Ando articolo cai nachlea, dichleam savo si o semno cai sicavel amenghe cana astardea o Regato le Devlesco te rail hai că lesco Rege si o Isus Cristos.

I Biblia sicavel amenghe că, atunci cana astardea o Isus te rail ando cerii sar Rege, vo șiudea tele pi phuv le Satanos hai lesche demonen. Anda o bărș 1914, de cana sas-lo șiudino pi phuv, le buchia cărdile sea mai nasul. (Revelația 12:7, 9)

Chiar cana le buchia andai lumea cărdile sea mai nasul, o Isus, sar Rege le Regatosco le Devlesco, ajutil le manușen pa sea i phuv. O Isus phendea de mai anglal că va avela cărdi pe sea i phuv iech buchi anda o sicaimos la Bibliaco, cai va ajutila le manușen te sichion anda o Del hai te cheren so manghel lendar vo. (Isaia 2:2-4) Milioanea manușa sichile sar te încăren le love hai i buchi ca lengo than hai cărde mai șucar penghi viața de familie. Sea so sichion anel lenghe but miștimata acana hai ajutil-le te aven gata te train tela o Regato le Devlesco.

Chiar dacă acana o Isus rail deja ando cerii, tele pi phuv rain încă le guvernea le manușenghe. O Del phendea le Isusosche: „Jia te rais ando mașcar che dușmanengo”. (Psalmo 110:2) Na pa but timpo, o Isus va chosela cu sea pesche dușmanen hai va anela miștimata sea codolenghe cai așunen le Devlestar.

Na pa but timpo, o Regato le Devlesco:

• Va chosela cu sea i religia neciaci. Le religii cai sicade le manușen hohaimata anda o Del hai cărde phari i viața le manușenghi, ci va mai avena. I Biblia phenel că i religia neciaci si sar iech prostituata. But manușa va avena uimime cana voi va avela distrugime. (Revelația 17:15, 16)

• Va chosela cu sea o raimos le manușengo. O Regato le Devlesco va chosela sea le regatea le manușenghe. (Revelația 19:15, 17, 18)

• Va chosela cu sea le manușen cai sile nasul. So va avela codolența cai cheren nasul hai ci camen te așunen le Devlestar? „Codola nasul va avena chosle pa i phuv.” (Proverbe 2:22)

• Va chosela cu sea le Satanos hai lesche benghen. O Satan hai lesche benga ‘ci va mai athavena le manușen’. (Revelația 20:3, 10)

So anen sea cadal buchia codolenghe cai camen te așen tela o Regato le Devlesco?

Sar Rege cerisco, o Isus va cherela buchia cai le manușa ci daisarde te cheren-le niciechdata. Pașa leste, va raina 144 000 manușa alosarde pa i phuv. (Revelația 5:9, 10; 14:1, 3) Vo va lela sama ca i voința le Devleschi te avel cărdi pi phuv. So va cherela o Regato le Devlesco anda le manușa cai train pi phuv?

• Va chosela cu sea o nasfalimos hai o merimos. „Niciech manuș pa i phuv ci va phenela: «Som nasfalo»”, hai „o merimos ci va mai avela”. (Isaia 33:24; Revelația 21:4)

• Va anela i ciaci pacea hai siguranța. „Bari va avela i pacea che șiavenghi” hai „fiesavo va beșela tela peschi răz hai tela pesco smochino hai chonic ci va mai cherela-le te izdran”. (Isaia 54:13; Mica 4:4)

• Va cherela ca fiesavo manuș te bucuril-pe catar i buchi cai cheren-la lesche vasta. „Mânre manușa va bucurina-pe anda sasto ilo le buchiandar cai cheren-le lenghe vasta. Ci va chiniona de ivea.” (Isaia 65:22, 23)

• Va lașiarela sea le buchia cai rimosarde i phuv. „O pustio hai o than bi paiesco va avena pherde bucuria, hai o câmpo șuco va avela voime hai va lulughiola sar o șofrano.” (Isaia 35:1)

• Va sicavela le manușen so trebul te cheren caște train veșnico. „Cadaia însemnol i viața veșnico: te arăsăn te prinjianen tut, o corcoro ciacio Del, hai codoles cai bișialdean-les tu, o Isus Cristos.” (Ioan 17:3)

O Del camel ca vi tut te aven-tu cadal miștimata. (Isaia 48:18) Mai dur, va avela te sichios so daștis te cheres acana caște avel tut cado viitorii șucar.