¡QAWAN-QAWANLLAYÁ KASUN!

2022 watapim tukuy ima pasakurqa | ¿Imatam biblia nin?

QALLARINMANMI

2022 watapim noticiakuna uyarikurqa guerrakunamanta, tukuy imapas subirusqanmanta hinaspa llumpay rupaywan llumpay para kasqanmanta. Tukuy chaykuna imarayku pasakusqanmantaqa bibliallapim willawanchik.

¿Imaraykutaq 2022 watapi tukuy imakuna pasakuchkan?

Kay watakunapi tukuy imakuna pasakusqanwanmi sutilla kachkan ‘tukupay punchawkunapi’ kawsakusqanchik (2 Timoteo 3:1). Chay tukupay punchawkunaqa qallaykurqa 1914 watapim. Qawaykuy kunan tiempopi imapas pasakusqanqa bibliapa nisqanman hina kasqanta.

“Guerrakuna” (Mateo 24:6).

“2022 watapim Europa lawpi kaqmanta guerra karqa”. a

Qaway “Rusia nacionmi Ucrania nacionta munaychakunanpaq yaykurun” niqta.

‘Muchuy’ (Mateo 24:7).

“2022 watapim mana haykapipas kasqan muchuy karqa”. b

Qaway “Ucraniapi guerra kasqanraykum enteron allpa pachapi astawanraq yarqay yapakuchkan” niqta.

“Kaypi-chaypi unquykuna” (Lucas 21:11).

“Polio nisqanku unquymi kaqlla rikurirurqa, viruela del mono sutiyuq unquypas astawanmi mirarurqa, COVID-19 nisqanku unquywanpas hinallam wañuchkanku. Tukuy chaykunawanmi cuentata qukunchik ratakuq unquykunaqa chaylla mirarusqanta chaynataq runakunapas chaykunawan chaylla wañusqanta”. c

Qaway “Coronavirus unquywanmi 6 millonña wañurunku” niqta.

“Manchakuypaq kaqkuna” (Lucas 21:11).

“Manachá pipas qunqanqachu 2022 watapi llumpay rupay kasqantaqa. Chay watapim karqa llumpay rupay, usyay, urqukunapas kañakurqam, wasikunatam lluqllakuna aparqa, karqataqmi chaykunaman rikchakuq sasachakuykunapas. Tukuy chaykunaraykum allpa pachaqa manaña allinchu, enteron pachapi waranqantin runakunam wañurqaku, hinaspapas millonnintin runakunam huklawman ripukurqaku”. d

Qaway “Achka nacionkunapim llumpa-llumpay rupay kakuchkan” niqta.

“Chaqwakuna” (Lucas 21:9).

“Runakunam aswan piñasqallaña kachkanku tukuy imakuna subirusqanrayku. Chayraykum runakunaqa mana wañuytapas manchakuspanku gobiernokunapa contranpi 2022 watapi astawan hatarirqaku”. e

Qaway “Tukuy imapa precionmi llumpayta subirun” niqta.

¿Imaynataq kanqa 2023 wataqa?

Manam yachanchikchu ima pasanantaqa. Ichaqa yachanchikmi hanaq pachamanta kamachimuq Diospa gobiernon kay pachanchikman hawkayayta apamunanmanta (Daniel 2:44). Chay gobierno kamachimuptinqa manañam ñakarisunchu. Hinaspapas Diospa munayninmi kay pachapi ruwasqa kanqa (Mateo 6:9, 10).

Hinallayá kallpanchakuy Jesucristopa nisqanta kasukunaykipaq hinaspa bibliapa nisqankuna imayna cumplikusqanmanta qawan-qawanlla kanaykipaq (Marcos 13:37). Astawan biblia imayna yanapasunaykimanta hinaspa qampas chaynataq familiaykipas hamuq tiempopi imayna kawsakunaykichikmanta yachayta munaspaykiqa ama hina kaspa willamuwayku Jehova Diospa testigonkunaman.

a Jill Lawless: “2022 Was Year the Horror of War Returned to Europe,” AP News, 8 de diciembre de 2022.

b “Una crisis alimentaria mundial”, Programa Mundial de Alimentos.

c Lawrence O. Gostin, JD: “Living in an Age of Pandemics—From COVID-19 to Monkeypox, Polio, and Disease X”, JAMA Health Forum, 22 de septiembre de 2022.

d Martina Igini: “What’s Behind the Record-Breaking Extreme Weather Events of Summer 2022?”, Earth.Org. 24 de octubre de 2022.

e Thomas Carothers y Benjamin Feldman: “Economic Anger Dominated Global Protests in 2022”, Carnegie Endowment for International Peace, 8 de diciembre de 2022.