¿IMARAYKUN ISKAYANKU? Askha runakunan ninku: “Diosqa manan huchasapa runakunata qhawariwasunmanchu”, nispa. Kendra sutiyoq warmin sinchi llakiq ñit’isqan tarikun. Diospa tukuy kamachikusqanta mana hunt’ay atisqanmanta llakikuspan manaña Diosmanta mañakurqanchu.

¿IMANINMI BIBLIA? Jehová Diosqa yachanmi huchayoq runakuna kasqanchista, entiendewanchistaqmi kanpas. Biblian nin: “Payqa reqsiwanchismi imayna kasqanchista, yuyarikuwanchismi ñut’u hallp’a kasqanchista”, nispa. Chaymi mana huchanchisman hinachu pagawanchis, aswanmi huchanchismanta pesapakuqtinchis pampachawanchis (Salmo 103:10, 14).

Rey Davidpi yuyaykusun. Payqa sinchi hatun huchakunapin urmarqan, chaymi Diosmanta mañakurqan: “Wiksallapiraq kashaqtiymi rikuwarqankiña. Diosníy, t’aqwiriway, sonqoyta reqsiykuway”, nispa (Salmo 139:16, 23). Arí, Davidqa yacharqanmi sonqomanta pesapakusqanta Jehová Dios rikushasqanta.

Dios kikinmi nin: “Manan ñoqaqa runa hinachu patallanta qhawani, runallan rikch’aynintaqa qhawan, ñoqan ichaqa sonqonta qhawani”, nispa (1 Samuel 16:7). Arí, Diosqa allintan reqsiwanchis. Payqa yachanmi imayna uywasqa kasqanchista, imaynapi wiñasqanchista, imayna kasqanchistapas. Hinaspapas kusikunmi, pantaq runaña kashaspapas allin kaqta ruwanapaq kallpachakusqanchismanta.

Tukuytataq yachan ñoqanchismanta chayqa, ¿imaynatan kallpachawanchis llakikuykunapi tarikuqtinchis?