17 KANAMA 2022
U BURUSIYA

Nubwo bari bafunzwe bakomeje gutera inkunga abagore babo

FUNGURA

Ku itariki ya 8 Kanama 2022, urukiko rw’akarere ka Golovinskiy ruri i Moscow rwahamije icyaha umuvandimwe Aleksandr Serebryakov na Yuriy Temirbulatov. Buri wese yakatiwe imyaka itandatu n’igice y’igifungo gisubitse. Ntibizaba ngombwa ko baguma muri gereza. Bahise bafungurwa.

Uko ibintu byagiye bikurikirana

Ku itariki ya 10 Gashyantare 2021

Abayobozi bo muri minisiteri ishinzwe umutekano mu Burusiya, abapolisi bo mu rwego rushinzwe ubutasi, n’abo mu kigo gishinzwe umutekano bigabije ingo cumi 16 z’Abahamya ba Yehova. Abavandimwe babiri bavuze ko bakubiswe naho 18 bahatwa ibibazo. Aleksandr na Yuriy barafunzwe
12 Gashyantare 2021

Abo bavandimwe bombi bafunzwe by’agateganyo
Ku itariki ya 28 Ukwakira 2021

Yuriy yajyanywe ku bitaro aho yabazwe ikibyimba yari afite
Ku itariki ya 4 Ugushyingo 2021

Yuriy yavanywe mu bitaro asubizwa muri gereza
Ku itariki ya 7 Gashyantare 2022

Ni bwo urubanza rwatangiye

Icyo twabavugaho

Aleksandr Serebryakov

Igihe yavukiye: 1977 (Chekhov, i Moscow)

Ibimuranga: Ababyeyi be bari abasirikare. Yabaye muri Ukraine no muri Kazakisitani. Yakoze mu bijyanye n’ubwubatsi

Yabonye ukuntu Abahamya ba Yehova bakundana, bituma yiga Bibiliya. Yabatijwe mu mwaka wa 1996. Yashakanye na Irina mu mwaka wa 2006

Ibyo umugore wa Aleksandr witwa Irina a yavuze

Aleksandr yagufashije ate gukomeza kuba incuti ya Yehova nubwo yari ari muri gereza?

Aleksandr yanyandikiraga amabaruwa arimo imirongo y’Ibyandistwe irimo ibitekerezo bitera inkunga. Nanone buri cyumweru twoherezanyaga ibyo twabaga twasomye muri Bibiliya dukoresheje amabaruwa. Kubera ko yampumurizaga akoresheje Bibiliya nizeraga ntashidikanya ko tuzakomeza kuba indahemuka kandi tukihangana kugera ku iherezo.

Ni iki cyagufashije kwihangana?

Muri Zaburi ya 116:1, 2, hagira hati: “Nkunda Yehova kuko yumva ijwi ryanjye no kwinginga kwanjye, kubera ko yanteze amatwi. Kandi nzamwambaza iminsi yo kubaho kwanjye yose.” Ndabizi neza ko Yehova ankunda kandi ko yicisha bugufi kugira ngo anyumve kandi ndi umuntu udatunganye. Ibyo byose abikora atari uko ategetswe kubikora ahubwo abitewe n’urukundo ankunda. Ibintu byose arabibona kandi asobanukiwe neza uko twiyumva, ibyo dushoboye ndetse n’ibyo dukeneye kugira ngo dukomeze kumubera incuti. Ibyo binyemeza ko Yehova ari kumwe n’umugabo wanjye kandi ko amwitaho.

Yuriy Temirbulatov

Igihe yavukiye: 1977 (Samarkand, muri Uzubekisitani)

Ibimuranga: Yakoze mu bijyanye n’imisoro

Yuriy yashakanye na Alla mu mwaka wa 1996. Bombi batangiye kwigana Bibiliya n’Abahamya ba Yehova. Babatijwe mu mwaka wa 1998. Bafite abana batatu

Ibyo umugore wa Yuriy witwa Alla b yavuze

Yuriy yagufashije ate gukomeza kurangwa n’ikizere nubwo yari afunzwe?

Mu mabaruwa yandikaga yajyaga avuga ko isengesho, kurangwa n’ikizere n’ukuntu abavandimwe na bashiki bacu bamushyigikiye, byagiye bimufasha cyane. Nanone yagiye yandika inkuru z’ibyamubayeho igihe yabaga abwiriza muri gereza. Izo nkuru zaramufashije zituma akomeza kugira ibyishimo.

Ni iki cyagufashije kwihangana?

Isengesho no gutekereza ku byiringiro byo mu gihe kizaza, byatumye ntacika intege. Ndabizi ko ibitotezo bizagira iherezo. Yehova azatsinda kandi natwe nuko. Kenshi nkunda gutega amatwi indirimbo ya 144 ifite umutwe uvuga ngo: “Isengesho ry’uworoheje.” Iyo ndirimbo irimo amagambo ahumuriza. Iyo ibintu bindenze, ndayifungura maze ngatangira kuyumva ari nako nyiririmba.

Aleksandr na Yuriy batanze urugero rwiza mu birebana no kwita ku bagize imiryango yabo mu buryo bw’umwuka nubwo batari bari kumwe. Twifuza ko Yehova yakomeza kubaha imigisha bo n’imiryango yabo kubera ko bakomeje kwihangana ari indahemuka.—1 Timoteyo 5:8.

a b Igihe iyi nkuru yategurwaga, umuvandimwe Serebryakov na Temirbulatov bari bagifunzwe by’agateganyo. Ni yo mpamvu tutabashije kubavugisha.

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU