Tukuy sonqo ofrecekurqanku Diosta servinankupaq Ecuador nacionpi

Bruno sutiyoq Testigo waynaqa Italia nacionmantan, payqa allintan decidikunan karqan. Colegionta tukuqtinmi familianpas profesorninkunapas allin notakunata horqokusqanraykun universidadpi estudiananpaq kallpacharqanku. Ichaqa, ñawpaq watakunapi Jehová Diosman qokusqanpin payqa decidikusqa Dios serviytaraq ñawpaqman churananpaq. ¿Imatan ruwarqan? Paymi nin: “Jehová Diostan mañakusqaypi nirqani qokusqayman hina kawsanaypaq, chaytataq ñawpaqman churanaypaq. Nillarqanitaqmi mana aburrikuspa kawsanaypaq, aswanpas imaymanakunata ruwaspa Diosta servinaypaq”, nispa.

 Pisi watakunallamanmi Ecuador nacionman ripurqan. ¿Imaynan chaypi tarikurqan? Ninmi: “Diosqa mañakusqaymanta astawanraqmi qowarqan”, nispa. Ecuadorman chayaspan askha kuraq waynakunata reqsirqan, paykunapas astawan Diosta servinankupaqmi chaypi kasharqanku.

WAYNA-SIPASKUNA DIOSPA INVITASQANTA KASUKUNKU

Bruno cristianopas pachantinpi wayna sipaskunapas kasukurqankun Diospa kay invitasqanta: “Probaykuwaychis, ahinapin yachankichis hanaq pacha ventanakunata kicharispa saminchata llimp’arishaqta hich’aykamusqaykichischus icha manachus chayta”, nispa (Mal. 3:10). Llapankutapas Diosta munakusqankun kallpacharqan payta probanankupaq, chayraykun predicaqkunaq necesitakusqan huk lado nacionkunapi predicanankupaq tiemponkuta kallpankuta kaqninkutapas qorqanku.

Risqankuman chayaspankuqa usqhayllan reparanku ‘cosechana askhapuni, llank’aqkunataq ichaqa pisilla’ kasqanta (Mat. 9:37). Alemania nacionmanta Jaqueline cristianan Ecuador sucursalman qelqarqan: “Iskay wata masllaraqmi kaypi kashani, ichaqa 13 runakunamanmi estudiota qoshani tawataqmi huñunakuykunaman hamun, ¡ancha kusisqan kashani!”, nispa. Canadá nacionmanta Chantal cristianan willakun: “2008 watapin Ecuador nacionpi lamar qochaq cantonpi kaq llaqtakunaman ripurqani, chaypiqa huk iñiq t’aqallan karqan. Kunanqa kinsa iñiq t’aqakunan kan, 30 más precursorkuna ima. ¡Iñiyninkupi askha runakuna ñawparisqankuta rikuymi astawanqa kusichikun! Qaynallan cordillera de  los Andes nisqapi tarikuq huk llaqtamanñataq ripurqani, chayqa lamar qochamanta 2.700 metros altopin kashan. Chaypiqa 75.000 runakunan tiyanku, ichaqa huk iñiq t’aqallan kan. Allintan runakuna uyarikun, ñoqaqa kusisqan chaypi Diosta servishani”, nispa.

SASACHAKUYKUNATA ATIPANKU

Ichaqa, huk lado nacionkunapi Diosta serviyqa manan facilchu. Wakin wayna-sipaskunaqa manaraq nacionninkumanta lloqsishasparaqmi sasachakuypi karqanku. Estados Unidos nacionmanta Kayla cristianan yuyarin: “Decidikusqaymanta wakin iñiqmasikunaq mana allinta rimasqanqa pisikallpayachiwaqmi. Manan entienderqankuchu imarayku Diosta tukuy tiempoywan servinaypaq huk lado nación ripunaymanta. Chayrayku mayninpiqa decidisqaymanta iskayaq kani”, nispa. Chaywanpas, Kaylaqa Ecuadormanmi ripurqan. ¿Iman chaypaq yanaparqan? Ninmi: “Anchatan Diosmanta mañakurqani, rimarqanitaqmi allin iñiyniyoq iñiqmasikunawan, chhaynapin repararqani astawan serviy munaqkunata Dios saminchasqanta”, nispa.

Wakinpaqqa huk simi rimaymi aswan sasa karqan. Irlanda nacionmanta Siobhan cristianan nin: “Llakichiwaqmi chay nacionpa siminta mana rimayta atisqay. Pacienciakuytan yacharqani, astawanmi estudianay karqan, asikunaytaqmi karqan rimaspa pantasqaymanta”, nispa. Estonia nacionmanta Anna cristianan nillantaq: “Nishu q’oñi kasqanman, polvoq kasqanman yachakuy, chiri unuwan bañakuypas manan imapaschu karqan castellano rimay yachaymantaqa. Askha kutipin saqepuyta munarqani. Pisi-pisimanta yachasqaypin yuyaykunay karqan, manataq rimaspa pantasqaypichu”, nispa.

Familiamanta karupi kaypas llakichikunmi. Estados Unidos nacionmanta Jonathan cristianon nin: “Ecuador nacionman chayaspan familiaymanta amigoykunamanta karupi tarikuspa llakikurqani. Ichaqa, tukuy sonqoywan predicasqay, qelqanchiskunatapas Bibliatapas anchata estudiasqaymi yanapawarqan mana llakisqa kanaypaq. Predicaspa imaymanakuna pasawasqan, iñiq t’aqapi amigokunatapas tarisqaymi yanapawarqan kusisqa kanaypaq”, nispa.

