1, 2. Na kontraste ku e iglesianan di kristiandat, kon Testigunan di Yehova ta mira e nòmber di Dios?

POR LO GENERAL, iglesianan di kristiandat ta evitá di usa e nòmber di Dios. Por ehèmpel, e Beibel na ingles, Revised Standard Version, ta bisa den su prólogo: “Pa e fe universal di e Iglesia Kristian ta kompletamente inapropiá pa yama e úniko Dios ku tin na un nòmber.”

² Testigunan di Yehova, di otro banda, ta orguyoso di por karga e nòmber di Dios i glorifik’é. * (Lesa Salmo 86:12; Isaías 43:10.) Ademas, e echo ku nos por komprondé e nifikashon di e nòmber ei i sa pakiko ta asina importante pa santifik’é ta un privilegio. (Mat. 6:9) Pero esei no ta kualke privilegio! P’esei, laga nos konsiderá tres pregunta importante: Kiko ta nifiká konosé e nòmber di Dios? Kon Yehova a demostrá ku e ta digno di su gran nòmber? I kon nos por kana den e nòmber di Yehova?

3. Kiko ta nifiká konosé e nòmber di Dios?

³ Konosé e nòmber di Dios ta enserá muchu mas ku djis sa ku su nòmber ta “Yehova.” E ta enserá sa ki klase di Dios Yehova ta, kiko ta su kualidatnan, kiko ta su propósito, kiko e ta hasi i spesialmente e manera ku e ta trata hende. Segun ku Yehova a kumpli ku su propósito, el a revelá gradualmente ki klase di Dios e ta. (Pro. 4:18) Yehova a revelá su nòmber na e promé pareha humano. Nos sa esei pasobra Eva a us’é despues ku el a duna lus na Kain. (Gén. 4:1) E patriarkanan fiel manera Noe, Abraham, Isak i Yakòb tambe tabata sa e nòmber di Dios. Ademas, nan a siña mas tokante e klase di Dios ku Yehova ta segun ku nan a mira kon el a bendishoná nan, perkurá pa nan i revelá vários aspekto di su propósito  na nan. Mas despues Dios a revelá na Moises algu spesial tokante e nifikashon di su nòmber.

4. Dikon Moises a puntra Dios pa su nòmber, i dikon Moises tabatin motibu di tabata un poko preokupá?

⁴ Lesa Éksodo 3:10-15. Ora Moises tabatin 80 aña di edat, Dios a dun’é un mandamentu importante: “Saka mi pueblo, e yunan di Israel, for di Egipto.” E ora ei Moises a hasi Dios un pregunta ku un nifikashon profundo: ‘Si e israelitanan puntra mi kon ta bo nòmber, kiko mi mester bisa nan?’ Pakiko Moises a hasi e pregunta ei, siendo ku e nòmber di Dios tabata konosí pa hopi tempu kaba? Evidentemente, Moises kier a sa mas tokante e persona ku e nòmber ei a representá. Asina lo e por a konvensé e israelitanan ku di bèrdat Dios por a libra nan. I nos por komprondé dikon Moises lo tabata un poko preokupá. E israelitanan tabata esklabo pa hopi tempu, i kisas nan a duda ku e Dios di nan antepasadonan lo por a libra nan. De echo, algun di nan asta tabata adorá e diosnan di Egipto!—Eze. 20:7, 8.

5. Kiko Yehova a revelá tokante su nòmber na Moises?

⁵ Kiko Yehova a kontestá Moises? Segun e Tradukshon di Mundu Nobo, el a bisa Moises: “Esaki ta loke bo tin ku bisa e yunan di Israel: ‘LO MI RESULTÁ DI TA a manda mi serka boso.’” * Anto el a agregá: “Yehova e Dios di boso antepasadonan . . . a manda mi serka boso.” Ku e palabranan ei, Yehova a revelá algu importante tokante su mes. Lo e bira loke sea ta nesesario òf hasi loke sea e mester hasi pa e por kumpli ku su propósito, i ku e ta un Dios ku semper ta kumpli ku su palabra. P’esei, den versíkulo 15 nos ta lesa ku Yehova a bisa di su mes: “Esaki ta mi nòmber te na tempu indefiní, i esaki ta e memoria di mi pa generashon tras di generashon.” E revelashon ei sigur lo mester a impreshoná Moises profundamente i fortalesé su fe.

