna ise Finaana qussituserono Yihowara ammanante soqqantino gara hedattoha ikkiro, ise lawishshi gara ikkinore assatto gede kaaˈlannohe; qoleno Haanna albinni roore jaalakki gede assite laˈˈattora dandaatto. Hakkiinni saeno, hexxo mudhite ditidhoommoho yite hedattoha ikkiro, Eeliyaasi qarramino garanna Yihowa sheshifachishinosi gara xiinxallakki Eeliyaasi albinni roore jaalikki gede assite laˈˈatto gede kaaˈlitahera dandiitanno. Rosu mine maaeela coye assitanno gede darawonsa xixxiibbannonsa wedellootino, Saamueeli xaadooshshu dunkaanira Eeli ooso bunshe huntusikkinni ammaname heeˈrino gara xiinxallansa Saamueeli jaalinsa gede assite laˈanno gede kaaˈlitansara dandiitanno.
13. Ammanatenni Qullaawu Maxaafi giddo kulloonni manni faale haˈrakki gari ammana noohekkita leellishshannoni? Xawisi.
13 Ammanatenni Qullaawu Maxaafi giddo kulloonni manni faale haˈrakki gari ammana noohekkita leellishshannoni? Deeˈni, dileellishshanno! Yihowa Qaali, ammanamino manni faale haˈneemmo gede jawaachishannonketa qaagi. (1 Qor. 4:16; 11:1; 2 Tes. 3:7, 9) Hakkiinni saeno, konni maxaafira xaggensa xiinxallineemmohu mitu manni, insara albaanni heeˈrino manni faale haˈrinoho. Lawishshaho, konni maxaafira Fooliishsho 17 laˈneemmonte gede, Maariyaami coyidhinohu mitu qaali alba Haanna coyidhinoho; hakko daafira, ise Haanna lawishsha harunsitino yaate. Hatto yaa Maariyaami ammana garita diˈˈikkitino yaate? Hatto yaa diˈˈikkitino! Haanna lawishshi, Maariyaami ammanase kaajjishidhanno gedenna Maganu Yihowa albaanni dancha suˈma afidhanno gede kaaˈlinose.
14, 15. Konni maxaafira nooti mite mite coyibba hiikkuriiti? Konne maxaafa danchu garinni horoonsiˈra dandiineemmohu hiittoonniiti?
14 Konne maxaafa qixxeessinoonnihu, ammanakki kaajjishiˈratto gede kaaˈlateeti. Maxaafu giddo nooti mite hedo, Agarooshshu Shaera fulinohu “Ammanatenni Insa Faale Hadhe” yaanno birxichinni haaˈnoonnite. Hasaawate injaanno gedenna rosu heeshshonkera kaaˈlannonke gara huwanteemmo gede kaaˈlate xaˈmuwa qixxeessinoonni. Rosu xawe leellanno gede kaaˈlitannota batinye laˈˈate baxissanno misilla seekkinoonni; alba nooterano geeshshanna biinfille lendoonni. Konni maxaafi giddo wole kaaˈlitanno coyibba lawishshaho diru aante leellishshanno mashalaqqenna kaartuwa qixxeessinoonni. Ammanatenni Insa Faale Hadhe yaannoha konne maxaafa qixxeessinoonnihu hojju xiinxallora, maatete magansiˈra yannaranna songote xiinxallinammora hendeeti. Maate konni maxaafira noo xagge huuronsa naggi assite nabbawansa umise lowore kaaˈlitansara dandiitanno.
15 Kuni maxaafi, hundi waro heedhinori ammanantinori Yihowa soqqamaasine faale haˈratto gede kaaˈlannohe yine hexxineemmo. Qoleno, ammanakki lophitanni hadhanno gedenna albinni roore iimi Annikkiwa Yihowawa shiqatto gede kaaˈlahera halchineemmo!
