1, 2. (a) Ki tipo di trabou Ruth a haci? (b) Cua ta algun aspecto positivo di e Ley di Dios y di su pueblo cu Ruth a tuma nota di dje?

RUTH tabata na rudia banda di e boshi di stengel di puspas cu el a piki e dia ey. Tabata birando anochi, y hopi di e trahadornan ya tabata saliendo for di e cunucunan rumbo pa porta di Betlehem, cu a keda riba un sero den bisindario. Ruth su curpa lo mester tabata na werki di e dia largo di trabou pisa aki, ya cu for di mainta el a traha casi nonstop. Anto ainda su dia no a caba. El a cuminsa bati e tapushinan cu un bara pa los e pipitanan. A pesar di tur cos, e dia a bay hopi mas mihor cu el a spera.

² Acaso e situacion di e viuda hoben aki porfin a cuminsa drecha? Manera nos a mira den e capitulo anterior, el a dicidi di bay cu su suegra, Noemi, y a priminti di keda cerca dje y haci Jehova, e Dios di Noemi, su Dios. E dos viudanan aki a bin Betlehem for di Moab. Ruth, cu tabata un Moabita, a ripara di biaha cu e Ley di Jehova tabatin areglonan practico cu a laga e hendenan pober di Israel, y hasta stranhero, keda cu nan dignidad. Y awor el a ser consola y a keda conmovi pa e bondad y spiritualidad di algun hende den e pueblo di Jehova, kendenan a lanta bou di e Ley ey y tabata pon’e na practica.

3, 4. (a) Con Boaz a anima Ruth? (b) Con e ehempel di Ruth por yuda nos trata cu e problemanan economico di awendia?

³ Un di e personanan ey tabata Boaz, un homber rico y di edad. E tabata doño di e cunucu caminda Ruth a piki resto di e cosecha. Awe ora el a cera conoci cu Ruth, el a trat’e manera su yiu. Cu palabranan bondadoso Boaz a elogi’e pasobra el a cuida su suegra, Noemi, y a busca refugio bou di e halanan di Jehova, e Dios berdadero. Su palabranan a laga Ruth sintie bon.—Lesa Ruth 2:11-14.

⁴ Pero asina mes, Ruth probablemente tabata preocupa pa su futuro. Siendo un stranhero pober, sin casa ni yiu, ta con lo  e sigui gana su pan y percura pa Noemi? Nan lo por sigui biba di piki resto di e cosecha? Anto ken lo cuida e ora e bira bieu? Lo no straña nos si e cosnan ey tabata preocup’e. Awendia, cu e problemanan economico cu ta reina, tin hopi hende ta lucha cu e mesun inkietudnan. Segun cu nos ta analisa con e fe di Ruth a yud’e, nos por siña hopi manera con nos por imit’e.

5, 6. (a) Con a bay cu Ruth riba e prome dia cu el a traha den cunucu di Boaz? (b) Con Noemi a reacciona ora el a mira Ruth?

⁵ Ora Ruth a caba di bati e tapushinan y recoge e puspas, el a ripara cu e tabatin alrededor di un efa. E cantidad di puspas ey lo por a pisa un 14 kilo (30 liber)! El a bash’e den un paña, mar’e na un bulto y his’e pone riba su cabes. Anto segun cu nochi a cera, el a cuminsa cana bay Betlehem.—Ruth 2:17.

⁶ Noemi a keda contento di mira su nuera stima, y kisas hasta a keda asombra di mira e carga pisa di puspas riba su cabes. Ruth a trece tambe un poco di e cuminda cu Boaz a parti pa su trahadornan, y asina nan dos tabatin algo simpel pa come anochi. Noemi a puntr’e: “Unda bo a piki awe y unda bo a traha? Bendiciona sea esun cu a paga atencion na bo.” (Ruth 2:19) Noemi tabata un persona atento. Na e cantidad di cos cu Ruth a bin cas cu ne, el a ripara cu un persona a tuma nota di e viuda hoben y a trat’e cu bondad.

7, 8. (a) Noemi a considera cu e bondad di Boaz a bin for di ken, y dicon? (b) Di ki otro manera Ruth a demostra su amor leal pa su suegra?

⁷ Nan dos a cuminsa combersa, y Ruth a conta Noemi con bon Boaz a trat’e. Conmovi, Noemi a bis’e: “Cu [Jehova] esun cu no a nenga su cariño na e bibonan ni na e mortonan sea bendiciona.” (Ruth 2:20) Pa Noemi, e bondad di Boaz tabata algo cu a bin di Dios. Ta Jehova ta motiva su sirbidornan pa ta generoso y ta priminti di recompensa nan pa e obranan di bondad cu nan ta haci. *—Lesa Proverbionan 19:17.

⁸ Noemi a conseha Ruth pa acepta e oferta di Boaz pa sigui piki resto di e cosecha den su cunucu y pa keda cerca di su sirbientenan pa evita cu cosechado di otro cunucu lo a molesti’e. Ruth a tuma su conseho. Tambe el a keda “biba cerca su suegra”, y esey un biaha mas a laga su cualidad principal resalta,  esta, su amor leal. (Ruth 2:22, 23) Kico di nos? Nos ta imita Ruth su ehempel y honra nos famia? Nos ta apoya nos sernan keri y ofrece pa yuda nan ora ta necesario? Jehova semper ta tuma nota di tal amor leal.

9. Kico nos por siña for di Ruth cu Noemi?

⁹ Nos por bisa cu Ruth y Noemi realmente tabata un famia? Tin hende ta asumi cu pa nos papia di un famia mester tin tata, mama, yiu, welo, wela, etcetera. Pero e caso di Ruth cu Noemi ta yuda nos mira cu hasta ora un famia ta incompleto of ta consisti di dos hende so, e ta realmente un famia si nan ta demostra cariño, bondad y amor na otro. Abo ta aprecia e famia cu bo tin? Hesus a recorda su siguidornan cu hasta esnan cu no tin famia por haya esey den e congregacion cristian.—Mar. 10:29, 30.

10. Con Noemi kier a yuda Ruth?

¹⁰ Ruth a keda piki resto di e cosecha den cunucu di Boaz for di e cosecha di puspas den april te na e cosecha di trigo den juni. Simannan a pasa y Noemi sin duda a sigui pensa riba kico e por a haci pa su nuera stima. Ora e tabata na Moab, e tabata convenci cu lo e no por a yuda Ruth haya un otro casa. (Ruth 1:11-13) Pero awor el a cuminsa pensa otro. Un dia el a bisa Ruth: “Mi yiu, lo mi no busca siguridad pa bo?” (Ruth 3:1) Den e tempo ey tabatin e custumber cu mayornan ta busca casa pa nan yiunan, y Ruth a bira un berdadero yiu pa Noemi. Ta pesey Noemi kier a haya un “siguridad” p’e, referiendo na e siguridad y proteccion cu un cas y un casa lo a dun’e. Pero kico Noemi por a haci?

11, 12. (a) Na ki stipulacion di e Ley di Dios Noemi a referi ora el a bisa cu Boaz “ta nos famia”? (b) Con Ruth a reacciona riba e conseho di su suegra?

¹¹ Ora Ruth a menciona Boaz pa prome biaha, Noemi a bisa: “E homber ta nos famia.” (Ruth 2:20) Kico esaki a nifica? Wel, e Ley cu Jehova a duna Israel a inclui stipulacionnan amoroso pa famianan cu a haya nan den problema pa motibo di pobreza of morto di un ser keri. Si un muher a bira viuda prome cu e haya yiu, e dolor tabata mas grandi pasobra e liña di descendencia di su esposo lo a stop di existi y su nomber lo a  bay perdi. Pero e Ley di Dios a permiti e esposo su ruman homber casa cu e viuda, pa asina e por a duna luz na un heredero cu lo a carga nomber di e difunto y hereda e propiedad di e famia. *—Deu. 25:5-7.

¹² Noemi a splica Ruth di su plan. Nos por imagina con sorprendi e mucha muher a keda wak su suegra segun cu e tabata papia cu ne. E Ley di Israel tabata nobo pa Ruth, y hopi di e custumbernan lo tabata desconoci p’e. Pero como cu e tabatin un respet profundo pa Noemi, el a scuch’e cu atencion. Kisas loke Noemi a recomenda a parc’e straño of bergonsoso, hasta humiliante, pero toch Ruth a bay di acuerdo pa hacie. El a bisa humildemente: “Tur loke bo bisa, lo mi haci.”—Ruth 3:5.

13. Ki les nos por siña for di Ruth tocante acepta conseho di hende grandi? (Wak tambe Job 12:12.)

¹³ Tin biaha ta dificil pa hobennan scucha e conseho di hende mas grandi y cu mas experencia. Ta facil pa pensa cu hende grandi no por compronde e reto- y problemanan cu hobennan ta enfrenta. Pero Ruth su ehempel di humildad ta corda nos cu nos por saca hopi beneficio si nos haci caso di e sabiduria di hende grandi cu stima nos y ta interesa den nos bienestar. (Lesa Salmo 71:17, 18.) Pero, kico tabata e conseho di Noemi? Y di berdad Ruth a beneficia di sigui su conseho?

