JEHOVÄPA TESTÏGUNWAN PARLËKAN
¿Llakikuntsuraq Dios sufrinqantsikta rikämarnintsik?
Qateqninchömi rikärishun imëpis parlayanqannö juk Testïgu juk warmita parlapëkaqta. Testïgu kaqpa Michelle jutin katsun y wayiyoq kaqpana Sofïa katsun.
¿IMANIRTAQ KËKUNA PASANANTA DIOS PERMITIN?
Michelle: Buenos dias; kë tratädutam vecinïkikunata rikëkätsi. Tïtulunqa ¿Rasumpa kaqta musyëta munankimantsuraq? ninmi, qampaqmi këqa.
Sofïa: ¿Religion asuntupitaku parlan?
Michelle: Awmi. Rikäri qaranchö këkaq joqta tapukïkunata. ¿Mëqantaq gustashunkiman...?
Sofïa: Amana tapupallamënatsu. Manam tiempïkita perditsïta munätsu.
Michelle: ¿Imanirtaq tsëta ninki?
Sofïa: Rasun kaqchöqa, manam segürunatsu kä Dios kanqantapis.
Michelle: Tsënö pensanqëkita willaramanqëkitaqa agradecikoqmi. ¿Imëpis tsënöllaku pensarqunki?
Sofïa: Manam, wamra karqa iglesiaman ëwaqmi kä, peru unënam ëwänatsu.
Michelle: Entiendïmi. ¡Ah! Manaraqmi jutïta willarqoqraqtsu. Michellem jutïqa.
Sofïa: Noqaqa kä, Sofïam.
Michelle: Kushikömi reqirinqaqta, Sofïa.
Sofïa: Noqapis.
Michelle: Rikanqëkinöpis, manam noqanö creinëkipaq obligaqnikitsu shamurqö, peru tapurïnikitam munä: Dios mana kanqanta ninëkipaq, ¿imallapis pasashurqonkiku?
Sofïa: Awmi. Mamänï cärruwan accidentäkunqampitaqa 17 watanam pasarishqa.
Michelle: Tsëqa llakikïpaqmi. ¿Y alläpaku dañakushqa?
Sofïa: Awmi, kuyukïtapis manam puëdinnatsu.
Michelle: Allaw alläpachi llakitsishunki.
Sofïa: Awmi. “Dios kaptinqa, ¿imanirtaq tsëkuna pasananta jaqin? ¿Imanirtaq alläpa sufrinata permitin?” tsëkunamanmi alläpa yarpachakö.
¿MANA ALLIKU DIOSTA CUENTATA MAÑË?
Michelle: Tsënö sientikunqëki y tsëkunata tapukunqëkiqa entiendïpaqmi. Pipis tsënökunapa pasarqa, imanir tsëkuna pasanqantam musyëta munan. Tsënöllam pasarqan Diosta unë sirweq nunakunatapis (runakunatapis).
Sofïa: ¿Rasumpa?
Michelle: Awmi. ¿Rikäratsinaqta munankimantsuraq?
Sofïa: Allichi kanmi.
Michelle: Profëta Habacuc, Diosta imata tapunqanta rikäri. Leyirishun Habacuc 1:2, 3 textuta: “¿Imëyaqraq yanapamänëkipaq qayakallämushaq Teyta Dios, y qamqa manataq wiyëkallämankitsu? Mana alli rurëkuna kaptin, ¿imëyaqraq qayakamushaq salvëkämanëkipaq? Tsëpis manachi salvëkayämankitsu. ¿Imanirtaq rikätsimanki feyu llakikïkunatawan mana alli rurëkunata?”. ¿Qam tapukunqëkiwan igualanku kë tapukïkuna?
Sofïa: Awmi.
Michelle: Habacuc tsënö tapukunqampita Diosqa manam castigarqantsu, y markäkïnin (yärakuynin) pishinqantapis manam nirqantsu.
Sofïa: Tsëtaqa manam musyarqätsu.
JEHOVÄQA CHIKINMI SUFRIMIENTUTA
Michelle: Jina Bibliaqa yachatsikun, sufrimientuntsikkunata Dios rikanqanta y tsëpaq yarpachakunqantam.
Sofïa: ¿Imanötaq tsëqa?
Michelle: Tsëpaq Exodu 3:7 textuta rikäratsishqëki. ¿Leyiramunkimantsuraq?
Sofïa: Awmi. Kënömi nin: “Y Jehovämi kënö nirqan: ‘Egiptuchö këkaq markäpa llakikïninta rikarqömi, mälas trabajatsiyaptin noqaman qayakayämunqantam wiyarqö, allim musyä llakikur imanö sufrikäyanqanta’”.