6, 7. Kon Yehova a demostrá ku e ta digno di su nòmber?

⁶ Djis despues ku Yehova a papia ku Moises, el a demostrá ku e ta digno di su nòmber, ‘resultando di ta’ un Libertador pa e pueblo di Israel. El a humiá Egipto ku dies plaga devastador, ku a la bes a demostrá ku Fárao i e diosnan di Egipto tabata impotente. (Éks. 12:12) Kaba Yehova a habri Laman Kòrá, laga e pueblo di Israel pasa dor di dje, pa despues hoga Fárao i su forsa militar den  dje. (Sal. 136:13-15) Den e “desierto grandi i teribel,” Yehova a “resultá di ta” un Salbador di bida ora el a duna su pueblo, ku tabata konsistí di miónes di hende, kuminda i awa. Asta el a sòru pa nan paña- i sandalianan no gasta. (Deu. 1:19; 29:5) Sí, no tin nada ku por stroba Yehova di kumpli ku loke el a primintí i asina demostrá ku e ta digno di su nòmber inkomparabel. Mas despues, el a bisa Isaías: “Ami, sí, ami mes, ta [Yehova], i no tin otro salbador fuera di mi.”—Isa. 43:11.

⁷ Otro hòmber ku tabata testigu di e obranan poderoso ku Yehova a realisá na Egipto i den desierto tabata Hosue, susesor di Moises. P’esei, ora Hosue tabata yegando na fin di su bida, e por a bisa e israelitanan ku konvikshon: “Boso sa di henter boso kurason i di henter boso alma ku ni un palabra di tur e bon palabranan ku [Yehova] boso Dios a papia tokante di boso no a faya; tur a keda kumplí pa boso, ni un di nan no a faya.” (Hos. 23:14) Sí, Yehova no a laga duda ku e ta un Dios di su palabra.

8. Kon Yehova ta demostrando ku e ta digno di su nòmber den nos tempu?

⁸ Awe tambe Yehova ta demostrando ku e ta digno di su nòmber. El a profetisá pa medio di su Yu ku durante e último dianan e mensahe di Reino lo ser prediká “den henter e tera habitá.” (Mat. 24:14) Ta Yehova so por a papia adelantá di un obra asina, hasi sigur ku e ta tuma lugá i usa prinsipalmente ‘hende gewon sin muchu edukashon’ pa realis’é. (Echo. 4:13) Pues, ora nos ta prediká e bon notisia, nos ta yuda profesia di Beibel kumpli. Nos ta onra nos Tata i ta demostrá ku nos ta para tras di e palabranan ku nos ta pidi den orashon: “Bo nòmber sea santifiká. Laga bo Reino bini. Laga bo boluntat sosodé, meskos ku den shelu, tambe riba tera.”—Mat. 6:9, 10.

9, 10. Kiko mas nos ta siña tokante Yehova for di su manera di trata Israel?

⁹ Djis despues ku Israel a sali for di Egipto, Yehova a revelá mas kos tokante su mes na nan. Yehova a sera e pakto di Lei ku nan i a primintí nan ku lo e sòru pa nan meskos ku un esposo ta sòru pa su esposa. E israelitanan, na nan turno, a bira su esposa figurativo, un pueblo pa su nòmber. (Isa. 54:5, 6) Si nan a someté nan na dje i obedesé su mandamentunan, lo el a resultá di ta e ‘Esposo’ perfekto pa nan. Lo el a bendishoná nan, protehá nan i duna nan pas. (Num. 6:22-27) E nashonnan lo a sa e ora ei ku no tin ningun Dios manera Yehova i lo glorifiká su nòmber. (Lesa Deuteronomio 4:5-8; Salmo 86:7-10.) Sí, atraves di e historia di Israel, hopi stranhero a kuminsá adorá Yehova. Den un sentido, nan a bisa loke  Rut, e moabita, a bisa Noemí: “Bo pueblo lo ta mi pueblo, i bo Dios, mi Dios.”—Rut 1:16.