14. Kico tabata un plenchi di bati maishi?

¹⁴ E anochi ey, Ruth a bay na e plenchi di bati maishi, un area plat cu tera duro gepak caminda cunukeronan tabata bay pa bati y bienta nan maishi. Normalmente, nan tabata scoge un luga na bariga di sero of riba cabes di un sero, caminda biento tabata supla duro parti atardi of anochi. Pa separa e maishi for di e bagas y e palo di maishi, e trahadornan tabata uza forki of shovel grandi pa benta e cosecha den laira. Biento a bay cu e bagas pero e maishi, cu tabata mas pisa, a bolbe cay abou.

15, 16. (a) Describi e escena na e plenchi di bati maishi ora cu Boaz a caba di traha. (b) Con Boaz a haya sa cu Ruth tabata drumi na su pia?

¹⁵ Ruth a para wak discretamente. E trahadornan a caba cu nan trabou segun cu nochi tabata cera. Boaz a supervisa e trabou di bienta su trigo, y na final di dia e tabatin un monton grandi. Despues di un bon cuminda, el a cay drumi banda di e monton di trigo. Parce cu esaki tabata un custumber di e tempo ey pa asina proteha e cosecha precioso contra ladron. Ruth a mira Boaz cay drumi y tabata sa cu ta ora pa cumpli cu e plan di Noemi.

¹⁶ Ruth a hala cerca keto keto; su curason tabata bati duro. E por a mira cu Boaz tabata den un soño profundo. El a haci manera Noemi a bis’e: El a kita e paña cu tabata tapa Boaz su pia, y a cay drumi eynan. Despues el a warda. Ora a pasa. Pa Ruth, esey lo mester a parce un eternidad. Finalmente, rond di  meyanochi, Boaz a spierta. El a lanta sinta, probablemente pa bolbe tapa su pia, pero a ripara cu tabatin un hende eynan. E relato ta bisa: “Mira, tabatin un muher drumi na su pia”!—Ruth 3:8.

17. Hende cu ta insinua cu Ruth a haci algo indecente ta pasa cua dos detaye simpel por halto?

¹⁷ Boaz a puntr’e: “Ta ken bo ta?” Ruth a contest’e, cu un stem cu kisas a tembla un tiki: ‘Ami ta Ruth, bo sirbiente. Pesey, habri bo clechi riba bo sirbiente, pasobra bo ta un famia pega.’ (Ruth 3:9) Algun comentarista moderno a trata di insinua cu loke Ruth a haci y bisa tabatin un conotacion sexual, pero tin dos detaye simpel cu nan ta pasa por halto. Di prome, Ruth tabata siguiendo e custumbernan di e tempo ey, y hopi di esakinan nos no conoce mas. Pues lo ta un ekibocacion pa husga loke el a haci a base di e normanan moral baho di nos tempo. Di dos, Boaz su reaccion a indica cu el a aproba e comportacion di Ruth y a consider’e moralmente puro.

18. Kico Boaz a bisa Ruth pa trankilis’e, y na cua dos ehempel di su amor leal Boaz a referi?

¹⁸ Boaz a papia cu Ruth, sin duda cu un tono suave y trankilisante, y a bis’e: “Cu SEÑOR bendiciona bo, mi yiu. Bo a mustra cu bo ultimo cariño ta mihor cu esun prome, door di no core tras di homber hoben, sea pober of rico.” (Ruth 3:10) Cu ‘e prome cariño’ el a referi na e amor leal cu Ruth a demostra door di bin Israel hunto cu Noemi y cuid’e. E “ultimo cariño” tabata loke Ruth a haci awor. Boaz a reconoce cu un mucha muher manera Ruth facilmente por a busca un casa entre e hombernan mas jong, sea rico of pober. Pero Ruth no kier a haci bon pa Noemi so, sino tambe pa Noemi su casa, di manera cu e nomber di e difunto lo a keda conserva den su tera natal. Ta facil pa mira dicon Boaz a keda asina impresiona cu e mucha muher aki cu no tabata pensa riba su mes so.

19, 20. (a) Dicon Boaz no a casa cu Ruth mesora? (b) Con Boaz a tene cuenta cu Ruth su reputacion y con el a mustra bondad na dje?

¹⁹ Boaz a sigui bisa: “Y awor, mi yiu, no tene miedo. Lo mi haci pa bo kico cu bo pidi, pasobra tur e hendenan di e stad aki sa cu bo ta un muher excelente.” (Ruth 3:11) E tabata  contento cu e idea di casa cu Ruth. Kisas e no a keda sorprendi mes cu Ruth a pidie pa casa cu ne como un famia mas pega. Pero Boaz tabata un homber husto, y e no tabata bay haci djis loke e tabata kier. El a bisa Ruth cu tin un otro homber cu tabata un famia mas pega di Elimelek cu ne. Boaz lo a bay cerca e homber ey prome y dun’e e chens di casa cu Ruth.

