2 GICURASI 2023 | YAHUJWE N’IGIHE: 3 NYAKANGA 2023
U BURUSIYA

AMAKURU MASHYA—UMUVANDIMWE YAHAMIJWE ICYAHA | Yatewe inkunga n’ingero z’abagaragu ba Yehova b’indahemuka

FUNGURA

Ku itariki ya 30 Kamena 2023, urukiko rw’akarere ka Leninskiy ruri mu gace ka Novosibirsk, rwahamije icyaha umuvandimwe Dmitriy Dolzhikov kandi rumukatira igifungo cy’imyaka itatu. Igifungo cye umucamanza yahise agihinduramo imirimo y’agahato izamara imyaka itatu. Ubwo rero ntibizaba ngombwa ko ajyanwa muri gereza. Muri cyo gihe cyose, leta izajya ifatira 10 ku ijana by’umushahara we. Nanone ntiyemerewe kurenga umujyi atuyemo.

Icyo twamuvugaho

Dmitriy Dolzhikov

Igihe yavukiye: 1978 (Kamyshevka, mu ntara ya Rostov)

Ibimuranga: Yakoze mu ruganda kandi yabaye n’umwubatsi

Yahuye n’Abahamya ba Yehova bwa mbere igihe mama we yatangiraga kwiga Bibiliya. Yagiye mu ikoraniro ry’iminsi itatu ry’Abahamya ba Yehova kandi yashimishijwe cyane n’uburyo bari bishimye kandi bunze ubumwe. Yabatijwe mu mwaka wa 1997

Yashakanye na Marina mu mwaka wa 2008

Ibyo yavuze

Wakoze iki kugira ngo witegure guhangana n’ibitotezo?

Igihe umuvandimwe Dennis Christensen bamufataga mu mwaka wa 2017 maze bakamufunga, natangiye gutekereza icyo nakora kugira ngo ndusheho kugira ukwizera gukomeye mbere y’uko nanjye bamfata. Natangiye gusenga mpuje n’amagambo aboneka muri Zaburi ya 26:2, aho Dawidi yasabye Yehova ko yamusuzuma kandi agatunganya ibitekerezo bye n’umutima we. Natangiye gusaba Yehova ngo amfashe gutahura amakosa yanjye. Nongeye gusoma ibitabo bitandukanye, urugero nk’igitabo Ababwiriza b’Ubwami n’igitabo Yesu ni inzira. Nanone nagerageje gufata mu mutwe imirongo yo muri Bibiliya igaragaza ukuntu Yehova asezeranya abagaragu be kubafasha igihe bahuye n’ibigeragezo.

Ni iyihe nkuru yo muri Bibiliya yagufashaje kwihangana?

Nafashijwe n’inkuru ya Eliya. Igihe yahungaga umwamikazi mubi Yezebeli, yari akeneye ko Yehova amufasha. Kandi icyo gihe Yehova ntiyamweretse ko afite imbaraga zo kumukiza gusa ahubwo yaranamuhumurije kandi amwizeza ko atari wenyine. Ibyo byamfashije kumenya ko Yehova ari kumwe nanjye kandi ko yiteguye kumfasha nkanesha ubwoba.

Twizeye tudashidikanya ko Yehova azakomeza guha imbaraga Dmitriy n’abandi twese, akanazirikana ukwizera kwacu no kwihanga kwacu.—Ibyahishuwe 2:19.

Uko ibintu byagiye bikurikirana

Ku itariki ya 13 Gicurasi 2022

Ni bwo yakorewe dosiye
Ku itariki ya 8 Nzeri 2022

Basatse inyubako yabagamo kandi bamufunga by’agateganyo
Ku itariki ya 9 Nzeri 2022

Bamuhase ibibazo kandi bamujyana n’indege bajya kumufungira mu ntara ya Novosibirsk avuye mu ya Chelyabinsk. Icyo gihe yakoze urugendo rw’ibirometero 1.500
Ku itariki ya 11 Ugushyingo 2022

Ni bwo urubanza rwe rwatangiye
Ku itariki ya 24 Ugushyingo 2022

Yararekuwe maze afungishwa ijisho

Ibindi wamenya

AMAKURU

Bafunzwe bazira ukwizera kwabo—U Burusiya

Abahamya ba Yehova bo mu Burusiya bagiye bafungwa bazira ukwizera kwabo. Menya amateka yabo kandi ku rubuga rwacu urahabona urutonde rw’abakiri muri gereza.

AMAKURU