¹⁰ Pa mas o ménos 1.500 aña, Yehova su manera di trata ku Israel a revelá hopi aspekto nobo di su personalidat. Apesar ku e nashon a desobedes’é bes tras bes, Yehova a resultá di ta ‘un Dios yen di kompashon, ku no ta rabia lihé.’ E tabatin gran pasenshi ku nan. (Éks. 34:5-7) Pero Yehova su pasenshi tabatin un límite, i e límite ei a yega ora e nashon hudiu a rechasá su Yu i mat’é. (Mat. 23:37, 38) E desendientenan natural di Israel ya no tabata e pueblo ku Dios a skohe pa karga su nòmber. Den bista di Yehova, nan tabata morto spiritualmente, manera un palu ku a seka. (Luk. 23:31) Ki efekto esaki tabatin riba nan aktitut pa ku e nòmber di Dios?

11. Dikon e nashon hudiu a stòp di usa e nòmber di Dios?

¹¹ Ku tempu, e hudiunan a bin haña un idea inkorekto enkuanto e nòmber di Dios. Nan a pensa ku e nòmber di Dios ta asina santu ku nan no mester a ni pronunsi’é. (Éks. 20:7) Pokopoko pero sigur, nan a stòp di usa e nòmber di Dios. Yehova lo mester a sintié tristu pa e falta di rèspèt ku nan a mustra pa su nòmber. (Sal. 78:40, 41) Sinembargo, Dios, “kende su nòmber ta Yalurs,” sigur lo no a sigui konektá su nòmber ku un pueblo ku a rechas’é i ku é, na su turno, a rechasá. (Éks. 34:14) E echo akí ta siña nos ku ta sumamente importante pa trata nos Kreador su nòmber ku rèspèt profundo.

12. Kon Yehova a produsí e pueblo pa karga su nòmber ku el a profetisá di dje?

¹² Pa medio di Yeremías, Yehova a revelá su propósito pa sera “un aliansa [òf, pakto] nobo” ku un nashon nobo, esta, Israel spiritual. Manera Yeremías a profetisá, tur su miembronan, “for di esun di mas ménos te na esun di mas grandi,” lo ‘konosé Yehova.’ (Yer. 31:31, 33, 34) E profesia ei a kuminsá kumpli na Pentekòste di aña 33 di promé siglo ora Dios a sera e pakto nobo. E nashon nobo, “e Israel di Dios,” ku a inkluí tantu hudiu komo hende ku no tabata hudiu, a bira “un pueblo pa karga [Dios] su nòmber,” manera Yehova a bisa.—Gal. 6:16; lesa Echonan 15:14-17; Mat. 21:43.

13. (a) E promé kristiannan tabata usa e nòmber di Dios? Kon nos por sa esei? (b) Kon abo ta mira e privilegio di por usa e nòmber di Yehova den bo sirbishi?

¹³ Komo e ‘pueblo ku ta karga Dios su nòmber,’ e miembronan di e nashon spiritual ei a usa e nòmber divino. Por ehèmpel, nan a hasi esei ora nan a sita for di e Skritura Hebreo. * Pues, ora apòstel Pedro tabata papia ku un grupo grandi di hudiu i hende ku a kombertí i bira hudiu na Pentekòste di aña 33, el a usa e nòmber di Dios vários biaha. (Echo. 2:14, 20, 21, 25, 34) Komo ku e promé kristiannan a onra Yehova, el a bendishoná nan trabou di prediká. Awe tambe, Yehova ta bendishoná nos sirbishi ora nos ta proklamá su nòmber i mustr’é na otro hende, si ta posibel, den nan mes Beibel. Asina nos ta laga nan sera konosí ku e Dios berdadero. Esei ta un gran privilegio, tantu pa nan komo pa nos! Pa esnan ku siña konosé Dios, esei por ta komienso di un amistat maravioso ku Yehova ku lo krese bira fuerte i dura pa semper.

14, 15. Apesar ku apostasia a plama, kiko Yehova a hasi tokante su nòmber?

