Nan a Ofrece Nan Mes di Buena Gana pa Sirbi na Filipinas

ROND di dies aña pasa, Gregorio cu Marilou, un pareha casa—di 30 y pico aña—tabata sirbi como pionero na Manila mientras cu cada un di nan tabatin un trabou full-time. No tabata facil, pero nan a logra si. Na un dado momento Marilou a haya un promocion pa bira manager di e banco caminda e tabata traha. El a bisa: “E echo cu nos tur dos tabatin un bon trabou a permiti nos hiba un bida masha comodo.” Financieramente, cos tabata bay asina bon pa e pareha aki cu nan a dicidi di traha e cas di nan soño den un bon bario, mas o menos 19 kilometer oost di Manila. Nan a contrata un compania di construccion y a cera un fianza pa paga bek den dies aña.

“MI A SINTI COMOSIFUERA MI TABATA HORTA JEHOVA”

Marilou a conta: “Mi trabou nobo tabata exigi asina tanto tempo y energia di mi cu mi no tabatin dje tanto gana ey mas pa cosnan spiritual. Mi a sinti comosifuera mi tabata horta Jehova. Mi no por a duna Jehova e mesun cantidad di tempo cu mi tabata dedica prome na su sirbishi.” Como cu nan no tabata mucho contento cu e situacion ey, Gregorio cu Marilou a sinta un dia pa papia riba e  manera cu nan tabata hiba nan bida. Gregorio a bisa: “Nos kier a haci un cambio, pero nos no tabata sa unda pa cuminsa. Nos a papia riba con nos lo por a haci mas den sirbishi di Jehova, principalmente pasobra nos no tabatin yiu. Nos a resa pidi Jehova pa su guia.”

Na e tempo ey, e pareha tabata tende varios discurso tocante sirbi caminda tin mas necesidad di publicador di Reino. Gregorio a bisa: “Nos a sinti cu e discursonan ey tabata Jehova su contesta riba nos oracionnan.” E pareha a pidi Dios pa duna nan mas fe di manera cu nan por tabatin e curashi pa tuma e decisionnan corecto. Un obstaculo grandi tabata e mansion cu nan tabata trahando. Nan a paga tres aña di e fianza caba. Kico nan mester a haci awor? Marilou a sigui conta: “Si nos a kibra e contract, nos lo a perde tur loke nos a paga te na e momento ey, un suma basta grandi. Pero nos a mira esey como un escogencia entre pone e boluntad di Jehova na prome luga of nos mes deseonan.” Cu e palabranan di apostel Pablo na mente pa “acepta perdida di tur cos”, nan a para e proyecto di cas, kita for di trabou, bende mayoria di nan pertenencianan y muda pa un pueblo remoto riba e isla di Palawan, rond di 480 kilometer zuid di Manila.—Flp. 3:8.

NAN “A SIÑA E SECRETO”

Prome cu Gregorio cu Marilou a muda, nan a purba prepara nan mes pa hiba un bida simpel; pero ta ora nan a yega nan destinacion, nan a bin realisa kico esey a nifica realmente. Marilou di: “Mi a keda geshock. No tabatin coriente ni ningun di e cosnan cu lo bo haya den un cas normal. En bes di cende un rice cooker, nos tabatin cu kap palo pa cushina cu ne. Mi tabata sinti falta di shop den centronan comercial, bay come na restaurant y otro cosnan cu bida di stad ta ofrece.” Pero e pareha a keda corda nan mes dicon nan a muda, y den poco tempo nan a adapta. Marilou a bisa: “Awor mi ta disfruta di e cosnan bunita di naturaleza, entre otro, e streanan cu ta briya anochi. Mayoria di biaha nos ta sinti un goso di por mira e caranan contento di hende cu nos ta predica na dje. Nos sirbishi akinan ‘a siña [nos] e secreto di keda contento den tur cos.’”—Flp. 4:12.

