2022 watapa julio killanpim noticiakunapi nirqaku achka nacionpi llumpa-llumpay rupay kasqanmanta, chayna rupayqa manam haykapipas karqachu:

•   “China nacionpi autoridadkunam ninku yaqa 70 llaqtakunapi llumpa-llumpay rupay kananmanta, chayna rupayqa kay killapim iskay kutikamaña kanqa” (25 julio 2022, CNN televisionpi canal).

•   “Europa lawpi llumpay rupay kasqanraykum achka lawkunapi montekuna rupachkan” (17 julio 2022, The Guardian sutiyuq periodico).

•   “Domingo punchawpim Estados Unidos nacionpa achka llaqtankunapi mana haykapipas pasakusqan llumpa-llumpay rupay karqa” (24 julio 2022, The New York Times sutiyuq periodico).

 ¿Imanasqam tukuy chaykuna pasakuchkan? ¿Yaqachu hamuq punchawkunapiqa kay allpa pachapi manaña pipas kawsanqa? ¿Ima nintaq biblia?

 Arí, bibliaqa nirqañam kay tiempopi imakuna pasananmanta. Jesusmi nirqa ‘manchakuypaq kaqkunata’ rikunanchikmanta (Lucas 21:11). Chayna llumpa-llumpay rupay kasqanraykum runakunaqa preocupasqallaña kachkanku. Manchakunkutaqmi runakuna kay allpa pachanchikta qalaypaqta ruwarunankumanta.

 Diosninchikmi allpa pachataqa unancharqa wiña-wiñaypaq chaypi kawsakunanchikpaq (Salmos 115:16; Eclesiastes 1:4). Chaymi mana saqinqachu runakuna allpa pachata qalaypaqta ruwarunankutaqa. Bibliapim nin ‘kay pacha qanrachaqkunata’ Dios chinkachinanmanta (Apocalipsis 11:18).

 ¿Imakunatawanraqmi Diosqa kay allpa pachanchikpaq ruwanqa?

•   Isaias 35:1 nin: “Chunniqwan chaki allpapas kusikunqam, chakillaña pampapas kusisqam kanqa, purunpi wiñaq wayta hinam waytarinqa”, nispa. Diosninchikqa manam saqinqachu kay allpa pachanchik chunniq rikurirunantaqa, aswanqa allichaspam sumaqyachinqa.

•   Salmos 65:9 nin: “Qanmi kay allpa pachata cuidanki, chaymi kay allpa pachaqa tukuy imayuq”, nispa. Diosninchikmi suma-sumaq huertata hina allpa pachanchikta ruwanqa.

 Bibliapi willakuykuna kay tiempopi imayna cumplikusqanmanta astawan yachanaykipaqqa leey “¿Qué dice la Biblia sobre el cambio climático y nuestro futuro?” niq yachachikuyta.

 Kay allpa pacha sumaqyachisqa kananmanta astawan yachanaykipaqqa leey “¿Quién salvará el planeta?” niq yachachikuyta.