Por ehempel, Sally, * di Merca, a perde casi tur loke e tabatin ora un horcan a pasa. Sally a splica: “Mi tabata sinti cu mi no por mas y cu mi a yega mi limite.”

Morto di un ser keri tambe por ta algo hopi duro. Janice, di Australia, a bisa: “Ora mi a perde mi dos yiu hombernan, mi a sinti mi asina kibra cu mi tabata sinti cu mi no tin motibo mas pa biba. Mi a roga Dios: ‘Por fabor, mi no por mas. Djis laga mi drumi y no lanta mas.’”

Loke tabata duro pa Daniel ta cu su esposa a bira infiel na dje. El a splica: “Ora mi esposa a bisa mi cu el a traiciona mi, tabata comosifuera un cuchiu a hinca mi den mi curason. Mi tabata sinti un dolor fisico, comosifuera e cuchiu tabata hinca mi bes tras bes. Esaki a dura pa varios luna.”

Den E Toren di Vigilancia aki lo bo wak cu ta bale la pena pa sigui biba hasta ora

• Un calamidad tuma luga

• Un ser keri fayece

• Un casa bira infiel

• Bo tin un maleza grave

• Bo ta lucha cu sintimentonan negativo

Ban wak prome kico por yuda nos ora nos bira victima di un calamidad.