Bo a yega di puntra bo mes kiko ta spera abo i bo famia den futuro? Lo bo bira riku òf pober? Lo bo tin hende pa stima bo òf lo bo ta bo so? Lo bo biba largu òf lo bo pèrdè bo bida inesperadamente? Pa míles di aña hende a hasi nan mes e preguntanan ei.

Awendia, tin eksperto ku ta studia e desaroyo- i kambionan ku tin influensia riba hopi nashon, i nan ta pronostiká futuro a base di esei. Tin hopi kos ku nan a pronostiká ku a sosodé, pero nan a faya vários biaha tambe, i tin biaha, nan a faya barbaramente. Por ehèmpel, na 1912, Guglielmo Marconi, kende a inventá telegrafia sin kabel, a pronostiká ku “lo no tin guera mas debí na e era di teknologia sin kabel ku nos ta bai drenta.” I un representante di Decca Record Company, kende a rechasá e banda Beatles na 1962, a kere ku e bandanan ku ta toka guitara lo pèrdè nan fama.

Hopi hende ta akudí na fuente sobrenatural pa haña sa kiko lo sosodé den futuro. Tin hende ta buska konseho serka astrólogo. De echo, horoskop ta sali regularmente den hopi revista i korant. I tin hende ta konsultá miradó di destino òf medio spiritista, kendenan ta bisa ku nan por wak karta tarot i number òf lesa plant’i man pa haña sa futuro.

Den pasado, algun hende tabata konsultá orákulo, esta, saserdote hòmber i muhé ku tabata duna informashon ku supuestamente nan tabata haña for di e dios ku nan ta representá. Por ehèmpel, ta ser bisá ku Rei Kreso di Lidia a manda regalo hopi kostoso pa e orákulo di Delfos, Gresia, pa e haña sa kiko lo pasa si e bringa kontra Siro di Persia. E orákulo a bisa ku si Kreso bringa kontra Siro, “un imperio grandi” lo ser destruí. P’esei Kreso a bai bringa kontra Siro ku yen di konfiansa ku lo e gana. Pero e imperio grandi ku a ser destruí ta esun di Kreso mes.

E pronóstiko konfuso di e orákulo tabata inútil, pasobra e pronóstiko lo a kumpli sin importá ken a gana e bataya. Kreso a pèrdè tur kos debí na e informashon robes ei. Kiko di awe? Hende ku ta akudí na otro métodonan pa pronostiká futuro ta haña mihó resultado?