BATHO BA NYAKA GO RATWA. Lenyalo, lapa goba segwera di ka se atlege ge go se na lerato. Ka gona, seo se a kwagala ka gobane lerato le bohlokwa e le gore motho a dule a thabile le go phela gabotse monaganong. “Lerato” ke eng?

Lerato leo go bolelwago ka lona mo ga se la go ratana ga monna le mosadi, leo le lona le lego bohlokwa. Go e na le moo, ke mohuta wa lerato le legolo leo le dirago gore motho a bontšhe go tshwenyega ka ba bangwe go e na le go tshwenyega kudu ka yena. Ke mohuta wa lerato le borutho le la maikwelo leo le hlahlwago ke melao ya motheo ya Modimo.

Beibele e hlalosa lerato ka tsela e botse ge e re: “Lerato ga le fele pelo e bile le botho. Lerato ga le hufege, ga le ikgantšhe, ga le ikgogomoše, ga le dire tša go leša dihlong, ga le nyake tša go ikhola, ga le rumolege. Ga le boloke pego ya bobe. Ga le thabele go se loke eupša le thaba le therešo. Le tiišetša tšohle, . . . le holofela tšohle, le kgotlelela tšohle. Lerato le ka mohla ga le fele.”—1 Bakorinthe 13:4-8.

Lerato la mohuta woo “ga le fele.” Seo se ra gore le tla dula le le gona. Ke nnete gore le ka tšwela pele le tia ge nako e dutše e eya. Ka gona, ka baka la gore ga le fele pelo, le botho e bile le a lebalela, lerato le bjalo ke “setlemo se se phethagetšego sa botee.” (Bakolose 3:14) Batho bao ba ratanago ka tsela e bjalo ba ikwa ba šireletšegile e bile ba thabile, go sa šetšwe mafokodi a bona. Ka mohlala, ela hloko botee bja batho bao ba nyalanego.

Jesu Kriste o ile a ruta ka melao ya motheo e bohlokwa mabapi le lenyalo. Ka mohlala, o itše: “‘Monna o tla tlogela tatagwe le mmagwe, a kgomarela mosadi wa gagwe gomme ba babedi ba e tla ba nama e tee.’ . . . Ka baka leo, se Modimo a se tlemagantšego jokong go se be le motho yo a se aroganyago.” (Mateo 19:5, 6) Lengwalong le re kwa ka melao e mebedi ya motheo ya bohlokwa.

‘BA BABEDI E TLA BA NAMA E TEE.’ Batho bao ba nyalanego ba ka tlemagana kgauswi kudu, gomme lerato le šireletša tlemo yeo gore go se be le yo a e senyago ka baka la go se tshepagale. Motho a ka dira seo ka gore a re mola a le lenyalong e be “nama e tee” le motho yo a sa nyalanago le yena. (1 Bakorinthe 6:16; Baheberu 13:4) Go se botege lenyalong go ka dira gore banyalani ba se ke ba tshepana e bile go ka senya lenyalo la bona. Ge e ba go na le bana lenyalong leo, ba ka ikwa ba gateletšegile, mohlomongwe ba ka galefa, ba ikwa ba sa ratwe e bile ba sa šireletšega.

“SE MODIMO A SE TLEMAGANTŠEGO JOKONG.” Lenyalo le lona ke tlemo e kgethwa. Banyalani bao ba hlomphago tlemo ye ba leka go tiiša manyalo a bona. Ge go tšwelela mathata lenyalong, ga ba leke go nyaka ditsela tša go hlala. Lerato la bona ke le matla kudu. Lerato le bjalo “le kgotlelela tšohle,” gomme le ba thuša go rarolla mathata e le gore ba kgone go phedišana ka botee le ka khutšo.

Ge batswadi ba ratana ka tsela e bjalo, bana ba bona ba holega kudu. Kgarebe yeo e bitšwago Jessica e ile ya lemoga seo gomme ya re: “Mma le tate ba tloga ba ratana le go hlomphana. Ge ke bona tsela yeo mma a hlomphago tate ka yona, kudukudu ge ba dirišana le rena bana, ke ikwa ke nyaka go swana le yena.”

Lerato ke seka se segolo sa Modimo. Ge e le gabotse, Beibele e re: “Modimo ke lerato.” (1 Johane 4:8) Ka gona, ga go makatše ge Jehofa gape a bitšwa gore ke “Modimo yo a thabilego.” (1 Timotheo 1:11) Le rena re ka ba bao ba thabilego ge re ka leka go ekiša dika tša Mmopi wa rena, kudukudu lerato la gagwe. Baefeso 5:1, 2 e re: “Ebang baekiši ba Modimo, le le bana ba ba rategago, le tšwele pele le sepela leratong.”