Alamete aana batinye manna callimma amaddino; qoleno duuchu mannira addu jaali noonsakkiha lawannonsa. Mitu fayyimmate agarooshshi egennaammi yitanno garinni, togoo hedo gargadha dandiinanniti mitte doogo, woloota kaaˈlate.

•   “Qarrantinore kaaˈla, heeshshonke gumu noota assitanno; hattono callimmanna jaalu dinoe yitanno hedo gargadhate kaaˈlitanno.”—U.S. National Institutes of Health.

 Qullaawu Maxaafi, woloota kaaˈlate maa assa dandiineemmoro xawise kulannonke. Qullaawu Maxaafi amaale loosu aana hosiisanke callimma gargadhate kaaˈlitannonke.

 Shaqqado ikki. Mannu ledo xaadde hasaawatto faro hasiˈri. Noohere wolootaho beehi. Hatto assattoha ikkiro, roore anga mannu assoottore naadanno; tini qolte jaalooma kaajjishshanno.

•   Qullaawu Maxaafi biddishsha: “Mannaho uuyye; insano uyitannoˈne.”​—Luqaasi 6:38.

 Woloota kaaˈlate wolqakki uyi. Qarru giddo noore kaaˈlatto doogo hasiˈri. Tenne giddo mite, insa hasaaphitanno woyite mararrotenni macciishsha woy duhansa shaashshannore mitore assine kaaˈla ikkitara dandiitanno.

•   Qullaawu Maxaafi biddishsha: “Jaalu woˈmanka woyite jaalaholla.”—Lawishsha 17:17.

 Mannu ledo dancha aante heedhannohe gede assiˈra dandaatto gara ledde afate, “Maatete Heeshshonna Jaalooma” yaanno birxicho lai.