1, 2. Ahabw’enki Yesu yaabaire naakunda Mariza, kwonka niki ekirikworeka ngu akaba atahikiriire?

NIKI ekirikukwija omu biteekateeko ku orikuteekateeka ahari Mariza orikugambwaho omu Baibuli? N’obu araabe niwe mukazi wenka orikugambwaho ngu akaba naakundwa Yesu, haine n’abandi bakazi abu Yesu yaabaire naakunda, nka Mariamu nyina, na Mariamu murumuna wa Mariza. (Yoh. 19:25-27) Mbwenu shi ahabw’enki Mariza naagambwaho omu muringo ogu omu bitabo by’Engiri?

² Yesu akaba atarikukunda Mariza ahabw’okukora munonga n’okuba efura, beitu ahabw’okukunda eby’omwoyo. Akaba ari omukazi owaabaire naikiririza omu nyegyesa za Yesu. Mariza akaba naikiririza omuri Yesu ngu niwe Mesia owaaraganisiibwe. (Yoh. 11:21-27) Kwonka nawe akaba atahikiriire nkaitwe. Eizooba rimwe obu Yesu yaabaire abataayaayiire, Mariza akaba agwereirwe kubi Mariamu atyo yaagambira Yesu ngu amuhane. Mariza akagira ati: “Mukama wangye, tikirikukusaasa, murumuna wangye okumpenza emirimo? Mugambire empwere.” (Shoma Luka 10:38-42.) Nitubaasa kwega ki aha mbeera egi?

3, 4. Mariamu akatoorana ata “omugabo murungi,” kandi ni eishomo ki eri Mariza yaagumire naijuka? (Reeba ekishushani aha kutandika.)

³ Yesu akashemererwa munonga ahabwa Mariza na Mariamu kumweta, kandi akaba naayenda kukoresa obwire obwo kubeegyesa amazima g’omuhendo. Mariamu akakoresa omugisha ogwo kumanya amazima ago kuruga aha Mwegyesa Mukuru, kandi ‘yaashutama aha bigyere bya Mukama waitu, yaahurira ebigambo bye.’ Mariza akaba ashemereire kukora nikyo kimwe. Hatariho kubanganisa, Yesu akaba naija kusiima Mariza ku ogire ngu akamuhurikiza.

⁴ Kwonka omu mwanya gw’ekyo, Mariza akaba ariyo naatebeekanisa eby’okurya by’omutaano arikukora n’endiijo mirimo kugira ngu Yesu abaase kugira obuteeka. Kwonka emirimo egi yoona ekaba neemwerarikiriza, kandi akagirira na Mariamu ekiniga. Yesu akeetegyereza ngu Mariza naateeraho kukora emirimo mingi, n’ahabw’ekyo omu muringo murungi akamugira ati: “Mariza, Mariza, oyemereize omutima, noofa kubi n’ebintu bingi.” Bwanyima akamuha obuhabuzi ngu omuryo gumwe aha bi yaabaire naatebeekanisa gukaba nigumara. Yesu akagamba gye ahari Mariamu arikugira ati: “Mariamu we atooraine omugabo murungi ogutarimwakwa.” Mariamu akaba naabaasa kwebwa eby’okurya ebi yaariire aha mukoro ogwo ogw’omutaano, kwonka akaba atarikubaasa kwebwa okusiima n’eby’omwoyo ebi yaatungire ahabw’okuhurikiza gye Yesu. Bwanyima y’emyaka erengire 60, entumwa Yohaana akahandiika ati: “Yesu akaba akunda Mariza n’omurumuna.” (Yoh. 11:5) Ebigambo ebi buzima nibyoreka ngu Mariza akaguma naijuka obuhabuzi bwa Yesu kandi yaateeraho kuheereza Yehova omu bwesigwa ebiro byona eby’amagara ge.

5. Obunaku obu nibutaana buta aha bw’okuhandiikwa kwa Baibuli, kandi eki nikireetaho kibuuzo ki?

⁵ Nitumanya ngu obunaku obu hariho ebintu bingi ebirikubaasa kuturemesa kuheereza gye Yehova kukira omu bwire bwa Baibuli. “Omu byafaayo by’abantu, hati nibwo batunguukire munonga omu by’empurizana, okuteera ebitabo ahonaaho, okuteera magaziini ezirimu ebishushani, okukoresa radiyo, vidiyo, tiivi. . . . Ebintu ebi buri izooba nibitureetera kuhuga . . . Omu bunaku obuhingwire, kikaba nikiteekateekwa ngu obwire bwaitu bukaba buri ‘Obwire bw’Okwetegyereza Munonga.’ Kwonka nibuguma nibweyongyera kuba ‘Obwire Oburimu Ebirikuhuzya.” Ebigambo ebi bikagambwa abeegi b’eishomero omuri United States emyaka erikurenga 60. Watchtower eya Seputemba 15, 1958, ekagira ngu “Ebirikuhuzya nibibaasa kwija kweyongyera ensi egi yaaguma neeyeyongyera kuhika aha mperu.” Kandi eki kihikiriire. Kandi eki nikireetaho ekibuuzo kikuru: Nitubaasa kukora ki kwetantara ebirikutuhuzya tukaba nka Mariamu, tukata omutima aha by’omwoyo?