²⁰ Boaz a bisa Ruth pa keda drumi numa te ora tabata casi bira mainta. Anto lo e por a bay sin cu niun hende mir’e. Boaz kier a proteha tanto Ruth su reputacion como esun di dje, ya cu hende por a haya e idea robes cu algo inmoral a sosode entre nan. Ruth a cay drumi bek na Boaz su pia, kisas un poco mas trankil awor cu Boaz a reacciona asina bondadoso riba su peticion. Un par di ora despues, ora cu tabata scur ainda, el a lanta. Boaz a yena su capa of mantel cu puspas, y Ruth a bay Betlehem bek cu e regalo generoso.—Lesa Ruth 3:13-15.

21. Kico a contribui na Ruth su reputacion como “un muher excelente”, y con nos por imita su ehempel?

²¹ Ruth lo mester a sintie feliz cada biaha cu el a corda riba loke Boaz a bisa! Tur hende tabata pensa cu e ta “un muher excelente.” Sin duda, el a haya e bon reputacion ey pasobra e tabata haci su best pa siña conoce Jehova y sirbie. Ademas, el a demostra gran bondad y comprension pa Noemi y su pueblo, y e tabata dispuesto pa adapta na un cultura nobo y na custumbernan cu e no tabata conoce prome. Si nos ta imita e fe di Ruth, nos lo haci esfuerso pa trata otro hende, y tambe nan cultura y custumbernan, cu hopi respet. Y si nos haci esey, nos tambe por gana un bon reputacion.

22, 23. (a) Kico por tabata e nificacion di e regalo cu Boaz a duna Ruth? (Wak e nota.) (b) Kico Noemi a conseha Ruth?

²² Ora Ruth a yega cas bek, Noemi a puntr’e: “Con a bay, mi yiu?” Noemi kier a haya sa si ainda Ruth tabata sin compromiso of si awor e tabatin e prospecto di matrimonio. Mesora Ruth a conta su suegra tur loke a pasa. Tambe el a dun’e e regalo generoso di puspas cu Boaz a dun’e pa Noemi. *—Ruth 3:16, 17.

 ²³ E ora ey Noemi a duna Ruth e bon conseho pa keda trankil na cas e dia ey y no bay traha den cunucu. El a sigura Ruth: “E homber lo no sosega te ora cu e regla e asunto awe mes.”—Ruth 3: 18.

24, 25. (a) Con Boaz a demostra cu e tabata un homber recto cu no a pensa solamente riba su mes? (b) Con Jehova a bendiciona Ruth?

²⁴ Noemi tabatin rason. Boaz a bay na porta di e stad, caminda e ancianonan di Betlehem tabata reuni, y a warda te ora cu e homber cu tabata e famia mas pega a pasa. Dilanti di testigo, Boaz a ofrece e homber e oportunidad di casa cu Ruth. Pero e homber a nenga, pasobra e tabatin miedo cu esey lo por a perhudica su propio herencia. Anto dilanti di tur esnan presente, Boaz a declara cu lo e yuda Noemi: Lo e cumpra tur propiedad di su difunto esposo, Elimelek, y casa cu Ruth, viuda di Mahlon, yiu di Elimelek. Boaz a bisa cu e kier a haci esey “pa lanta nomber di e difunto riba su herencia.” (Ruth 4:1-10) Boaz tabata realmente un homber recto cu no tabata pensa solamente riba su mes.

²⁵ Boaz a casa cu Ruth. Despues nos ta lesa: “[Jehova] a haci cu el a concebi, y el a duna luz na un yiu homber.” E muhernan di Betlehem a bendiciona Noemi y a bisa cu Ruth a bal mas cu shete yiu homber p’e. E relato ta conta cu Ruth su yiu homber a bira un antepasado di e famoso Rey David. (Ruth 4:11-22) David, na su turno, tabata un antepasado di Hesucristo.—Mat. 1:1. *

26. Kico e ehempel di Ruth cu Noemi ta recorda nos?

²⁶ Ruth di berdad a ser bendiciona, y Noemi tambe. El a yuda cria e yiu comosifuera tabata su mes yiu. E bida di e dos muhernan aki ta para como un bon recordatorio cu Jehova Dios ta tuma nota di tur hende cu humildemente ta traha duro pa cuida nan famia y cu ta sirbie fielmente hunto cu su pueblo scogi. Jehova semper ta recompensa hende fiel, manera Boaz, Noemi y Ruth.