Рацыды чиныг арӕх цы «сырх-сырхид ӕндахы» кой кӕны, уый цы уыд?

▪ Библи куыд зӕгъы, афтӕмӕй, Хуыцауӕн кӕм куывтой, уыцы цатыры къултӕ ӕмӕ йӕ бахизӕны ӕмбӕрзӕн конд уыдысты «ӕрвхуыз ӕндахӕй, тарсырх къуымбил ӕндахӕй, сырх-сырхид ӕндахӕй ӕмӕ гӕнӕй конд ӕппӕты хуыздӕр здыхст ӕндахӕй» (Рацыд 26:1; 38:18). Сауджынты «сӕрмагонд дарӕс» дӕр конд уыди «сырх-сырхид ӕндахӕй» (Рацыд 28:1–6).

Ӕндах-иу сырх-сырхид сси кермесӕй. Кермес та у ахорӕн, ӕмӕ дзы цы ахуырстой, уый-иу сси ӕрттиваг сырх кӕнӕ сырх-сырхид. Уыцы ахорӕн арӕзтой, кермес чи хуыйны, уыцы сыл сыстытӕй. Уыцы сыстытӕн базыртӕ нӕй ӕмӕ цӕрынц кермес тулдзбӕлӕстыл (Quercus coccifera), Ӕввахс Скӕсӕны ӕмӕ Зӕххастӕу денджызы былгӕрӕтты. Сырх ахорӕн вӕййы сыл сыстыты ӕйчыты мидӕг. Сыстытӕн сӕ хуылф ӕйчытӕй йедзаг куы вӕййы, уӕд вӕййынц лыстӕг гагайы хуызӕн ӕмӕ гыццыл, тымбыл хъӕдуры йас, ӕмӕ ныххӕцынц кермес тулдзбӕласы сыфтыл ӕмӕ къалиутыл. Сыстытӕ-иу куы ӕруыгътой ӕмӕ-иу сӕ куы ныцъцъӕл кодтой, уӕд-иу сӕ цы рацыди, уый-иу донимӕ схӕццӕ кодтой ӕмӕ-иу дзы хъуымӕцтӕ ахуырстой. Ромаг историк Хистӕр Плиний фыста сырх-сырхид ахорӕны тыххӕй ӕмӕ дзырдта, йӕ рӕстӕджы ахӕм ахорӕн тынг кадджын кӕй уыди.

Чырыстон Грекъаг Фыстытӕ чи ныффыста, уыдонӕй н. э. 33 азы Фӕндзайӕм боны чи уыди?

▪ Куыд зыны, афтӕмӕй, Грекъаг Фыстытӕ цы аст адӕймаджы ныффыста, уыдонӕй н. э. 33 азы Фӕндзайӕм боны уыдысты ӕхсӕзӕй.

Хъуыддӕгты чиныджы кӕсӕм, Йесо Чырысти йӕ ахуыргӕнинӕгтӕн кӕй бафӕдзӕхста: «Иерусалимӕй макӕдӕм ацӕут, фӕлӕ ӕнхъӕлмӕ кӕсут, мӕ уӕларвон Фыд уын зӕрдӕ цӕмӕй бавӕрдта... уымӕ» (Хъуыддӕгтӕ 1:4). Уыцы чиныгӕй бӕрӕг у, Библийы фысджытӕ Матфей, Иоанн ӕмӕ Петр Йесомӕ кӕй байхъуыстой ӕмӕ иннӕ ахуыргӕнинӕгтимӕ «иу хӕдзары [кӕй] ӕрӕмбырд сты». Йесойы ӕфсымӕртӕ дӕр семӕ уыдысты (Хъуыддӕгтӕ 1:12–14; 2:1–4). Йе ’фсымӕртӕй дыууӕйӕ, Иаков ӕмӕ Иудӕ, фӕстӕдӕр ныффыстой, сӕ нӕмттӕ сын чи хӕссы, уыцы чингуытӕ (Матфейы 13:55; Иаковы 1:1; Иудӕйы 1).

Марк йӕ Евангелийы дзуры иу лӕппуйы тыххӕй, зӕгъгӕ, алыгъд, Йесойы цы ӕхсӕв ӕрцахстой, уӕд. Марк, ӕвӕццӕгӕн, йӕхи кой кодта, уымӕн ӕмӕ иннӕ ахуыргӕнинӕгтӕ уӕдмӕ Йесойы ныууагътой (Марчы 14:50–52). Марк фыццаг ахуыргӕнинӕгтӕй кӕй уыд, уымӕ гӕсгӕ, ӕвӕццӕгӕн, уый дӕр Фӕндзайӕм боны уыди.

Чырыстон Грекъаг Фыстыты фысджытӕй ма баззадысты дыууӕйӕ, Павел ӕмӕ Лука. Фӕлӕ н. э. 33 азы Фӕндзайӕм бон Павел Чырыстийы ахуыргӕнинаг нӕма уыд (Галатӕгтӕм 1:17, 18). Лука дӕр, ӕвӕццӕгӕн, уым нӕ уыд, уымӕн ӕмӕ, Йесойы хабӕрттӕ «йӕхи цӕстӕй чи федта», уыдоны тыххӕй дзургӕйӕ йӕхи кой нӕ кӕны (Лукайы 1:1–3).

[Ныв 22 фарсыл]

Сыстытӕй аразынц ахорӕн

[Барлӕвӕрдӕй]

Courtesy of SDC Colour Experience (www.sdc.org.uk)

[Ныв 22 фарсыл]

Н. э. 33 азы фӕндзайӕм боны Петр ныхас кӕны адӕмимӕ