KUA di e dos deklarashonnan akí bo ta pensa ta bèrdat? Hopi hende gusta e palabranan di Saulo di Tarso, konosí komo apòstel Pablo, ya ku nan ta trankilisá nan i konsolá nan. (Echonan 17:26, 27) I Beibel ta kontené mas di e tipo di deklarashonnan ei. Por ehèmpel, den un orashon, ­Hesus a duna e siguransa ku su siguidónan por siña konosé Dios i haña su bendishon.—Huan 17:3.

Pero, filósofonan manera Filo tin un otro punto di bista. Pa nan, hende no por siña konosé Dios pasobra nan no por kaba di komprond’é. Pero kiko ta bèrdat?

Segun Beibel, tin kosnan tokante Dios ku bèrdat ta difísil pa hende komprondé. Por ehèmpel, nos no por komprondé, deskribí ni kalkulá largura di e Kreador su eksistensia, kapasidat di su mente ni profundidat di su sabiduria. E kosnan ei simplemente ta fuera di nos kapasidat pa komprondé. Pero esei no ta stroba nos di siña konos’é. Es mas, ora nos meditá riba nan, nan por yuda nos “hala serka Dios.” (Santiago 4:8) Ban analisá awor algun aspekto di Dios ku nos no por komprondé. Despues nos lo analisá algun ku sí nos por komprondé.

SU EKSISTENSIA ETERNO: Beibel ta siña ku Dios ta eksistí “for di eternidat te na eternidat.” (Salmo 90:2) Ku otro palabra, e no tabatin un komienso i lo no tin un fin tampoko. Pues, for di un punto di bista humano, “e kantidat di su añanan ta inkalkulabel.”—Yòb 36:26.

Kon esei ta yuda bo? Dios ta primintí bo ku bo por haña bida eterno si bo siña konos’é bon. (Huan 17:3) Un promesa asina lo no ta muchu konfiabel si Dios mes no por biba pa semper, no ta bèrdat? Ta “e Rei di eternidat” so por kumpli ku un promesa asina.—1 Timoteo 1:17.

SU MENTE: Beibel ta siña ku Dios su “komprondementu ta inskudriñabel” pasobra su pensamentunan ta hopi mas haltu ku esnan di nos. (Isaías 40:28; 55:9) Ku rason Beibel ta hasi e siguiente pregunta retóriko: “Ken a siña konosé e mente di Yehova pa e instruyé?”—1 Korintionan 2:16.

Kon esei ta yuda bo? Dios por skucha miónes di orashon pareu. (Salmo 65:2) E ta tuma nota di asta kada mòfi ku kai na suela. Bo ta kere ku un dia Dios lo ta asina okupá ku lo e no por tuma nota di bo ni skucha bo orashonnan? Nò, pasobra su mente no tin un límite. Ademas, pa Dios, bo “ta bal mas ku hopi mòfi.”—Mateo 10:29, 31.

SU MANERA DI HASI KOSNAN: Beibel ta siña ku hende no “por haña sa e trabou ku Dios a hasi for di prinsipio te na fin.” (Eklesiástes 3:11) Pues, hamas nos lo por haña sa tur kos di Dios. E sabiduria ku Dios ta hasi kosnan kuné ta “ininvestigabel.” (Romanonan 11:33) Pero Dios ta dispuesto pa revelá su kamindanan na esnan ku ke agrad’é.—Ámos 3:7.

Kon esei ta yuda bo? Si bo lesa i analisá Beibel, nunka lo bo kaba di siña kos nobo di Dios i su manera di hasi kosnan. Esaki ke men ku nos por hala mas serka di nos Tata selestial pa tur eternidat.

Djis pasobra nos no por komprondé sierto aspekto di Dios kompletamente no ta nifiká ku nos no por siña konos’é. Beibel tin sufisiente informashon ku ta yuda nos konosé Dios mihó. Ban wak algun ehèmpel.

