Achca llajtacunapimi autoridadcunaca gentecunapura ama yalli cꞌuchuyarichun, ama tandanacuchunpish mandashcacuna. Testigo de Jehovacunaca autoridadcuna mandashcatami cazunchij. ¿Pero ima shinataj cuidadohuan tandanacushpa catinchij? Congregacioncunaca Internetpi conectaringapajmi huaquin programacunata utilizacuncuna. Por ejemplo Zoom nishca programatami utilizancuna.

 Cada congregación tandanacuita charishpa catichunmi Cuerpo Gobernantemanta huauquicunaca shungumanta cushca cullquihuan Zoom nishca programata pagachun aprobashca. Maijan congregacionca chai programacuna 15, 20 o ashtahuan dólares valishcamantami mana pagai tucurcacuna. Chaimantami chai congregacioncunaca gratis caj programacunata utilizajcuna carca. Pero chai programacunaca gratis cashpapish mana seguro carcachu, y ashacunallami conectari tucurcacuna. Pero ñucanchij organización Zoom nishca programata utilizangapaj pagashcamantami congregacioncunaca seguro conectari tucuncuna y achcacuna chai tiempollataj conectari tucuncuna. Cunancamaca 170 yalli llajtacunamanta 65.000 yalli congregacioncunami cai programata utilizacuncuna.

 Indonesia llajtapi, Manado ciudadpi caj Kairagi congregacionca gratis caj programata utilizanata saquishpami cunanca Zoom nishca programata utilizan. Huauqui Hadi Santosoca: “Tecnologiata mana tanto utilizanata yachaj huauqui panicunapish, cunanca shuj cutinlla conectarishcamantami tucui tandanacuicunata contento uyai tucuncuna” ninmi.

 Ecuador llajtapi, Guayaquil ciudadpi caj Guayacanes Oeste congregacionmanta Léster Jijón ancianoca: “Huauqui panicunaca mana tanto cullquita charincunachu. Chaimi achcacuna conectarishpa tandanacungapaj Zoom nishca programata paganaca mana jahualla canman carca. Cunanca ñucanchij organización cai programata pagashcamantami achcacuna chai tiempollataj conectari tucunchij. Shinallataj tucui pudishca gentecunatami conectarichun invitai tucunchij” ninmi.

 Zambia llajta, Lusaka ciudadpi caj Norte Ngwerere congregacionmanta huauqui Johnson Mwanzaca cashna nishpami escribirca: “Achca cutinmi huauqui panicunaca ñucanchijtaca, ‘ñucanchij organización Zoom nishca programata pagashcamantami ñucanchij huauqui panicunapaj cꞌuchullapi cashcata sintinchij. Jehová Diospish ñucanchijta achcata cꞌuyashcata, alli cuidashcatami sintinchij’ nincunami”.

 Llaquicuna tiyajpi ayudangapaj huaquichishca cullquimanta ashata japishpami Zoom nishca programata pagangapaj utilizashcanchij. Cai cullquica obra mundial nishcapaj shungumanta cushca cullquicunami can. Chaipajca donate.isa4310.com paginaman yaicushpami cullquita cuncuna. Cai cullquica llaquicuna tiyan llajtacunapi ayudangapajpishmi can. Cancuna shungumanta cullquita cushpa ayudashcamantami diosolopagui ninchij (2 Corintios 8:14).