NA O dumela gore Beibele e tšwa go Modimo? Goba o nagana gore e no ba puku yeo e tletšego dikgopolo tša batho?

Gaešita le batho bao ba ipitšago Bakriste ba dula ba ngangišana ka taba ye. Ka mohlala, ka 2014 nyakišišo yeo e dirilwego ke mokgatlo wa Gallup kua United States, e hweditše gore batho ba bantši bao ba ipitšago Bakriste ba dumela gore “Beibele e tswalana le Modimo ka tsela e itšego.” Go fapana le moo, nyakišišong yona yeo motho o tee go ba bahlano o dumela gore Beibele e no ba puku feela ya “dinonwane, histori le melao yeo e ngwadilwego ke batho.” Ka gona, ngangišano ye e dira gore re ipotšiše gore ge go thwe Beibele e “buduletšwe,” seo se ra gore’ng?—2 Timotheo 3:16.

Beibele e bopša ke dipukwana tše 66 tšeo di ngwadilwego ke batho ba e ka bago ba 40 gomme e ngwadilwe ka mengwaga e ka bago e 1 600. Eupša ge e ba Beibele e ngwadilwe ke batho, gona go tla bjang gore go bolelwe gore e “buduletšwe ke Modimo”? Ge go bolelwa ka tsela e bonolo, polelwana e rego “buduletšwe ke Modimo” e ra gore Mongwadi wa ditaba ka moka tšeo di lego ka Beibeleng ke Modimo. Beibele e re: “Batho ba boletše se se tšwago go Modimo ge ba be ba šušumetšwa ke moya o mokgethwa.” (2 Petro 1:21) Seo se ra gore Modimo o ile a šomiša matla a gagwe ao a sa bonagalego, e lego moya o mokgethwa, gore a fetišetše molaetša wa gagwe go bangwadi ba dipuku tša Beibele. Se se ka swantšhwa le ge rakgwebo a botša mongwaledi wa gagwe gore a ngwale lengwalo. Mongwadi wa lengwalo ke yoo ditaba di tšwago go yena e sego yo a le ngwalago.

Bangwadi ba bangwe ba Beibele ba kwele morongwa a bolela molaetša wa Modimo. Ba bangwe ba be ba bona dipono tše di tšwago go Modimo. Mabakeng a mangwe Modimo o be a fetiša molaetša wa gagwe ka ditoro. Le ge ka dinako tše dingwe Modimo a be a dumelela batho go šomiša mantšu a bona ge ba ngwala molaetša wa gagwe, eupša mabakeng a mangwe o be a ba nea mantšu a lebanyago ao ba swanetšego go a ngwala. Go sa šetšwe gore bangwadi ba be ba hwetša molaetša bjang, ba be ba sa ngwale dikgopolo tša bona eupša ba be ba ngwala tša Modimo.

Re ka kgodišega bjang gore Modimo ke yena a buduletšego bangwadi ba Beibele? Ela hloko dilo tše tharo tšeo di re neago bohlatse bja gore Beibele e ngwadilwe ke Modimo.