Nos komo Testigunan di Yehova ta gusta papia di asuntunan religioso ku hende di tur religion, pero nos no ta praktiká union entre religion sí, esta, adorá ku esnan ku tin otro kreensia religioso. Beibel ta mustra ku kristiannan berdadero ta “armoniosamente uní,” i e faktor prinsipal di e armonia akí ta debí ku nan ta uní den loke nan ta kere aden. (Efesionan 4:​16; 1 Korintionan 1:​10; Filipensenan 2:2) Esaki ta enbolbé mas ku djis bai eens riba e importansia di balornan manera amor, kompashon i pordon. Nos kreensianan religioso ta basá riba konosementu eksakto di Beibel. Sin e konosementu ei, nos fe lo ta enbano.​—Romanonan 10:​2, 3.

 Beibel ta bisa ku kristiannan berdadero ku adorá huntu ku hende di otro religion ta meskos ku ora dos hende ta bou di un yugo desigual, lokual ta un kombinashon robes ku lo daña un kristian su fe. (2 Korintionan 6:​14-​17) P’esei Hesus no a permití su disipelnan forma ningun union ku otro religion. (Mateo 12:30; Huan 14:6) Asina tambe, e Lei di Dios mediante Moises a prohibí e israelitanan di uni ku e nashonnan bisiña den adorashon. (Éksodo 34:11-​14) Despues, israelitanan obediente a nenga di aseptá yudansa serka un nashon bisiña pasobra esei lo a hiba na aliansa religioso ku hende di otro fe.​—Èsdras 4:​1-3.

 Sí. De echo, na aña 2023 nos a dediká 1.791.490.713 ora papiando ku hende di otro religion. Meskos ku apòstel Pablo, nos tambe ta interesá pa komprondé kreensia i manera di pensa di “mas tantu hende posibel”. (1 Korintionan 9:​19-​22) I ora nos ta kòmbersá ku nan, nos ta trata na mustra “rèspèt profundo,” manera Beibel ta konsehá.​—1 Pedro 3:​15.