“Munasqaymi hunt’akun”

Emilia cristianaqa precursora kasqantan chunka phisqa wataña saqepurqan. Ichaqa, qaynakunallan yuyarisharqan chay tiempopi ancha munay kawsaynin kasqanta, hinan yuyaykurqan wakmanta precursora kananpaq.

Ichaqa, llank’asqanmi mana tiempota qoqchu, chaymi llakichiq. Huk p’unchaymi Emilia cristianaqa llank’aqmasinkunaq uyarisqan llakipakurqan khaynata: “¡Aswan pisillata llank’ayman chayqa!”, nispa. Chayta yacharqospan jefan tapurqan cheqaqtachus rimashasqanta, Emiliaqa “arí”, nirqanmi. Aswan pisillata llank’ananpaqqa directorwanmi rimanan karqan, ichaqa, chay empresapi llank’aqkunaqa tiemponkuta mana mich’akuspan llank’ananku karqan. Chayraykun Emiliaqa imachus ninanta ñawpaqmanta yuyaykurqan, Diosmantataq mañakurqan kallpata thak kaytawan.

Emiliaqa allinta yuyaykuspan mana manchakuspa nirqan pisi tiempolla llank’ananpaq. Directormanmi willarqan mana llank’asqan horapi runakuna yanapasqanta. Nirqanmi: “Jehová Diospa testigonmi kani, runakunatan yanapani Diosmanta yachanankupaq. Kay tiempopiqa manan chaninpaqchu runakunaqa allin kaqkunataqa qhawarinku, chayraykun necesitanku Bibliaq yanapayninta. Manan munaymanchu chay ruwasqay pisikallpayachiwananta kay llank’asqaypi, ichaqa munanin chay runakuna yanapanaypaq aswan tiempoyoq kayta. Chayraykun mayta munayman kay empresapi pisi tiempolla llank’ayta”, nispa.

Directorqa makillan uyarirqan, willarqantaqmi paypas huk kutipi runakuna yanapay yuyaykusqanta. Nirqanmi: “Imaraykuchus pisi tiempolla llank’ay munasqaykita yachaspaqa yaqachus hina mañakusqaykita qonallay kanqa. Ichaqa yachankichá chaywan pisi qolqe gananaykita”, nispa. Emiliaqa “arí” nirqanmi, willarqantaqmi pisillawan kawsananpaq, nirqanmi: “Ñoqapaqqa aswan allinqa runakunata yanapaymi, chay ruwaytan astawan munani”, nispa. Hinan directorqa nirqan: “Allinpaqmi qhawarini mana ima chaskinankuraykulla tiemponkuta qospa runakuna yanapaqkunata”, nispa.

Kunanqa tawa p’unchayllan Emiliaqa llank’an, chay empresapiqa manan hayk’aqpas llank’aqkunawanqa chayta ruwaqkuchu. Qolqe ganasqantapas yaparqankun, chhaynapin Emiliaqa ñawpaqmi hina ganashan. Ninmi: “Munasqaymi hunt’akun, kunanqa waqmantan precursora kani”, nispa

Qanri, ¿yuyaykurqankichu tiempota horqospa precursor kanaykipaq?

[32 paginapi willakuy]

Directormi nirqan: “Allinpaqmi qhawarini mana ima chaskinankuraykulla tiemponkuta qospa runakuna yanapaqkunata”