Gregorio a conta: “Tempo nos a yega akinan, tabatin cuater Testigo so. Nan tabata keda hopi contento ora mi tabata duna discurso publico tur siman y acompaña e cantamento di cantica di Reino riba mi guitara.” Den un aña, e pareha aki a mira con e grupo chikito ey a crece bira un congregacion di 24 publicador. Gregorio a bisa: “E amor cu e congregacion aki a mustra na nos tabatin un efecto profundo riba nos.” Awe, pensando bek riba e seis aña y pico cu nan a sirbi den e region aisla ey, nan ta bisa: “No tin nada cu por ser compara cu e goso cu bo ta sinti ora bo mira crecemento spiritual. Nos ta sinti awor mas cu nunca cu nos bida tin proposito.”

 “MI A ‘PURBA Y MIRA CU JEHOVA TA BON’!”

Na Filipinas, casi 3.000 ruman homber y muher a muda bay na regionnan caminda tin hopi necesidad di publicador di Reino. Mas o menos 500 di nan ta ruman muher soltera. Tuma por ehempel Karen.

Karen, kende awor tin 20 y pico aña, a lanta na Baggao, Cagayan. Tempo cu e tabata teenager, hopi biaha el a pensa riba haci mas den sirbishi. E ta conta: “Mi sa cu a keda masha poco tempo y cu hopi hende ainda mester tende e mensahe di Reino; pesey mi kier a sirbi caminda tin mas necesidad di publicador.” Aunke algun di su famianan a anim’e pa e sigui un estudio superior en bes di bay un luga remoto pa predica, Karen a pidi Jehova su guia den oracion. Tambe el a papia cu rumannan cu ta sirbi den un area aisla. Cu 18 aña di edad, el a muda bay na un region remoto mas o menos 64 kilometer leu for di su pueblo natal.

E teritorio di e congregacion chikito cu Karen a bay apoya ta cubri un area yen di sero a lo largo di e costa di Ocean Pacifico. El a bisa: “Pa yega na e congregacion nobo for di Baggao, mi mester a cana tres dia, subi y baha sero y crusa riu mas cu 30 biaha. Pa yega algun estudio, mi ta cana seis ora, pasa anochi na cas di e studiante di Bijbel y cana e siguiente dia seis ora atrobe pa yega cas.” E esfuerso ey ta bale la pena? Karen a agrega cu un sonrisa riba su cara: “Tin biaha mi pia ta haci dolor, pero mi tin e goso di por dirigi 18 estudio. Mi a ‘purba y mira cu Jehova ta bon’!”—Sal. 34:8.

“MI A SIÑA CONFIA DEN JEHOVA”

Kico a motiva Sukhi, un ruman muher soltera di 40 y pico aña cu tabata biba na Merca, pa muda bay Filipinas? Na 2011 el a asisti na un asamblea di circuito caminda nan a entrevista un pareha casa. Nan a conta con nan a bende mayoria di nan cosnan pa bay biba na Mexico pa por yuda den e trabou di predica aya. Sukhi a bisa: “E entrevista ey a pone mi cuminsa pensa riba metanan spiritual cu nunca prome mi a pensa ariba.” Ora Sukhi, kende ta di descendencia Hindu, a haya sa cu tabatin mester di hopi yudansa pa alcansa hende cu ta papia Punjabi y cu ta biba na Filipinas, el a dicidi di bay pa yuda. El a haya obstaculo?

Sukhi di: “E asunto di dicidi encuanto kico pa keda cu ne y kico pa bende tabata mas dificil cu mi a kere. Despues cu mi a biba comodamente pa 13 aña den mi mes apartamento, mi a muda bay cerca mi famianan, y mi tabatin cu conforma mi mes cu menos comodidad. No tabata nada facil, pero esey tabata un bon manera pa prepara mi mes pa hiba un bida simpel.” Kico ta e desafionan cu el a haya su mes cu ne despues cu el a muda bay  Filipinas? “Fobia di insecto y heimwee tabata e desafionan di mas grandi. Mi a siña confia mas den Jehova cu nunca prome!” Tabata bale la pena? Sukhi a smile y bisa: “Jehova ta bisa nos, ‘Pone mi na prueba, si lo mi no basha un bendicion riba boso.’ E palabranan a haya un nificacion masha special pa mi ora un doño di cas puntra mi: ‘Ki dia bo ta bin bek? Mi tin hopi pregunta mas.’ E echo cu mi por yuda hende cu tin hamber y sed spiritual ta duna mi hopi goso y satisfaccion!” (Mal. 3:10) Sukhi a agrega: “Realmente, e parti di mas dificil tabata di tuma e decision di muda. Despues cu mi a haci esey, tabata asombroso pa mira con Jehova a percura tur otro cos pa mi.”

