Beibele, yeo gape e tsebjago e le Mangwalo a Makgethwa, e na le dipolelo tše dintši tše bohlale. Lega go le bjalo, ela hloko tsela yeo Beibele e ipolelago ka yona: “Lengwalo ka moka le buduletšwe ke Modimo.” (2 Timotheo 3:16) Go na le bohlatse bjo bontši bjo bo thekgago taba yeo. Ela hloko bohlatse bjo bo latelago:

•   Ga go na motho yoo le ka mohla a kilego a atlega go ganetšeng go nepagala ga Beibele ditabeng tša histori.

•   Bangwadi ba Beibele e be e le banna ba botegago bao ba dirilego seo ka go tšwa pelong. Potego ya bona e dira gore seo ba se ngwadilego e be therešo e sa belaetšego.

•   Beibele e na le sehlogo setee, e lego: go godišwa ga tshwanelo ya Modimo ya go buša batho le go phethagatšwa ga morero wa gagwe ka Mmušo wa gagwe wa legodimong.

•   Gaešita le ge e ngwadilwe nywageng e dikete e fetilego, Beibele ga e na dikgopolo tše di fošagetšego ditabeng tša thutamahlale tšeo di bego di amogelwa ke batho ba bantši mehleng ya bogologolo.

•   Bohlatse bjo bo begilwego bja histori bo hlatsela gore diporofeto tša Beibele goba dilo tšeo di boletšwego e sa le pele, di phethagetše.