Επειδή ο Διάβολος ισί πνεύμας, τζουβντιόλα κάπου σο ναστί ντικχάσα-λες. Ανταβά όμως, να μανγκέλα τι βακερέλ ότι ισί εκχέ τθανέστε σο τθερέλα γιακ ντα οτθέ βασανίνελα ι γκεραλέ τζενέν, σαρ σικαβέλα η φωτογραφία ανταλέ θεμάστε.

«Τζένγκι κο ουρανός»

 Για μπουτ μπρεσά, ο Σατανάς ο Διάβολος μπορίνελας τι πφιρέλ ελεύθερα κο ουρανός. Ντα μπορίνελας τι τζαλ ανγκλάλ κο Ντεβέλ γιεκ ι πιστέ αγγελόντζαρ. (Ιώβ 1:6) Αλλά η Αγία Γραφή βακερντάας ότι κα αβέλας «τζένγκι κο ουρανός» ντα ο αποτέλεσμας κα αβέλας τι παλντίντιβελ ο Σατανάς κατά ουρανός ντα τι “φουρτίντιβελ τελέ κι πφουβ”. (Αποκάλυψη 12:7-9) Ο τρόπος σο γκιντιόνα ο μπρεσά κι Αγία Γραφή ντα ο πράγματα σο αβιλέ-πες σαρί κι πφουβ σικαβένα ότι οντουβά τζένγκι κο ουρανός αβιλό-πες. Ο Διάβολος ακανά να μπορίνελα τι τζαλ κο ουρανός, αλλά τθερέλα τι κερέλ σάντε ι πφουβιάσαρ.

 Μήπως ανταβά μανγκέλα τι βακερέλ ότι ο Διάβολος μπεσέλα εκχέ συγκεκριμέ τθανέστε κι πφουβ; Για παράδειγμας, η Αγία Γραφή βακερέλα ότι κι αρχαία πόλη Πέργαμος ισινέ «ο θρόνος ι Μπενγκέσκο» ντα ο τθαν σο “μπεσέλας ο Μπενγκ”. (Αποκάλυψη 2:13) Κι πραγματικότητα, όμως, ανταλά λάφια μανγκένα τι βακερέν ότι η Πέργαμος ισινέ ο κέντρος κι Μπενγκέσκι λατρεία. Ατζέκ, η Αγία Γραφή βακερέλα ότι ο Διάβολος κυβερνίνελα «σαρέ ο βασιλείες ι πφουβιάκε». Άρα, σαρέ ανταλένταρ, ο συμπέρασμας ισί ότι ο Διάβολος να μπεσέλα εκχέ συγκεκριμέ τθανέστε οπράλ κι πφουβ αλλά ότι κερέλα-λα κουμάντος.​—Λουκάς 4:​5, 6.