6. Abajurizi ba Yehova bakoreise gye bata obwengye bw’ensi egi?

⁶ Ekicweka eky’omu nsi eky’ekibiina kya Yehova kikoreise obwengye bw’ensi egi kutunguura okuramya okw’amazima. Nk’eky’okureeberaho, vidiyo erikwetwa “Photo-Drama of Creation,” ekaba erimu ebishushani ebiine erangi ebirikuguma nibihinduka birikugyenda, kandi birikushohoza ebigambo. Orutaro rw’Ensi Yoona rutakahikire na bwanyima yaarwo, abantu baingi bakateekateeka ngu batungire vidiyo erikubahuumuriza ahabw’okugira ngu ekaba neehendera erikugira ngu nihaija kubaho obusingye, Yesu Kristo yaaba naategyeka omu Butegyeki bwe obw’Emyaka Rukumi. Bwanyima,  amakuru g’Obukama gakatandika kurangirirwa aha radiyo, kandi gakaba nigahurirwa abantu nyamwingi omu nsi yoona. Hati, kompyuta na Intaneeti nibikoresibwa munonga kujanjaaza amakuru marungi, gahika n’aha bantu abari aha birwa ebiri hare omu bicweka byona eby’ensi.

7. (a) Ahabw’enki n’eky’akabi kukoresa munonga ebintu by’ensi? (b) Niki eki tushemereire kutaho munonga omutima? (Reeba obugambo obw’ahansi.)

⁷ Nk’oku Baibuli erikurabura, hariho akabi omu kukoresa munonga ebintu by’ensi egi. (Shoma 1 Abakorinso 7:29-31.) Omukristaayo naabaasa kumarira obwire bwe bwingi aha by’okweshemeza, okushoma ebitabo, okureeba tiivi, okurambura, okusherura emihendo y’ebintu, n’okureeba ebintu ebihangire ebiherize kushohozibwa, n’obu ebi byona biraabe bitari bibi. Okukoresa Intaneeti kugaaniira n’abanywani, okwohereza obutumwa aha simu n’aha kompyuta, n’okusherura amakuru agaaheza kushohora agarikukwata aha mizaano, ebi byona nibibaasa kushiisha obwire bwaitu kandi bitubeere omuze. * (Mub. 3:1, 6) Twaba tutatuubize aha bwire obu turikumara aha bintu ebitari bikuru, nitubaasa kwehuzya ekintu kikuru, okuramya Yehova.—Shoma Abaefeso 5:15-17.

8. Ahabw’enki obuhabuzi oburikutuhiga kutakunda ensi buri bukuru munonga?

⁸ Sitaane atebeekaniise ensi ye kuba erikushemeza kandi erikuhuzya. Ekyo nikyo kyabaire kiriho omu kyasha ky’okubanza, kandi na hati nikwo kiri. (2 Tim. 4:10) N’ahabw’ekyo, twine kwikiriza obuhabuzi obu: ‘Mutakunda ebintu ebiri omu nsi.’ Twaba nitukora empindahinduka kuhikaana n’obuhabuzi obwo, nitwija kwetantara kuhugibwa, kandi nitwija kweyongyera ‘kukunda Isheboona.’ N’ekiraarugyemu, nikiija kutworobera kukora ebi Ruhanga arikukunda kandi agume naatusiima ebiro byona.—1 Yoh. 2:15-17.

9. Yesu akagamba ki aha riisho ery’akamanyiso, kandi akataho ky’okureeberaho ki?

⁹ Ebigambo by’embabazi ebi Yesu yaagambiire Mariza bikaba nibihikaana gye n’enyegyesa ye n’eky’okureeberaho kye. Akahiga abeegi be kurinda eriisho ryabo ery’akamanyiso bakuguma bariteire aha kusherura eby’Obukama bataine birikubateganisa. (Shoma Matayo 6:22, 33.) Yesu akaba ataine bintu bingi ebirikumuteganisa, akaba ataine nju nari eitaka.—Luk. 9:58; 19:33-35.

