Hopi bes, ta uza e expresion “bon Samaritano” pa describi un persona cu ta yuda otro hende cu ta den necesidad. E expresion ey a bin di un ilustracion cu Hesus a conta pa mustra cu un bon prohimo ta trata otro hende cu misericordia, sin importa e otro hende su nacionalidad of cultura.

Den e articulo aki, nos lo contesta e siguiente preguntanan:

•  Kico ta e relato di e “bon Samaritano”?

•  Dicon Hesus a conta e ilustracion aki?

•  Ki les nos ta siña for di e ilustracion aki?

•  Ken e Samaritanonan tabata?

•  E relato di e “bon Samaritano” a sosode di berdad?

Aki ta sigui un resumen cortico di e relato cu Hesus a conta. Un homber Hudiu tabata biaha di Jerusalem pa Jerico. Na caminda, nan a atac’e, maltrat’e y lag’e casi morto.

Un sacerdote Hudiu a pasa banda di e homber cu tabata malamente herida, pero e no a haci nada. Despues un otro lider religioso Hudiu a pasa, pero e tampoco no a para pa yuda e homber. Pues, niun di dos no a para pa yuda e homber, aunke nan tabatin e mesun nacionalidad cu e biahero.

Finalmente, un homber di un otro nacion a pasa. E tabata un Samaritano. (Lucas 10:33; 17:16-18) E Samaritano a haya duele di e homber y el a trata e homber su heridanan. Despues, el a hiba e homber na un posada y el a cuida e homber durante anochi. E siguiente dia, el a paga e doño di e posada pa cuida e homber y el a ofrece pa paga cualkier gasto adicional.—Lucas 10:30-35.

Hesus a conta un homber e relato aki, pasobra e homber ey a pensa cu hende di su mes rasa y religion so tabata su prohimo. Hesus kier a siña e homber un les importante. E homber ey mester a compronde cu su prohimo no tabata hende Hudiu so. (Lucas 10:36, 37) E relato aki ta den Bijbel pa beneficia tur hende cu kier agrada Dios.—2 Timoteo 3:16, 17.

E ilustracion aki ta siña nos cu un bon prohimo ta un persona cu ta demostra compasion cu echo. E ta un persona cu ta haci algo pa un hende cu ta sufri, sin importa e hende su cultura, rasa of nacionalidad. Un bon prohimo ta trata otro hende manera e kier pa otro hende trat’e.—Mateo 7:12.

E Samaritanonan tabata biba den un teritorio den parti noord na Judea. Entre nan, tabatin descendiente di hende Hudiu cu a casa cu hende cu no tabata Hudiu.

Ya pa e prome siglo, e Samaritanonan a forma nan mes religion. Nan a acepta e prome cinco bukinan di e Scritura Hebreo, pero en general, nan a rechasa e otro bukinan.

Den tempo di Hesus, hopi Hudiu tabata desprecia e Samaritanonan y nan no tabatin contacto cu nan. (Juan 4:9) Algun Hudiu tabata uza e palabra “Samaritano” pa insulta hende.—Juan 8:48.

Bijbel no ta bisa si e ilustracion di e “bon Samaritano” tabata basa riba un relato real. Sinembargo, hopi biaha Hesus tabata uza custumber y luga bon conoci pa asina e hendenan cu tabata scuch’e por a compronde e les mihor.

E relato tin hopi detaye cu ta historicamente exacto. Por ehempel:

• E caminda di Jerusalem pa Jerico tabata 20 kilometer largo, y e tabatin un bahada steil di 1 kilometer. E echo ey ta cuadra cu loke e relato ta bisa, esta, cu e biaheronan cu a bay Jerico “tabata baha di Jerusalem.”—Lucas 10:30.

• E sacerdotenan y e levitanan cu tabata biba na Jerico regularmente tabata biaha pa Jerusalem riba e caminda aki.

• Hopi biaha, e ladronnan tabata sconde canto di caminda isola pa ataca e biaheronan inocente cu tabata biaha nan so.