“Si nos sigui asin’aki, aki poco tempo nos lo haya nos cu problema desastroso di clima. Hopi stad grandi lo keda bou di awa. Lo tin temporada di calor inmenso cu nunca hende a yega di experencia. Ademas, lo tin hopi tormenta spantoso y scarsedad di awa tur caminda. Miyones di sorto di mata y bestia lo disparce. E cosnan ey no ta storia di fantasia ni exageracion. Ciencia ta bisa nos cu e cosnan ey lo ta resultado di e manera cu nos ta maneha energia.”—Discurso di Antonio Guterres, secretario general di Nacionnan Uni, en conexion cu un informe cu a sali dia 4 di april 2022 di e Grupo Intergubernamental di Experto Tocante Cambio di Clima.

 “Varios cientifico a bati alarma. Nan ta spierta cu den e añanan binidero destruccion causa pa cambio di clima lo afecta tur e 423 parkenan nacional [na Merca]. E parkenan ey ta ser afecta mas tanto pa aumento di temperatura. E lista largo di cos cu ta menasa e parkenan ta zona manera e castigonan menciona den Bijbel: candela y diluvio, capa di ijs cu ta dirti, nivel di lama cu ta subi y temporada di calor inmenso.”—“Caos Causa pa Inundacion na Yellowstone, un Señal di Mas Crisis na Caminda”, cita for di corant The New York Times, 15 di juni 2022.

 Tin solucion pa e problemanan di medioambiente cu nos planeta Tera ta enfrenta? Si ta asina, ken lo soluciona nan? Ban wak kico Bijbel ta bisa.

 Bijbel ta bisa cu Dios lo “caba cu esnan cu ta caba cu e Tera.” (Revelacion 11:18) Nos ta siña tres cos for di e versiculo aki:

1.  1. Actividad di hende lo causa hopi daño na Tera.

2.  2. Un dia hende lo stop di daña Tera.

3.  3. Ta Dios lo soluciona e problemanan di medioambiente di nos planeta y no hende.

 Bijbel ta bisa cu “Tera ta permanece pa semper.” (Eclesiastes 1:4) Semper lo tin hende riba Tera.

•   “E hustonan lo hereda e Tera, y lo biba den dje pa semper.”—Salmo 37:29.

 Medioambiente di nos planeta lo recupera, y nos Tera lo ser restaura.

•   “Laga desierto i tera seku alegrá, mondi bira kontentu i floresé.”—Isaias 35:1, Beibel na papiamentu koriente.