10. Yesu akataho ky’okureeberaho ki omu kuheereza kwe?

 ¹⁰ Obu Yesu yaabaire naaheereza omu nsi, hakaba hariho ebintu bingi ebyabaire nibibaasa kumuhuzya, kwonka tarahugire. Obu yaabaire atandikire obuheereza bwe, akeegyesa abantu baingi kandi yaakora eby’okutangaaza omuri Kaperenaumu, reero abantu baamweshengyereza kutaruga omu rurembo rwabo. Mbwenu shi Yesu akakora ki? Akagira ati: “Nshemereire kubuurira ebigambo ebirungi by’Obukama bwa Ruhanga omuri tauni ezindi nazo.” (Luk. 4:42-44) Kuhikaana n’ebigambo bye, akabuurira omuri Palestine yoona, kandi yaayegyesa n’abantu. N’obu araabe yaabaire ahikiriire, akaba aine ebyetengo nk’eby’abantu abandi kandi obumwe akaba aruha ahabw’okukora munonga omu kuheereza Ruhanga.—Luk. 8:23; Yoh. 4:6.

11. Yesu akagambira ki omushaija owaabaire aine oburemeezi omu ka yaabo, kandi Yesu akarabura ahari ki?

¹¹ Eizooba rimwe obu Yesu yaabaire naayegyesa abakuratsi be kwemera okuhiiganisibwa, omushaija omwe akagira ati: “Mwegyesa, ragiira mwene tata tubagane obuhunguzi bwaitu.” Kwonka Yesu akanga kwetaasya omu nshonga ezo. Yesu akamugarukamu ati: “Iwe mushaija ‘we, n’oha owantaireho kubacwera orubanja, nari shi okuba ow’okubabaganisiza?” Bwanyima Yesu akagumizamu n’okwegyesa kwe, yaarabura abamuhurikiize aha kabi k’okuhugibwa ebintu by’ensi bikabaremesa kuheereza Ruhanga.—Luk. 12:13-15.

12, 13. (a) Harikuburayo obwire bukye Yesu akaitwa, niki ekyareeteire Abagriika abamwe kugira ekihika? (b) Yesu akatwariza ata abaabaire nibenda kumuhuzya?

¹² Obwire bukye Yesu ari haihi kwitwa, akaba aine amaganya mingi. (Mat. 26:38; Yoh. 12:27) Akaba aine emirimo mingi, kandi akacwerwa orubanja omu muringo ogurikuhemurana yaitwa omu busaasi bwingi. Teekateeka aha kyabaireho, aha Sande, eya Nisani ebiro 9 omu mwaka gwa 33. Nk’oku kyarangirwe, Yesu akataaha omuri Yerusaalemu atembire aha ndogoya, abantu barikumuhimbisa bati: “Omugabe orikwija omu iziina rya Mukama asiimwe.” (Luk. 19:38) Aha izooba eryakuratsireho, Yesu akataaha omu hekalu aine obumanzi yaabinga abashuubuzi abaabaire nibakoresa enju ya Ruhanga kubeihabeiha Abayudaaya bagyenzi baabo kubaihaho sente.—Luk. 19:45, 46.

¹³ Omu bantu abaabaire bari omuri Yerusaalemu, hakaba harimu Abagriika abaahindukire, kandi abaakunzire Yesu bakashaba entumwa Filipo kukora entebeekanisa na Yesu kugira ngu agambeho nabo. Kwonka Yesu akanga kuhuga yaaguma ataire omutima aha bintu bikuru eby’omumaisho. Buzima akaba atarikwenda kuteeraho kurangaanwa reero ekeetantara kwitwa abazigu ba Ruhanga. Bwanyima y’okushoboorora ngu akaba ari haihi kufa, akagambira Anderea na Filipo ati: “Orikukunda amagara ge, aryagabuza; kandi ogwo orikwanga amagara ge omu nsi egi, aryagarinda okuhitsya aha magara agatahwaho.” Omu mwanya gw’okwigutsa ekyetengo ky’Abagriika, akagambira kutooreza eky’okureeberaho kye eky’okwefeerereza reero yaaraganisa ati: “Omuntu weena ku ampeereza, Tata aryamuha ekitiinisa.” Hatariho kubanganisa, Filipo ebigambo ebi akagaruka yaabigambira abaabaire bamutumire.—Yoh. 12:20-26.

14. N’obu Yesu araabe yaabaire naayebembeza omurimo gw’okubuurira, niki ekirikworeka ngu akaba aine emiteekateekyere mirungi?

