Lengwalo la Pele la Johane 4:1-21
4 Bana babo rena le dikgaetšedi, le se ke la dumela thuto e nngwe le e nngwe yeo e bonagalago eka e tšwa go Modimo, eupša lekang go bona ge e ba ka nnete thuto yeo e etšwa go Modimo, ka gobane gona bjale go na le baporofeta ba bantši ba maaka lefaseng.
2 Dithuto tšeo di tšwago go Modimo le tla di tseba ge e ba di bolela gore Jesu Kriste o tlile lefaseng e le motho.
3 Eupša ge e ba dithuto tšeo di sa bolele gore Jesu o tlile mo lefaseng e le motho, gona ga di tšwe go Modimo. Le gona, tšeo ke dithuto tša motho yo a lwago le Kriste tšeo le kwelego gore di a tla, e bile di šetše di le gona lefaseng.
4 Bana ba ba rategago, le tšwa go Modimo gomme le fentše baporofeta bao ba maaka. Ka gobane Modimo yo a le thekgago, ke yo mogolo go feta Diabolo yo a lego boteeng le lefase.
5 Baporofeta bao ba tšwa lefaseng le, gomme ba bolela dilo tšeo lefase le di dumelago, ke ka baka leo lefase le ba theetšago.
6 Rena re tšwa go Modimo. Motho yo a tsebago Modimo o a re theetša eupša yo a sa tšwego go Modimo ga a re theetše. Seo se re thuša gore re bone gore ke molaetša ofe wo e lego wa nnete le wo e lego wa maaka.
7 Bana babo rena le dikgaetšedi, a re tšweleng pele re ratana ka gobane Modimo ke yena wa pele wa go bontšha lerato, gomme yo mongwe le yo mongwe yo a ratago batho ba bangwe, ke ngwana wa Modimo e bile o tseba Modimo.
8 Motho yo a sa ratego batho ba bangwe ga a tsebe Modimo, ka gobane Modimo ke lerato.
9 Modimo o bontšhitše gore o a re rata ka go romela Morwa wa gagwe yo a tswetšwego a nnoši lefaseng e le gore re tle re hwetše bophelo bjo bo sa felego ka morwa wa gagwe.
10 Lerato le ka tsela ye, ga se gore rena re ratile Modimo, eupša ke yena a re ratilego pele gomme a romela Morwa wa gagwe e le sehlabelo sa gore re lebalelwe dibe.
11 Bana bešo le dikgaetšedi, ka ge Modimo a re ratile ka tsela ye, gona le rena re swanetše go ratana.
12 Ga go motho yo a kilego a bona Modimo. Ge e ba re tšwela pele re ratana, Modimo o tla re thekga gomme o tla re bontšha lerato ka mo go feletšego.
13 Re a tseba gore re dula re le boteeng le yena gomme le yena a le boteeng le rena ka gobane o re neile moya wa gagwe.
14 Le gona rena re bone gore Tate o rometše Morwa wa gagwe gore a tle a phološe lefase, e bile re nea bohlatse ka taba yeo.
15 Motho yo mongwe le yo mongwe yo a dumelago ka pelo ka moka gore Jesu Kriste ke Morwa wa Modimo, Modimo o tla dula a le boteeng le yena gomme motho yoo a le boteeng le Modimo.
16 Rena re a tseba gore Modimo o a re rata e bile ga re belaele seo.
Modimo ke lerato gomme yo a tšwelago pele a rata Modimo o dula a le boteeng le Modimo e bile Modimo a le boteeng le yena.
17 Ka tsela yeo, re bontšha gore re rata Modimo ka pelo ka moka, e le gore re tle re bolele re sa tšhabe selo letšatšing la kahlolo, ka gobane mo lefaseng le re phela ka tsela yeo Kriste a bego a phela ka yona.
18 Motho yo a ratago Modimo ga a boife selo, ka gobane lerato la nnete le raka letšhogo. Ge e ba motho a boifa, gona lerato la gagwe ga se la nnete.
19 Ge e le rena, re bontšha lerato ka gobane Modimo o re ratile pele.
20 Ge e ba motho a re: “Ke rata Modimo,” eupša a hloile ngwanabo, gona o bolela maaka. Ka gobane ge a palelwa ke go rata ngwanabo yo a mmonago, na a ka kgona go rata Modimo yo a sa kago a mmona?
21 Modimo o re neile taelo ye, gore yo mongwe le yo mongwe yo a ratago Modimo o swanetše go rata le ngwanabo.