“MI A VENCE MI MIEDO”

Sime, un ruman homber casa cu awor tin casi 40 aña, a bandona Filipinas pa bay biba na un pais den Medio Oriente, caminda el a haya un trabou cu un bon salario. E animacion cu el a haya eynan di un superintendente di circuito y di un discurso cu el a tende un miembro di Cuerpo Gobernante duna a motiv’e pa pone Jehova na prome luga den su bida. Sime a conta: “Pero e idea di kita for di trabou tabata un pesadiya pa mi.” Toch, el a pidi su retiro y regresa Filipinas. Awe, Sime cu su esposa Haidee ta sirbi na Davao del Sur, den zuid di e pais, caminda tin mester di hopi predicador di Reino pa cubri e teritorio inmenso ey. Anto Sime a agrega: “Ora mi pensa bek riba mi decision, mi ta masha agradecido cu mi a vence mi miedo di kita for di trabou y cu mi a pone Jehova na prome luga. Duna Jehova lo mihor. No tin nada cu por duna bo un satisfaccion mas grandi den bida!”

“NO TIN NADA MAS DUSHI CU ESEY!”

Ora Ramilo cu Juliet, un pareha pionero di 30 y pico aña di edad, a haya sa cu un congregacion apenas 30 kilometer leu for di nan cas tabatin mester di yudansa, nan a ofrece nan mes di buena gana pa bay duna un man. Di manera cu tur siman, sea cu awa a yobe of no, Ramilo cu Juliet tabata subi nan motorcycle pa asisti na e reunionnan y sali den sirbishi. Aunke no tabata facil pa core riba caminda yen di buraco y pasa riba brug cu ta colga, nan ta contento cu nan a tuma e decision ey. Ramilo a bisa: “Hunto, ami cu mi casa, ta dirigi 11 estudio di Bijbel! Pa nos por sirbi caminda tin mas necesidad, nos tin cu haci hopi sacrificio, pero no tin nada mas dushi cu esey!”—1 Cor. 15:58.

Bo kier mas informacion tocante e posibilidad di sirbi caminda tin mester di mas publicador di Reino den bo mes pais of den un otro pais? Si ta asina, papia cu bo superintendente di circuito y lesa e articulo “Bo Por ‘Bin Macedonia’?” den Nos Ministerio di Reino di augustus 2011.

[Comentario na pagina 3]

“No tin nada cu por ser compara cu e goso cu bo ta sinti ora bo mira crecemento spiritual. Nos ta sinti awor mas cu nunca cu nos bida tin proposito.”

—Gregorio cu Marilou

[Cuadro na pagina 4]

CON ALGUN RUMAN TA SOSTENE NAN MES?

Aworaki tin mas o menos 70 ruman homber y muher—mayoria entre e edad di 18 pa 50 aña—cu a bin di otro pais pa sirbi na Filipinas. Robert cu Mirjam, un pareha casa di 40 y pico aña di Alemania, a conta cu nan a muda bay Filipinas pa sirbi pa un aña. Esey tabata 14 aña pasa, y ainda nan ta sirbi na Filipinas! Con nan ta sostene nan mes financieramente? Robert a splica: “Como cu ta masha dificil pa haya trabou akinan, tur aña nos ta bay traha tres luna na Alemania. E placa cu nos gana ta permiti nos hiba un bida simpel y sirbi pa resto di e aña na Filipinas.” Claro cu henter e idea di biba den un otro pais tin su retonan, pero Mirjam a bisa: “Mi ta sinti un paz interno y cu nos tin e guia di Jehova.” Robert a agrega: “Nos sirbishi akinan a fortalece nos fe.”

[Plachi na pagina 5]

(Potret na man robes) Karen (Potret na man drechi) Sukhi

[Plachi na pagina 6]

(Potret na man robes) Sime cu Haidee (Potret na man drechi) Juliet cu Ramilo