Astrologia ta un forma di adivinashon basá riba e kreensia ku e streanan, luna i e planetanan tin hopi influensia riba bida di hende aki riba tera. Astrólogonan ta bisa ku e posishon di e kuerponan selestial na momento ku un hende nase ta determiná su personalidat i futuro.

Aunke astrologia a originá na Babilonia di antigwedat, e ta popular te awe. Segun un enkuesta ku nan a hasi na Merka na aña 2012, mas o ménos 33 porshento di e hendenan ku a partisipá den e enkuesta tabata pensa ku astrologia ta “parse algu sientífiko,” i 10 porshento a bisa ku e “ta sientífiko.” Pero e ta algu sientífiko? Nò. Ban wak dikon.

• E planeta- i streanan no tin poder pa influensiá hende manera e astrólogonan ta bisa.

• Hopi biaha loke e astrólogonan ta pronostiká ta asina general ku esaki por apliká na kualke persona.

• E kalkulashonnan astrológiko ku nan ta hasi ta basá riba e kreensia di ántes ku e planetanan ta drei rònt di tera. Pero e planetanan ta drei rònt di solo.

• Loke diferente astrólogo ta pronostiká pa e mesun hende no ta kuadra ku otro.

• Astrologia ta pone kada hende den ún di e 12 kategorianan, òf signonan di zodiak, segun nan fecha di nasementu; kada fecha ta basá riba posishon di solo. Komo ku e posishon di planeta Tera a kambia den espasio atraves di siglo, e fechanan ku nan a duna kada signo di zodiak ya no ta kuadra mas ku e nòmber ku nan a haña segun e posishon di solo den e konstelashonnan.

Ta ser bisá ku e signonan di zodiak por yuda un hende haña sa e karakter di un persona. Pero hende ku a nase riba e mesun dia no tin e mesun kualidatnan; e fecha di nasementu di un hende no ta bisa nada di su personalidat. En bes di mira hende manera nan ta realmente, astrólogonan ta husga un persona su komportashon i karakter a base di nan propio idea relashoná ku e signonan di zodiak. Akaso esei no ta un forma di prehuisio?

Pa hopi tempu kaba hende ta akudiendo na miradó di destino. Algun miradó di destino ta buska nifikashon den, entre otro, shirishiri di bestia i di hende òf den e manera ku gai ta kome maishi. I tin miradó di destino ku ta pronostiká futuro a base di patronchi di kachikachi di te òf di kòfi ku a keda den un kòpi. Awe nan ta usa karta di tarot, bola di kristal, dou i otro medionan pa wak futuro di un hende. Pero esaki ta un manera konfiabel pa haña sa futuro? Klaru ku nò. Ban wak algun motibu.

Miradónan di destino no ta konsistente. Hopi biaha ora e miradónan di destino usa diferente método pa pronostiká futuro, nan ta kontradisí otro. I asta ora nan usa e mesun método, loke nan ta pronostiká no ta meskos. Por ehèmpel, si un hende hasi e mesun pregunta na dos miradó di destino ku ta usa e mesun tipo di karta, lógikamente e kontesta mester ta meskos. Pero mayoria di biaha, esei no ta e kaso.

Tantu e métodonan ku e miradónan di destino ta usa komo nan intenshonnan ta kuestionabel. Algun hende ta bisa ku e miradónan di destino ta opservá reakshon di hende i asina ta saka nan konklushon i ku e kartanan òf bolanan di kristal ku nan ta usa ta djis pa prònk. Por ehèmpel, un miradó di destino profeshonal lo hasi pregunta general i ta wak bon kiko e kliente ta bisa òf hasi. Despues, e miradó di destino ta usa e mesun informashon ei ku e kliente mes a kaba di revelá na dje, sin ku el a ripará, pa pronostiká su futuro. Unabes e miradó di destino a gana konfiansa di su kliente, e por ranka masha hopi plaka for di dje.

E práktika di astrologia i wakmentu di destino ta basá riba e kreensia ku nos futuro ta predestiná. Pero esei ta bèrdat? Beibel ta bisa ku nos por skohe kiko nos ke hasi i kere i ku nos desishonnan tin efekto riba nos futuro.—Hosue 24:15.

E sirbidónan di Dios tin un motibu mas pakiko nan no ta kere den astrologia i wakmentu di destino: Dios ta kondená tur forma di adivinashon. Beibel ta bisa: “Entre boso no mag wòrdu haña ningun hende . . . ku ta praktiká adivinashon òf ku ta praktiká bruheria, òf ku ta pronostiká, òf ku ta praktiká magia, ni ningun hende ku ta plega hende, òf ku ta montadó òf spiritista, òf ku ta konsultá ku e mortonan. Pasobra ken ku hasi e kosnan akí ta un abominashon na SEÑOR.” a—Deuteronomio 18:10-12.