M’milungu ingapo ikubwelayi, kudzakhala masankho m’mayiko osiyana-siyana. Palipano, anthu akuganizilapo mwamphamvu kuti adzasankha ndani kukhala mtsogoleli wawo.

 Kodi Baibo ikutipo ciyani?

 Baibo ionetsa kupeleŵela kumene atsogoleli onse aumunthu ali nako.

•   “Musamakhulupilile anthu olemekezeka, kapena mwana wa munthu wina aliyense wocokela kufumbi amene alibe cipulumutso. Mzimu wake umacoka, ndipo iye amabwelela kunthaka. Pa tsiku limenelo zonse zimene anali kuganiza zimathelatu.”—Salimo 146:3, 4, mawu a m’munsi.

 Ngakhale atsogoleli ocita bwino kwambili amamwalila m’kupita kwa nthawi. Kuwonjezela apo, owaloŵa m’malo amatha kusintha nchito zabwino zimene iwo anasiya.—Mlaliki 2:18, 19.

 Zoona n’zakuti Baibo ionetsa kuti anthu sanapangidwe kuti azidzilamulila okha.

•   “Munthu amene akuyenda alibe ulamulilo wowongolela mapazi ake.”—Yeremiya 10:23.

 Koma kodi alipo amene angapeleke utsogoleli wabwino masiku ano?

 Baibo imatiuza kuti Mulungu anasankha mtsogoleli wabwino komanso wodalilika kuposa wina aliyense. Mtsogoleli ameneyo ni Yesu Khristu. (Salimo 2:6) Iye ni Mfumu ya Ufumu wa Mulungu, umene ni boma limene likulamulila kucokela kumwamba.—Mateyu 6:10.

 Kodi mudzasankha Yesu kukhala mtsogoleli wanu? Baibo imaonetsa kuti funso limeneli ni lofunika kwambili.

•   “Psompsonani mwanayo [Yesu Khristu] kuopela kuti Mulungu angakwiye, Ndipo mungawonongeke ndi kucotsedwa panjilayo. Pakuti mkwiyo wake umatha kuyaka mofulumila. Odala ndi onse amene akuthawila kwa iye.”—Salimo 2:12.

 Ino ndiyo nthawi imene muyenela kusankha. Maulosi a m’Baibo aonetsa kuti Yesu anayamba kulamulila m’caka ca 1914, ndiponso kuti posacedwa Ufumu wa Mulungu udzaloŵa m’malo maboma onse a anthu.—Danieli 2:44.

 Kuti mudziŵe zambili za mmene mungaucilikizile ulamulilo wa Yesu, welengani nkhani yakuti “Sankhani Kucilikiza Ufumu wa Mulungu Palipano!”