Michelle: Gracias. Kë versïculu ninqannö, ¿Nunakuna sufriyanqanta rikanku Dios?
Sofïa: Ashi, rikanshi.
Michelle: Y manam karullapitatsu rikan. Versïculupa ushananta yapë rikäri. Diosmi nirqan: “Allim musyä llakikur imanö sufrikäyanqanta”. ¿Rumi shonqu y mana kuyakoq karninqa Dios tsënö ninmantsuraq?
Sofïa: Manachi.
Michelle: Rasunmi, pitapis sufrikaqta rikëllaqa, alläpa jukläyam tsë nunapa sufrimientunta rikar llakikunqantsikpita.
Sofïa: Rasunmi tsëqa.
Michelle: Tsëta ama qonqankitsu. Kananqa rikärishun Diospa markan unë tiempuchö sufrinqanta. Isaïas 63:9 textuchömi këkan. Versïculu qallananmi nin: “Llakikï tiempupa pasayaptinmi pëpis llakikurqan”. Markanta sufrikaqta rikarnin, ¿Dios llakikunqanta ninkimantsuraq?
Sofïa: Awmi, llakikunqantam nïman.
Michelle: Rasumpa kaqchöqa, Diosqa noqantsikpaq alläpam yarpachakun y manam sufrinata munantsu. Imapis llakitsimashqaqa, pëtapis llakitsinmi.
¿IMANIRTAQ IMATAPIS RURASHQATSU?
Michelle: Manaraq ëwakurmi jukta yacharatsïnikita munä.
Sofïa: Allichi kanman.
Michelle: Diospa podernimpaq Biblia imata ninqanta rikë. ¿Jeremïas 10:12 textuta leyiramunkimanku?
Sofïa: Awmi, kënömi nin: “Pëmi poderninwan kë Patsata kamashqa, jina alläpa yachëninwanmi kë Patsata takyatsishqa, y tantiyaq këninwan ciëluta kamashqa”.
Michelle: Gracias. Kë versïculuta maslla entiendirishun. ¿Mëtsika podertaraq Dios wanarqan ciëluchö llapan këkaqkunata ruranampaq aw?
Sofïa: Atskatachi wanarqan.
Michelle: Llapan rikanqantsikkunata ruranampaq Diospa podernin kaptinqa, ¿manatsuraq podernin kanman controlanampaq?
Sofïa: Awmi, kapunmanmi.
Michelle: Kananqa mamänikipaq yapë parlarishun. ¿Imanirtaq mamänikita sufreqta rikar llakikunki?
Sofïa: Porqui mamänï kaptin y kuyarninmi.
Michelle: Jampinëkipaq poderniki kaptinqa, ¿jampirinkimantsuraq?
Sofïa: Awmi, jampirimanmi.
Michelle: Tsë ima ninan kanqanta pensari. Bibliachömi yachakurquntsik sufrinqantsikta rikar Dios llakikunqanta y imëka sufrimientuntsikkunata ushakäratsinampaq podernin kanqanta. Tsënö karpis, manaran ushakätsishqaraqtsu. Tsëta rurëta puëdikarpis, sasaraqchi pëpaqqa kashqa manaraq tsëta rurëqa.
Sofïa: Manam imëpis tsënöqa pensashqatsu kä.
Michelle: Peru ¿imanirtaq manaraq tsëta rurashqaraqtsu? ¿Imallapis michantsuraq problëmantsikkunata kananyaq mana ushakätsinampaq? *
Sofïa: Manam musyätsu, itsapis.
Michelle: Celularniki waqëkan. ¿Munankimantsuraq juk junaq këpita maslla yachakurinapaq kutiramunäta?
Sofïa: Awmi, gustamanmanmi. Gracias. *
¿Biblia yachatsikunqankunapita tapukïnikikuna kanku? Testïgukunapa rurëninkuna o creenciankuna, ¿imanir tsënö kanqanta tapukurqunkiku? Tsënö kaptinqa, ¿imanirtaq pëkunawan yapë tinkurnin tapurinkitsu? Pëkunaqa kushishqam yacharatsiyäshunki.
^ par. 61 Këpita mas yachatsikïtaqa tarinki Rasumpëpaqa, ¿imatataq Biblia yachatsikun?, librupa 11 kaq capïtuluchömi, kë librutaqa Jehoväpa testïgunkunam rurayämushqa.
^ par. 64 Shamoq killa revistakunachömi, ¿imanirtaq sufrimientukuna kananta Dios permitin? neq yachatsikï yarqamunqa.