¹⁴ N’obu Yesu araabe atarahugira kuruga aha kigyendererwa kye ekikuru eky’okubuurira amakuru marungi, akaba atarikuguma naateekateeka aha murimo gwe gwonka eshaaha yoona. Akaikiriza kuza aha bugyenyi kandi yaabwongyeramu n’okushemererwa arikuhindura amaizi viinyo. (Yoh. 2:2, 6-10) Akaikiriza n’okuza kurya kyakiro ari n’abanywani be n’abeegi be.  (Luk. 5:29; Yoh. 12:2) Ekirikukira obukuru, akaba akira kugira obwire bw’okushaba, kuba wenka kuteekateeka, n’okuhuumuraho.—Mat. 14:23; Mak. 1:35; 6:31, 32.

15. Entumwa Paulo akaha buhabuzi ki, kandi akataho ata eky’okureeberaho kirungi?

¹⁵ Entumwa Paulo owaagyeragyeraniise embeera z’Omukristaayo aha mpaka z’okwiruka akagira ngu “tujuure ebirikuturemeera byona.” (Shoma Abaheburaayo 12:1.) Buzima Paulo ebi yaabaire naabuurira abandi nibyo yaabaire naakora, ahakuba akareka omurimo gw’Ekiyudaaya ogwabaire nigubaasa kumureetera obugaiga n’okumanywa. Akata omutima aha bintu ebirikukira obukuru yaayejumbira kimwe omu buheereza bwa Ruhanga, arikuheereza nk’omumiisani omuri Asiria, Asia, Makedonia, na Buyudaaya. Paulo arikugamba aha matsiko ge g’okutunga amagara agatahwaho omu iguru akahandiika ati: “Niinyebwa eby’enyima, ninkununkirira eby’omumaisho, niinyezirika kuhika aharikuhakanirwa ngu mpeebwe ekihembo.” (Fil. 1:10; 3:8, 13, 14) Paulo arikukoresa omugisha gw’okutaba mu bushwere, akaba omusinguzi ‘arikukorera Mukama’ ataine ebirikumuteganisa.—1 Kor. 7:32-35.

16, 17. Yaaba turi omu bushwere nari tutaburimu, nitubaasa kutooreza tuta Paulo? Ha eky’okureeberaho.

¹⁶ Nk’entumwa Paulo, abaheereza ba Ruhanga nibacwamu kuguma batagiire mu bushwere kugira ngu batagira obujunaanizibwa bwingi reero bate omutima aha mirimo y’Obukama. (Mat. 19:11, 12) Abaheereza ba Ruhanga abari omu bushwere nibaba baine obujunaanizibwa bwingi. Kwonka yaaba turi omu bushwere nari tutaburimu, twena nitubaasa ‘kujuura ebirikuturemeera byona’ kandi tuheereze Ruhanga nk’oku kirikubaasika tutaine birikututeganisa. Eki nikibaasa kutwetengyesa kutuubya aha bikorwa ebirikushiisha obwire reero tuteho ebigyendererwa by’okumara obwire bwingi omu buheereza bwa Ruhanga.

¹⁷ Teekateeka ahari Mark na Claire omushaija n’omukazi we kuruga omu ihanga rya Wales, bakaba baapayoniya bwanyima y’okuheza emishomo yaabo, kandi bakagumizamu nibaheereza nka payoniya na bwanyima y’okutaaha hamwe omu bushwere. Mark naashoboorora ati: “Tukabaasa kweyihaho ebintu ebitarikwetengyesa munonga nk’okuruga omu nju yaitu ey’ebishengye bishatu n’omurimo gwaitu kugira ngu tubaase kuza omu buheereza bw’okwombeka Ebyombeko by’Obukama omu nsi yoona.” Emyaka 20 ehingwire, beetoroire Africa barikuhwera omu kwombeka Ebyombeko by’Obukama. Omurundi gumwe esente zaabo zikatuuba zaahika aha doora 15, kwonka Yehova akaguma naabareeberera. Claire naagira ati: “Nikitureetera okushemererwa kwingi kumara eizooba ryona turikuheereza Yehova. Tutungire abanywani baingi, kandi tihaine eki tukyenire. Ebintu bikye ebi twayeyihireho titurikubaasa kubigyeragyeranisa n’okushemererwa oku tutungire turikuheereza Yehova omu buheereza obw’obutwire.” Baingi abari omu buheereza obw’obutwire batungire ebirungi nibyo bimwe. *

18. Ni bibuuzo ki ebi abamwe barikubaasa kuteekateekaho?

¹⁸ Kandi shi iwe? Noobaasa kukora ki waamanya ngu haine ebirikukuremesa kugira omuhimbo gwʼokusherura ebyʼObukama? Eky’okugarukamu nikirugiirira aha ku orikweshomesa Baibuli n’oku orikweyegyesa gye. Ekyo noobaasa kukikora ota? Ekicweka ekirikukurataho nikishoboorora.