KON lo bo reakshoná si un hende bisa bo ku “pronto lo no tin desaster mas”? Probablemente lo bo kontest’é: “Ta soña bo ta soña? Pasobra desaster natural ta parti di bida.” Òf kisas lo bo pensa den bo mes: ‘Ta ken e ta kere ku e ta gaña?’

Wèl, aunke ta parse ku desaster natural lo sigui asotá e mundu akí, nos tin bon motibu pa kere ku pronto lo bini un kambio. Pero no ta hende lo trese e kambio akí. Hende no tin e kapasidat pa komprondé kompletamente di ki manera i pakiko sierto kosnan ta sosodé den naturalesa, te pa nan kontrolá òf evitá esakinan. Rei Sálomon di Israel di antigwedat, kende tabata konosí pa su sabiduria i disernimentu, a skirbi: “Hende no por deskubrí e obra ku a wòrdu hasí bou di solo. Maske kuantu esfuerso hende hasi pa buska, e lo no deskubrí esaki; i maske hende sabí bisa: ‘Mi sa,’ e no por deskubrí esaki.”—Eklesiástes 8:17.

Awor, si hende no por stòp desaster natural di sosodé, ken sí por? Beibel ta mustra ku ta nos Kreador so por hasi esei. E ta Esun ku a hinka e sistema ekológiko di tera den otro, ku ta inkluí entre otro e siklo di awa. (Eklesiástes 1:7) I distinto for di hende, Dios tin tur poder. Pa konfirmá esaki, profeta Yeremías a bisa: “Ai Señor DIOS! Mira, ta abo a traha e shelunan i tera pa medio di bo gran poder i pa medio di bo brasa ekstendí! Nada ta muchu difísil pa bo.” (Yeremías 32:17) Sí, ta Dios a traha tera i tur su elementonan; pues ta lógiko ku e sa presis kiko e mester hasi pa hende por tin pas i siguridat aki na tera.—Salmo 37:11; 115:16.

Awor kon Dios lo realisá e kambio nesesario akí? Kisas bo ta kòrda ku den e di dos artíkulo di e seri akí nos a bisa ku e tantísimo kosnan horibel ku ta sosodé riba tera awendia ta parti di un “señal” ku ta indiká e “konklushon di e era akí.” Anto Hesus a bisa: “Ora boso mira e kosnan akí sosodé, boso por ta sigur ku e Reino di Dios ta serka.” (Mateo 24:3; Lukas 21:31) E Reino di Dios, ku ta un gobièrnu instituí pa Dios, lo trese kambionan grandi riba tera. Lo e tin tur fenómeno di naturalesa bou di kontrol. I maske Yehova Dios mes tin poder pa hasi tur e kosnan ei, tòg el a opta pa delegá e trabou akí na su Yu. Papiando di e Yu ei, profeta Daniel a bisa: “Na dje a wòrdu duná dominio, gloria i un reino, pa tur pueblo, nashon i hende di tur idioma por sirbié.”—Daniel 7:14.

Sí, Dios a duna su Yu, Hesukristu, poder pa trese tur kambio nesesario pa asina tera  por ta un dushi lugá di biba. I ta for di tempu ku Hesus tabata riba tera, un dos mil aña pasá, el a demostrá riba un eskala chikitu ku e tin poder pa dominá fenómenonan di naturalesa. Por ehèmpel, na un okashon ku Hesus i su disipelnan tabata den boto riba Laman di Galilea, “a lanta un bientu masha fuerte mes, i e olanan a keda bati kontra e boto, di manera ku e boto tabata serka di senk.” Hesus su disipelnan a spanta; nan a kere ku nan tabata bai muri, i p’esei nan a akudí na Hesus pa yudansa. Kiko Hesus a hasi? El a “skual bientu i a bisa laman: ‘Silensio! Keda ketu!’ I bientu a baha i a kalma kompletamente.” Su disipelnan a keda asombrá i a puntra: “Ta ken esaki ta anto? Pasobra asta bientu i laman ta obedes’é!”—Marko 4:37-41.

Despues di Hesus su estadia riba tera, Dios a hals’é na shelu i a dun’é asta mas poder i outoridat. Komo Rei di Dios su Reino, Hesus tin tantu e responsabilidat komo e kapasidat di realisá tur e kambionan nesesario pa hende por disfrutá di un bida trankil i sigur aki riba tera.

Sinembargo, manera nos a mira kaba, ta hende su golosidat i egoismo ta kousa òf empeorá hopi di e problema- i desasternan ku ta afektá humanidat. Kiko e Reino di Dios lo hasi ku e hendenan ku ta hasi e kosnan ei i ku ta nenga di hasi kambio? Beibel ta bisa ku Señor Hesus lo bini ‘for di shelu huntu ku su angelnan poderoso den un vlam di kandela. Lo e trese vengansa riba esnan ku no konosé Dios i riba esnan ku no ta obedesé e bon notisia tokante nos Señor Hesus.’ Sí, lo e “kaba ku esnan ku ta kaba ku e tera.”—2 Tesalonisensenan 1:7, 8; Revelashon 11:18.

Despues di esei, e “Rei di reinan,” esta Hesukristu, lo tin pleno kontrol riba e forsanan di naturalesa. (Revelashon 19:16) Lo e hasi sigur ku niun súpdito di Reino lo sufri pa motibu di kalamidat. Lo e usa su poder pa regulá e kondishonnan di klima di tal manera ku tantu e wer komo e temporadanan di aña lo benefisiá humanidat. Pues, loke Yehova Dios a primintí su pueblo hopi tempu pasá lo kumpli: “Lo mi duna boso áwaseru na su tempu, asina ku e tera lo duna su kosecha i e palunan di kunuku lo karga nan fruta.” (Levítiko 26:4) Hende lo traha kas, i nan lo no tin miedu di pèrdè esaki den un ke otro kalamidat. Sí, “nan lo traha kas i biba den nan; tambe nan lo planta kunukunan di wendrùif i kome nan fruta.”—Isaías 65:21.

Sin duda, abo, meskos ku hopi hende mas, ta gusta e idea di por biba den un mundu kaminda lo no tin desaster mas. Pero kiko bo tin ku hasi pa biba den un mundu asina? Wèl, manera nos a mira kaba, “esnan ku no konosé Dios” i “esnan ku no ta obedesé e bon notisia” no ta apto pa biba den e benidero mundu, ku lo ta liber di desaster. Pues ta klaru anto ku pa nos por biba den e mundu ei, for di awor nos tin ku siña tokante Dios i apoyá su Reino. Sí, Dios ke pa nos siña konos’é i obedesé e bon notisia di e Reino ku el a establesé pa medio di su Yu.

E mihó manera pa nos siña kon pa hasi esei ta mediante un estudio profundo di Beibel. Beibel ta kontené instrukshonnan ku ta yuda nos kualifiká pa biba bou di e gobernashon di e Reino di Dios, den un ambiente kaminda lo reina pas i trankilidat. P’esei, pakiko no pidi Testigunan di Yehova yuda bo komprondé kiko Beibel ta siña? Nan ta kla pa yuda bo. Un kos ta sigur: si bo hasi esfuerso pa konosé Dios i obedesé e bon notisia, e palabranan di Proverbionan 1:33 lo kumpli den bo kaso tambe: “Esun ku skucha mi lo biba konfiadamente, i lo biba trankil, sin miedu di [“kalamidat,” NW].”