Chaypi hukniray kawsay kasqanpas huk sasachakuymi. Canadá nacionmanta Beau cristianon  nillantaq: “Pipas nacionninpi kaspaqa electricidad kasqanta pila unu kasqantapas manan chaninchanchu. Ichaqa kaypiqa qonqayllan k’anchaypas unupas mana kanchu”, nispa. Chay nacionkunapiqa kanmi wakchakuna, carropipas sasatan viajakun, wakin runakunapas manan leeyta yachankuchu. Austria nacionmanta Ines cristianataqa runakunaq imayna kasqanta qhawariymi yanaparqan, ninmi: “Chaypi runakunaqa qoykukuqmi kanku, sumaq sonqo, yanapakuq, huch’uyaykukuq ima, astawanqa Diosmantan yachayta munanku”, nispa.

‘LLIMP’ARISHAQTAN’ SAMINCHASQAYKICHIS

Kay llapa wayna-sipaskunan tukuy munasqankuta saqerqanku Ecuador nacionpi Diosta servinankurayku. Ichaqa rikurqankun ‘mañakusqankumantapas yuyaykusqankumantapas aswan askhataraq’ Jehová Dios qosqanta (Efe. 3:20). Paykunaqa repararqankun ‘saminchata llimp’arishaqtaraq’ qonanpaq prometesqanta Dios hunt’asqanta (Mal. 3:10). ¿Imaninkun Dios servisqankumanta?

Bruno: “Ecuadorman chayaspayqa monte ukhupin Diosta servirqani. Chaymantan yanapakurqani sucursalta hatunyachisqankupi, kunanqa chaypin kashani. Italia nacionpi kashaspaymi decidikurqani Diostaraq ñawpaqman churanaypaq, Diostaqmi yanapawarqan imaymanapi payta servispa kusisqa kawsanaypaq”, nispa.

Beau: “Ecuador nacionpiqa tukuy tiempoywanmi Diosta servini, chaymi astawan Jehová Diosman hukllachachiwan, huk saminchaykuna kasqanmantapas ancha munay cheqaskunatan reqsirqani”, nispa.

Anna: “Manan yuyaykullarqanipaschu soltera kaspa misionera hina kayta. Kunanqa yachanin Diosta servispa imapas atikusqanta. Diosmi saminchawan, kusisqan kashani runakunaman Bibliamanta yachachinapaq Diospa nisqanta hunt’aspa, huñunakuna wasi hatarichiypi yanapakuspa, mosoq amigokunata tarispapas”, nispa.

Elke: “Austria nacionpi kaspaymi Diosmanta mañakurqani huk runata Bibliamanta yachachinaypaq. ¡Kaypiqa 15 runakunatan yachachishani! Iñiyninkupi wiñarisqankuta rikuymi nishutapuni kusichiwan”, nispa.

Joel: “Ancha munaymi mana reqsisqayki cheqaspi Diosta serviyqa. Astawan Diospi hap’ipakuytan yachanki, kusikunkitaqmi kallpachakusqaykita saminchasqanta rikuspa. Estados Unidos nacionmanta chayamuqtiyqa soqta bautizasqakunallan karqan, huk watamanqa 21 karqayku, Jesuspa wañusqanta yuyarinapaq huñunakuymantaqmi 110 runakuna hamurqanku”, nispa.

QANRI, ¿IMATAN RUWANKI?

Sichus Jehová Diospa testigon kanki, atiwaqtaq predicaqkunaq necesitakusqan cheqaskunaman riyta chayqa, ¿kasukuwaqchu Diospa invitasqanta? Ichaqa chayta ruwanaykipaqqa ñawpaqmantaraqmi allinta yuyaykunayki. Chaypaqqa, Jehová Diosta runamasiykitawanmi astawanqa munakunayki. Sichus chay munakuyniyki kashan chayqa Diosmanta mañakuy. Chaymantapas rimay umalliykikunawan tayta-mamaykiwanpas. Chayta ruwaspaqa reparankin chay munay llank’aypi astawan Diosta serviyta qanpas atisqaykita.

[3 paginapi willakuy]

“Anchatan Diosmanta mañakurqani, rimarqanitaqmi allin iñiyniyoq iñiqmasikunawan, chhaynapin repararqani astawan serviy munaqkunata Dios saminchasqanta.” (Estados Unidos nacionmanta Kayla)

[6 paginapi dibujo recuadropiwan]

¿Imaynatan preparakuwaq huk nacionpi servinaykipaq?

• Tiempota t’aqay Bibliata estudianaykipaq

• Qhaway, Diosmanta Willasunchis 2011 wata agosto killata, 4-6 paginakunata

• Huk nacionpi Diosta serviqkunawan parlay

• Chay nacionpi imakuna sucedesqanmanta imayna kawsay kasqanmanta yachay

• Pisillatapas yachay chay nacionpi simi rimasqankuta

[6 paginapi dibujo recuadropiwan]

¿Imaynatan huk nacionman rispa wakin kawsanku?

• Wakin killakunan nacionninkupi llank’anku

• Wasinkuta negocionkuta alquilanku

• Internetpin ima llank’aytapas ruwanku

[4, 5 paginakunapi fotokuna]

1 Jaqueline (Alemania)

2 Bruno (Italia)

3 Beau (Canadá)

4 Siobhan (Irlanda)

5 Joel (Estados Unidos)

6 Jonathan (Estados Unidos)

7 Anna (Estonia)

8 Elke (Austria)

9 Chantal (Canadá)

10 Ines (Austria)