¹⁴ Mas despues, foral despues di morto di e apòstelnan, apostasia a kuminsá korumpí e kongregashon kristian di promé siglo. (2 Tes. 2:3-7) Maestronan falsu a bai  asina leu di adoptá e tradishon hudiu di no usa e nòmber di Dios. Pero Yehova lo a laga su nòmber bai pèrdí? Hamas! Ta bèrdat ku kisas nos no sa eksaktamente kon nan tabata pronunsiá e nòmber di Dios den pasado, pero su nòmber a sobrebibí. Atraves di siglonan, e nòmber di Dios a aparesé den hopi tradukshon di Beibel i tambe den obranan skirbí di eruditonan di Beibel. Por ehèmpel, na aña 1757, Charles Peters a skirbi ku e nifikashon di e nòmber di Dios ta deskribí e klase di Dios ku Yehova ta mihó ku kualke título. Den un buki di 1797 tokante adorashon di Dios, Hopton Haynes a kuminsá kapítulo 7, bisando: “YEHOVA ta e nòmber apropiá di DIOS entre e hudiunan; e so nan tabata adorá, meskos ku Kristu i su Apòstelnan tambe a hasi.” Henry Grew (1781-1862) no solamente a usa e nòmber di Dios, sino a rekonosé tambe ku hende a tira reproche riba dje i ku mester a santifik’é. Asina tambe, George Storrs (1796-1879), un sosio íntimo di Charles T. Russell, a usa e nòmber di Dios, meskos ku Russell mes tambe.

¹⁵ Aña 1931 tabata partikularmente notabel, pasobra e aña ei e Studiantenan Internashonal di Beibel, manera Dios su pueblo tabata yama e tempu ei, a adoptá e nòmber bíbliko Testigunan di Yehova. (Isa. 43:10-12) Di e manera ei nan a anunsiá na mundu ku nan ta orguyoso di por ta sirbidó di e úniko Dios berdadero, di por ta “un pueblo ku ta karga su nòmber,” pa alabá su nòmber. (Echo. 15:14) E desaroyonan akí ta laga nos kòrda e palabranan di Yehova ku nos por haña na Malakías 1:11: “For di ora solo sali te ora ku e drenta, mi nòmber lo ta grandi meimei di e nashonnan.”

16. Dikon ta un onor di por kana den e nòmber di Yehova?

¹⁶ Profeta Mikéas a skirbi: “Tur e pueblonan ta kana kada un den e nòmber di su dios, ma pa loke ta nos, nos sí lo kana den e nòmber di [Yehova] nos Dios pa semper i semper.” (Mik. 4:5) E echo ku Yehova a laga e Studiantenan di Beibel adoptá su nòmber tabata mas ku djis un gran onor. Esei a duna nan e konfiansa tambe ku nan tabatin su aprobashon. (Lesa Malakías 3:16-18.) Pero kiko di abo mes? Bo ta hasi esfuerso pa ‘kana den e nòmber di Yehova’? Bo ta komprondé kiko esei ta enserá?

17. Kiko kana den e nòmber di Dios ta enserá?

¹⁷ ‘Kana den e nòmber di Yehova’ ta enserá por lo ménos tres kos. Di promé, nos mester proklamá e nòmber ei na otro hende, rekonosiendo ku ta solamente esnan ku “invoká e nòmber di Yehova lo ser salbá.” (Rom. 10:13) Di dos, nos tin ku imitá Yehova su kualidatnan, spesialmente su amor. (1 Huan 4:8) I di tres, nos ta kana den e nòmber di Dios ora ku nos ta someté nos boluntariamente na e normanan hustu di Dios, i di e manera ei ta onra nos Tata su nòmber santu. (1 Huan 5:3) Abo ta desididu pa ‘kana den e nòmber di Yehova nos Dios pa semper i semper’?

18. Pakiko tur hende ku ta onra e gran nòmber di Yehova por mira futuro ku konfiansa?

¹⁸ Pronto tur hende ku no ta hasi kaso di Yehova òf ku ta rebeldiá kontra dje lo haña nan fòrsá ta rekonosé ken e ta. (Eze. 38:23) Den nan lo tin hende ku ta manera Fárao, kende a bisa: ‘Ta ken ta Yehova ku mi mester obedesé su bos?’ No a dura muchu pa el a haña sa esei! (Éks. 5:1, 2; 9:16; 12:29) Pero nos sí a skohe pa siña konosé Yehova. Nos ta orguyoso di ta parti di e pueblo obediente ku ta karga su nòmber. P’esei, nos ta wak futuro ku konfiansa den e promesa ku ta pará skirbi na Salmo 9:10: “Esnan ku konosé bo nòmber lo pone nan konfiansa den bo, pasobra abo, o [Yehova], no a bandoná esnan ku ta buska bo.”