SU NÒMBER: Beibel ta siña ku Dios a duna su mes un nòmber. El a bisa: “Ami ta Yehova. Esei ta mi nòmber.” Dios su nòmber ta aparesé mas ku 7.000 biaha den Beibel, mas ku kualke otro nòmber. *—Isaías 42:8, NW.

Kon esei ta yuda bo? Hesus a bisa den e Orashon di Nos Tata: “Nos Tata ku ta den shelu, bo nòmber sea santifiká.” (Mateo 6:9) Bo tambe lo por usa Dios su nòmber den bo orashonnan? Yehova ke salba tur hende ku ta mustra e debido rèspèt pa su nòmber.—Romanonan 10:13.

SU LUGÁ DI BIBA: Beibel ta siña ku tin dos lugá di biba: un region spiritual kaminda kriaturanan spiritual ta biba i e “mundu” físiko ku ta konsistí di nos planeta i universo. (Huan 8:23; 1 Korintionan 15:44) Den Beibel, e palabra “shelu” hopi biaha ta referí na e region spiritual. E “lugá di biba” di e Kreador ta den “shelu.”—1 Reinan 8:43.

Kon esei ta yuda bo? Bo ta haña un mihó bista di kon Dios ta. E Kreador no ta un forsa deskonosí ku ta tur kaminda i den tur kos. Yehova ta un Persona real ku ta biba den un lugá real. Tòg, “no tin ningun kreashon ku ta skondí for di su bista.”—Hebreonan 4:13.

SU PERSONALIDAT: Beibel ta siña ku Yehova tin kualidatnan ku ta atraé nos na dje. Por ehèmpel, Beibel ta bisa ku “Dios ta amor.” (1 Huan 4:8) Ademas, Dios no por gaña, e no ta hasi distinshon di persona, e ta yen di kompashon i grasia i e no ta rabia lihé. (Tito 1:2; Éksodo 34:6; Echonan 10:34) I loke ta sorprendé hopi hende ta e echo ku e Kreador ta deseá di tin un amistat será ku esnan ku ta respet’é.—Salmo 25:14.

Kon esei ta yuda bo? Abo por bira amigu di Yehova. (Santiago 2:23) I miéntras bo ta sigui siña konosé Yehova su personalidat, lo bo bai komprondé e relatonan di Beibel mihó.

Beibel ta deskribí bon kla kon Yehova Dios ta. Yehova ta leu di ta un misterio, e Kreador ke pa bo konos’é. Su Palabra ta primintí: “Si bo busk’é, e lo laga bo hañ’é.” (1 Krónikanan 28:9) Pakiko no lesa i meditá riba relatonan di Beibel pa bo siña konosé Dios? Beibel ta primintí ku si bo hasi esei, Dios lo ‘hala serka bo.’—Santiago 4:8.

Pero kisas bo ta puntra bo mes: ‘Ya ku mi no por komprondé tur kos di e Kreador, kon mi por bira su amigu?’ Pensa riba esaki: E mihó amigu di un siruhano tambe mester tin un diploma den medisina? Klaru ku nò! Kisas e amigu di e siruhano tin un profeshon kompletamente diferente, pero tòg nan por ta bon amigu. Loke ta konta ta ku e amigu di e siruhano konosé e siruhano su personalidat, loke e ta gusta i loke e no ta gusta. Meskos tambe, bo por siña for di Beibel ki klase di persona Yehova ta, nèt loke bo tin mester pa sera un amistat kuné.

Beibel no ta djis duna un deskripshon vago di e Kreador. E ta kontené informashon ku nos tin mester pa siña konosé Dios. Abo lo ke siña mas tokante Yehova Dios? Testigunan di Yehova ta ofresé kurso di Beibel grátis na kas. Nos ta invitá bo pa tuma kontakto ku e Testigunan den bo área òf bishitá nos website, www.isa4310.com/pap.