10 NYAKANGA 2023
U BURUSIYA

Bashiki bacu batatu bo mu gace ka Komsomolsk-on-Amur bahamijwe icyaha

FUNGURA

Ku itariki ya 23 Werurwe 2023, urukiko rw’akarere ka Centralniy mu ntara ya Komsomolsk-on-Amur, rwahamije icyaha mushiki wacu Tatyana Bondarenko, Yelena Nesterova na Tatyana Svoboda. Buri wese yakatiwe igifungo gisubitse cy’imyaka itanu. Ntibizaba ngombwa ko bajyanwa muri gereza.

Icyo twabavugaho

Tatyana Bondarenko

Igihe yavukiye: 1960 (Komsomolsk-on-Amur mu ntara ya Khabarovsk)

Ibimuranga: Yakoze mu ruganda, akoresha imashini isya ibinyampeke. Ahavuye yagiye gukora ibijyanye n’isuku

Yashakanye na Vladimir mu mwaka wa 1992. Bafite abahungu batatu

Amaze kumenya umugambi Imana ifitiye abantu n’isezerano ry’uko izahindura isi paradizo, yahise atangira kwiga Bibiliya. Yabatijwe mu mwaka wa 2005

Ibyo yavuze

Ni mu buhe buryo Yehova yagufashije muri ibi bihe bitoroshye?

Igihe bazaga gusaka urugo rwacu, umugabo wanjye utari Umuhamya wa Yehova yari mu bitaro. Kuri uwo munsi yagerageje kumpamagara ashaka kumbwira ko muganga yamusezereye, icyakora ntiyambonye kuko abayobozi bari bafatiriye telefone yanjye. Bimaze kugera nimugoroba iperereza rirangiye ni bwo naguze telefone nshya maze ndamuhamagara kugira ngo musobanurire ibyabaye. Ibyabaye icyo gihe byatumye duhangayika cyane. Icyakora, ndibuka ko nasenze Yehova musaba gutuza kandi yaransubije. Nimugoroba tugeze mu rugo, umugabo wanjye yanyitayeho amfasha kongera gushyira ibintu kuri gahunda kuko bari babitereye hejuru barimo gusaka. Ibyo byatumye ndushaho kwiringira Yehova.

Yelena Nesterova

Igihe yavukiye: 1967 (Komsomolsk-on-Amur)

Ibimuranga: Yakoze akazi k’icungamutungo

Yabyaye abakobwa babiri, umwe apfa mu mwaka wa 1998

Yahuye n’Abahamya ba Yehova bwa mbere, igihe yashaka umwavoka maze agasanga ari Umuhamya. Yashimishijwe cyane n’uburyo yari inyangamugayo kandi agakoresha Bibiliya asubiza ibibazo yamubazaga. Yabatijwe mu mwaka wa 1997

Ibyo yavuze

Ibintu bitoroshye byababayeho byakwigishije iki?

Niboneye ko gukurikiza inama duhabwa ku birebana no kumvira ari ingenzi. Hashize igihe gito banshinje ibyaha, hari umuvandimwe wangiriye inama yo gutangira kwitegura uko nziregura. Kubera ko amagambo ya nyuma nari kuzayasoma mu gihe cy’isomwa ry’urubanza, naribwiye nti: ‘Igihe ntikiragera.’ Maze kubishyira mu isengesho nafashe umwanzuro wo gutangira kwandika amagambo nzavuga. Urubanza rwanjye rwarihuse cyane ku buryo iyo ntaza kuba nariteguye hakiri kare, kugira ibyo mvuga byari kungora. Byatumye mbona ko nkwiriye kujya numvira inama abavandimwe bangiriye, niyo naba ntumva neza impamvu. Kumvira ni ingenzi.

Dusenga Yehova tumusaba ko yakomeza guha imigisha n’imbaraga bashiki bacu bakomeje kumubera indahemuka nubwo bahanganye n’ibigeragezo.—Rusi 2:12.

Uko ibintu byagiye bikurikirana

Ku itariki ya 21 Nzeri 2021

Tatyana Svoboda yakorewe dosiye
Ku itariki ya 18 Ukwakira 2021

Tatyana Bondarenko na Yelena Nesterova nabo batangiye gukorwaho iperereza
Ku itariki ya 20 Ukwakira 2021

Ingo zabo zarasatswe
Ku itariki ya 28 Kanama 2022

Bamenyeshejwe ibyo baregwa
Ku itariki ya 28 Ukuboza 2022

Urubanza rwaratangiye
Ku itariki ya 23 Werurwe 2023

Bahamijwe ibyaha maze bakatirwa igifungo gisubitse cy’imyaka itanu

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU