CON lo bo reacciona si un hende bisa bo cu “pronto lo no tin desaster mas”? Probablemente lo bo contest’e: “Ta soña bo ta soña? Pasobra desaster natural ta parti di bida.” Of kisas lo bo pensa den bo mes: ‘Ta ken e ta kere cu e ta gaña?’

Wel, aunke ta parce cu desaster natural lo sigui asota e mundo aki, nos tin bon motibo pa kere cu pronto lo bini un cambio. Pero no ta hende lo trece e cambio aki. Hende no tin e capacidad pa compronde completamente di ki manera y pakico cierto cosnan ta sosode den naturalesa, te pa nan controla of evita esakinan. Rey Salomon di Israel di antiguedad, kende tabata conoci pa su sabiduria y discernimento, a skirbi: “Hende no por descubri e obra cu a wordo haci bou di solo. Maske cuanto esfuerso hende haci pa busca, e lo no descubri esaki; y maske hende sabi bisa: ‘Mi sa’, e no por descubri esaki.”​—Eclesiastes 8:17.

Awor, si hende no por stop desaster natural di sosode, ken si por? Bijbel ta mustra cu ta nos Creador so por haci esey. E ta Esun cu a hinca e sistema ecologico di tera den otro, cu ta inclui entre otro e ciclo di awa. (Eclesiastes 1:7) Y distinto for di hende, Dios tin tur poder. Pa confirma esaki, profeta Jeremias a bisa: “Ay Señor DIOS! Mira, ta abo a traha e cielonan y tera pa medio di bo gran poder y pa medio di bo brasa extendi! Nada ta mucho dificil pa bo.” (Jeremias 32:17) Si, ta Dios a traha tera y tur su elementonan; pues ta logico cu e sa precies kico e mester haci pa hende por tin paz y siguridad aki na tera.​—Salmo 37:11; 115:16.

Awor con Dios lo realisa e cambio necesario aki? Kisas bo ta corda cu den e di dos articulo di e serie aki nos a bisa cu e tantisimo cosnan horibel cu ta sosode riba tera awendia ta parti di un “señal” cu ta indica e “conclusion di e era aki.” Anto Hesus a bisa: “Ora boso mira e cosnan aki sosode, boso por ta sigur cu e Reino di Dios ta cerca.” (Mateo 24:3; Lucas 21:31) E Reino di Dios, cu ta un gobierno institui pa Dios, lo trece cambionan grandi riba tera. Lo e tin tur fenomeno di naturalesa bou di control. Y maske Jehova Dios mes tin poder pa haci tur e cosnan ey, toch el a opta pa delega e trabou aki na su Yiu. Papiando di e Yiu ey, profeta Daniel a bisa: “Na dje a wordo duna dominio, gloria y un reino, pa tur pueblo, nacion y hende di tur idioma por sirbie.”​—Daniel 7:14.

Si, Dios a duna su Yiu, Hesucristo, poder pa trece tur cambio necesario pa asina tera  por ta un dushi luga pa biba. Y ta for di tempo cu Hesus tabata riba tera, un dos mil aña pasa, el a demostra na un escala chikito cu e tin poder pa domina fenomenonan di naturalesa. Por ehempel, na un ocasion cu Hesus y su discipelnan tabata den boto riba Lama di Galilea, “a lanta un biento masha fuerte mes, y e olanan a keda bati contra e boto, di manera cu e boto tabata cerca di sink.” Hesus su discipelnan a spanta; nan a kere cu nan tabata bay muri, y pesey nan a acudi na Hesus pa yudansa. Kico Hesus a haci? El a reprende “biento y a bisa lama: ‘Silencio! Keda keto!’ Y biento a baha y a calma completamente.” Su discipelnan a keda asombra y a puntra: “Ta ken esaki ta anto? Pasobra asta biento y lama ta obedec’e!”​—Marco 4:37-41.

Despues di Hesus su estadia riba tera, Dios a hals’e na cielo y a dun’e asta mas poder y autoridad. Como Rey di Dios su Reino, Hesus tin tanto e responsabilidad como e capacidad di realisa tur e cambionan necesario pa hende por disfruta di un bida trankil y sigur aki riba tera.

Sinembargo, manera nos a mira caba, ta hende su golosidad y egoismo ta causa of empeora hopi di e problema- y desasternan cu ta afecta humanidad. Kico e Reino di Dios lo haci cu e hendenan cu ta haci e cosnan ey y cu ta nenga di haci cambio? Bijbel ta bisa cu Señor Hesus lo bini ‘for di cielo hunto cu su angelnan poderoso den un vlam di candela. Lo e trece vengansa riba esnan cu no conoce Dios y riba esnan cu no ta obedece e bon noticia tocante nos Señor Hesus.’ Si, lo e “caba cu esnan cu ta caba cu e tera.”​—2 Tesalonicensenan 1:7, 8; Revelacion 11:18.

Despues di esey, e “Rey di reynan”, esta Hesucristo, lo tin pleno control riba e forsanan di naturalesa. (Revelacion 19:16) Lo e haci sigur cu niun subdito di Reino lo sufri pa motibo di calamidad. Lo e uza su poder pa regula e condicionnan di clima di tal manera cu tanto e weer como e temporadanan di aña lo beneficia humanidad. Pues, loke Jehova Dios a priminti su pueblo hopi tempo pasa lo cumpli: “Lo mi duna boso awasero na su tempo, asina cu e tera lo duna su cosecha y e palonan di cunucu lo carga nan fruta.” (Levitico 26:4) Hende lo traha cas, y nan lo no tin miedo di perde esaki den ningun calamidad. Si, “nan lo traha cas y biba den nan; tambe nan lo planta cunucunan di wendruif y come nan fruta.”​—Isaias 65:21.

Sin duda, abo, mescos cu hopi hende mas, ta gusta e idea di por biba den un mundo caminda lo no tin desaster mas. Pero kico bo tin cu haci pa biba den un mundo asina? Wel, manera nos a mira caba, “esnan cu no conoce Dios” y “esnan cu no ta obedece e bon noticia” no ta apto pa biba den e binidero mundo, cu lo ta liber di desaster. Pues ta claro anto cu pa nos por biba den e mundo ey, for di awor nos tin cu siña tocante Dios y apoya su Reino. Si, Dios kier pa nos siña conoc’e y obedece e bon noticia di e Reino cu el a establece pa medio di su Yiu.

E mihor manera pa nos siña con pa haci esey ta mediante un estudio di Bijbel. Bijbel ta contene instruccionnan cu ta yuda nos cualifica pa biba bou di e gobernacion di e Reino di Dios, den un ambiente caminda lo reina paz y trankilidad. Pesey, pakico no pidi Testigonan di Jehova yuda bo compronde kico Bijbel ta siña? Nan ta cla pa yuda bo. Un cos ta sigur: Si bo haci esfuerso pa conoce Dios y obedece e bon noticia, e palabranan di Proverbionan 1:33 lo cumpli den bo caso tambe: “Esun cu scucha mi lo biba confiadamente, y lo biba trankil, sin miedo di [“calamidad”, NW ].”